Efeeso 2 - NEAJEEDA EESH BEA BUUNEESSEAN

Ghang'eeda miyeeda ea ghwahitta eaweega

¹ Ak gagooneegwa eaweega, nea abeeda ea noomeewayi aba gidinyeannyeekka ea ring'eega,

² was gea ghayi oayaachchi geeshta nea goommaseawji seareetta bea ng'eanyiidean, nea ghoayaachchi geeshta sugoochcheanda mideawa uurda humng'eeda, gurorootta ghamneawa sin gadiyeeda aba jeeda balloojiga fuga manda mureedean.

³ aba suu ghayi earaseasa sippiidi eesasean jeeda haleanjeeda gasa sasanuukkaasa, nea geayaachchi geeshta haleanjeeda gasa saseeda ea uhuuda, nea geebean eewosa diibiga nyarasta, ak geewuurjeewi fuga mwaatkwa.

⁴ Nea Aseetta baruur aba baydeayda, aba jeeda bariinyeegaaschi haw aba gidabwariiydaneasa,

⁵ earappeadi ghayi simeewayi aba gidinyeannyeekkaasaan, iiduw ghwanung' eduuttuuna sea Gristo, (aba dagheerjeandumeeda silealneegwa),

⁶ ak goodunneasa sea niny ak ghwanung eepiitpiida sea niny aba jeeda ng'eanyiida guroorooda, aba jeeda Gristo Yeesu,

⁷ nea aba seaygoojiga jea ghwahidu gwadeeppa ghoahiimu meanang'oochcheandumeeda meammu eetteen aba dagheerjeandumeedaannyi aba innyeanda jeeda aba heedeanya aba jeeda Gristo Yeesu.

⁸ Aba dagheerjeandumeeda silealneegwa aba naweeda masaweega; ea masna milmilandeang'wa osinnyi, nii gagu Aseetta,

⁹ ak ea mii gisin siida, asi gilinyoo ea sih gil adaghaghwar geaw.

¹⁰ Aba gideaba aseasa geawaschi gadiyeadaannyi, gwasinneasa naweeda Gristo Yeesu, aba gadiyoojiga miyaas, ghayi bean gwasin Aseetta ammwadi, gideaba eyaada geeshta.

Agi aba jeeda Gristo

¹¹ Asi oapkaada gideaba ghayi agooga goowaschi fuga Emoojiga aba saseeda, ak geegureewaneegwa fuga mii eayaat ghasmeahooda aba gissuguura ghasmeahooda, sisissa saseeda aba geattinda,

¹² oapkaada gideaba eara agooga aba damandida sihheellaneegwa sea Gristo, ak geehheelaneegwa sea emeeda Israeeli, ak goowoschi rabasta neajeeda heelleessiindida, ak ea mondeawani gidoararji nea manda Aseetta jeeda ng'eanyiida.

¹³ Ak ghamneawa aba jeeda Gristo Yeesu agoogeeni ghayi owaschi sheagiin ea sinnekkideegwa aba foojeanda Gristo.

¹⁴ Aba gideaba niny hoyyooydeanya, nung' eahuwa easasean agi, ak gwanyarja ghamarda beashooda bea furjeeda,

¹⁵ iiduw nea ghoahiit geandeayda deaweeda aba saseadaannyi aba digheannyeekka ea huumeannyeekka, ak abeeda gwasin siideesh nea gaba geaw ghoaghiisa gea assiyyeenya, ak gwasin hoyyoo,

¹⁶ hean gooduumpcheeweasa easasean Aseetta aba saseanagi aba naweeda beehiida, ak gwaduulu furjeeda.

¹⁷ Ak ghwahidu ak gwarukkwiida hoyyoo aba heedeang'wa agoogeeni sheagiin ea hoyyoo aba heeda fuga neekki;

¹⁸ aba niny aseaseen seaniin simmuuschi eeneekkiisiinana Bwaabwa aba guroroonagi.

¹⁹ Asi ghang'eeda ghamneawa agooga moowoosi rasbasta ghana fuga ng'atta, goowooschi fuga bea ng'eanyiida sea fuga ghaydidi bissa awosa fuga gheeda Aseetta,

²⁰ sideeksa badayda sindeatta ghayi bea giijasoodiga ea subanga, ak Gristo niny ea lagheaneeda haw washiini,

²¹ niny ghwasar gheassean, ak googuuyi ak ghoaw gheessibatta Aseetta ghaydit bea Ng'uttamiida;

²² aba niny eara agooga geedeekseegwa jeedeaba niny ghoaw heechchea goobiida Aseetta aba jeeda Gurorooda.