Efeeso 1 - NEAJEEDA EESH BEA BUUNEESSEAN

¹ Baulo, Giijasoochcheanda Gristo Yeesu, aba gidagasiida Aseetta, Heeda Fukghaydidi biissa ea doobiiweadi aba jeeda Gristo Yeesu.

² Gagasa gagooneegwa Aseetta dagheerjeandumeeda ea hoyyoo Aseetta was Ghweandeanya ea Ng'uttamiida was Yeesu Gristo.

Ng'ushshiinda leabu Gurorooda aba jeeda Gristo

³ Ghawooda daba Aseetta ea Bwaabwa Ng'utaamiideanya was Yeesu Gristo, ghayi goaneasa ghawooda aba jeeda Gristo aba giliwas ghawooda gurorooda aba daroorakka humng'eedean,

⁴ iiduw nea ghwaloadeasa nea miyeabwat sindeetta ng'eanyiida, ak geewoschi ghaydidi nea geawoschi fuga meerukunana badahuukka ng'asheega munyas aba madeadaannyi.

⁵ Niny ghwaloodeasa aba bariinyeega eahuwa balloojigaaschi aba naweeda Yeesu Gristo, aba gidagasiida niny,

⁶ aba duumsheesiinda gigheambiitta dagheerjeandumeeda gooneasa mwadaagha aba naweeda Balleandaannyi bwariiy.

⁷ Aba niny geendeawi ghuhooda aba foojeandaannyi, was samsiinda ring'eeda, aba gitteenna dagheerjeandumeadaannyi.

⁸ Ak gagooneasa ea ghwanawda.

⁹ Aba gideaba nideajiinneasa aba weaghuumeeda sean ea makcheameeda funyaat bea gitta gasean, aba gitta bada appadayda Gristo was gidagasa iihitta damandean,

¹⁰ ak goguuyi haleanjeessean aba niny, haleanjeeda mida humng'eeda ea gea mida badayda ng'eanyiida.

¹¹ Aba niny, aba gitta gassiida ninyiin was dea ahiit haleanjeessean aba gitta gassiidean,

¹² aseaseeda ghayi sibean earara Gristo amwadi sittoobiiweasa ak geegeanneasa eeppiidana nea geeduumsheesi gigheambiittaannyi.

¹³ Ak agooga aba jeedeaba niny noayiinyi ng'asheanda huumwa, nea giijasta miy bea lealeanoodeang'wa, ak ea noamwaschi niny, nea gorooreegwa heelleeda Gurorooda Ghaydit,

¹⁴ ak geasikteawi hearaniischoodeanya ea eeyi bwak ea eanyasa, ak geeduumsheesi giigheambiittaannyi.

Baulo ghamwaash Aseetta

¹⁵ Aba nii deaghayi nayiinyi aniini iitta masaweegeagwa aba badayda Ng'uttamiida was Yeesu ea gidoabwariiydi fuga ghaydidi sean,

¹⁶ ea mii danung'waada badiischeesiinda appadahuukkeagwa, inyeessa ghaapkaachcheagwa iyamwashchi Aseetta,

¹⁷ ak abeeda Aseetta Ng'uttamiideanya was Yeesu Gristo, Bwaabwa gigheambiitta, gagasa gagooneegwa gurooroodaannyi bea weaghuumeeda ea dea gidaheechta jea analana niny,

¹⁸ Gheanyanga mida jeesingeagwa gagasa eayyeat, ak ghoanalli rarooda gidaguurdeaydaneegwa giduurji, ea meanang'oochcheandumeadaannyi ea giigheambiitta hearaniischoodaannyi aba heeda fuga ghaydidi,

¹⁹ nea aba gitteanna hawunda uurdaannyi meammu eetteen aba heedeanya was fuga mideawa masaweega, aba gidagadiyeatta uurdaannyi haw

²⁰ ghayi ahiit aba jeeda Gristo damanda aduunna jeeda miyeeda, ak ghwanung' goopteada aba geattindaannyi bea dugwa aba daroorakka humng'eeda,

²¹ hean goombal fuga ambaliischi sean ea gheambalmeeda ea uurda ea sugoochcheandumeeda, ak ghang'attaawa gheawunga sean ghayi sing'at, ak ea mii aba seaygeeni gil eara diitta jea ghwahiduun;

²² ak ghwayiin haleanjeesean hing'eadayda geeshangaaschi ak ghoadaw hawunda haleanjeessean appadayda ganiisa,

²³ was saseadaannyi, nea hidoadaannyi gil was dea annyiit haleanjeessean aba jeeda haleanjeessean.