Efeeso 3 - NEAJEEDA EESH BEA BUUNEESSEAN

Gadiyeeda Baulo aba heeda Emoojiga

¹ Aba sareani aniini Baulo, was siida ghealooniga Gristo Yeesu aba badahuukkeagwa agooga fuga Emoojiga,

² ama deeppea noayiinyi iitta sitteaganean bea dagheerjeandumeeda Aseetta ghayi sugoonan appadahuukkeagwa,

³ gidanung' danalda makcheameeda aba giidaheachta gawuurji gidang'waardi nea ghanuwasichi.

⁴ Ak iyoassoomi ng'asheesu ang'waarjiin, abeeda gajajeeng'ni gidaanaldi gili funyaat bea Gristohiin,

⁵ ak ea meanung' ghwanal balloojiga buuneeda aba seaygoojiga suurja gawuurji gidaghamneawa sittaheachsiinda giijasoodigaaschi ghaydidi ea sibanga aba naweeda Gurorooda;

⁶ nea gideaba, fuga Emoojiga fuga jea gwahearaniischi gil ea aseasa aba hearaniischoonagi, nea gaba saseanagi, nea geeguuyeesi heelleesindaannyi mida jeeda Gristo Yeesu aba naweeda Giijasta Miy.

⁷ Appadaydeaba giijasi miyiin geanung' doaw siida gadiyeeda gawuurji gidagoondanean Aseetta dagheerjeandumeeda ghayi sugoonan aniini aba uurda sin gadiyeadaannyi.

⁸ Aba aniini, earappeadi eawoschi mwanang'eawa fuga sean ghaydidin, abeeda geegu dagheerjeandumeani, ak gearukkwiiisi fuga Emoojiga meanang'oochcheandumeeda meesikkideawana bea Gristo,

⁹ ak ghwanung' ghwadaa buuneeda sean badiida makcheameeda ghayi sufuy aba gweannyeekka aba heeda Aseetta sin haleanjeessean;

¹⁰ ak aba naweeda ganiisa abeeda weaghumeeda Aseetta meammu ettean abeeda ghwanal sugoodiga ea gheambalmeeda aba jeeda daroorakka humng'eeda.

¹¹ Ng'asheanji gwasin nea gabaysiina gidagassiida maygammudean jeeng'u Gristo Yeesuuyda was Ng'uttamiideanyean,

¹² nea aba niny geendeawi dargooda nea geammuughu beatta aba masaweegaasa aba jeedeaba niny.

¹³ Asi geamuscheegwa adagabur iheengeagwa aba sawanaduutkkeasu aba badahuukkeagwa, was giigheambiitteang'wa.

Bariinyeega Gristo

¹⁴ Ak aba sareani geatkunyi aba madeeda Bwaabwa,

¹⁵ was gumdooda gealga sean bea ng'eanyiida ea humng'eeda ak geguushteawa,

¹⁶ hean abeeda aba gitteenna meanang'oocheandumeeda gigheambiittaannyi gwadeeppa gagooneegwa gimajeekta ea uurda aba naweeda Guroroadaannyi aba siideaba jih,

¹⁷ nea goobiida Gristo jeesingeagwa aba naweeda masaweega, ak geng'eapseegwa jeeda barinyeega,

¹⁸ hean abeeda ghwanyas uurda jea goobareannyi sea fuga ghaydidi sean gitteenna baraknatta ea geawunda ea geawunda humng'eeda ea gidayang'da sheaginda jeeda,

¹⁹ nea ghoonalli barinyeega Gristo ng'al fughareenga, ak abeeda geanyiideagwa hidooda sean bea Aseetta.

²⁰ Asi aba ninnyeeda mideawa uurda gadiyi aba jeesingaasa ghoammu gwasin ng'asheega saang'a ea ghang'al haleanjeeda sumuschi ea gea siipkaachchi,

²¹ daba niny gigheambiitta aba jeeda ganiisa aba jeeda Gristo Yeesu ea ghoaw jeachcheenga sean ea ghoaw damanda manda mudeanooda. Amin.