Ebraniya 5 - NEAJEEDA EESH BEA BUUNEESSEAN

¹ Aba gideaba gilinyoo ea ashoohoochcheanda haw siloat aba jeeda buuneeda gealoat gwasin gadiyeeda aba hoorgeeda buuneeda aba giduupcheeda sea Aseetta, ak ghoadayda haleanjeeda ea haleanjeeda lukghumajeega appadayda ring'eeda.

² Nea ghoammu gwandeayi sea fuga mwanala gissin ea gea sadeadi, aba gideaba niny gaburda ng'arng'aranda.

³ Appadaydeaba ng'asheesu niny sirat ghoadayda lukghumajeega appadayda ring'eagaaschi ak ghoadayda eara gea buuneeda.

⁴ Ea manda siida ammu gwanyaksa geaw mureani, geaghus gaguursa Aseetta, gawuurji gidaguursiinda Haruuni.

⁵ Gwasnu eara Gristo mii godiing'u geaw ak geanung' ghoaw ashoohoochcheanda haw, niny ghwaloat dea ghayi eeshsha niny, “Ang'iing'i guwosi Balleandeanyu, askweareani neajiilleey;”

⁶ ak gawuurji ginnyaashta aba hich nuut, “Ang'iing'i guwosi ashoohoochcheanda manda mudeanooda uurji Melkisedeki.”

⁷ Aba askwearjoojikka bea saseadaannyiin ghamwaash Yeesu Aseetta nea gang'ula humng'eeda ak ghabwat Aseetta, nea goyyeawda aba ghuutta haw ea dabeakka, nea gogeal heeda siida ammu ghoaghuuha niny miyeeda, ak geayiiy aba gidawalda gheang'da Aseetta.

⁸ Earappeadi was Balleanda, ghwanal mureeda aba gitta ghayi sawaniin;

⁹ amaduw nea siimmajeek ghoaw ging'eetta lealeanooda mamudeana aba heeda buuneessean sissa niny mureeda,

¹⁰ ak ghwaloat Aseetta ghoaw ashoohoochcheanda haw uurji Melkisedeki.

Miinda gheang'da aba nung'weadayda masaweega

¹¹ Appdaydeaba nii geendeawi ng'asheega saang'a jea eerukuna hang'waay rukunooda, earappeadi mwang'ada iidigeagwa.

¹² Earappeadi aba damani miisa awosa ginealshoodigean, gammiiseegwa gideaba gajanyasa sii nuut jea ghoanaleegwa gichcha ng'asheega majeekcheewi bea madeeda bea Aseetta. Googasayi eanooga, mii hamitta hang'waay gil;

¹³ aba gideaba siida ghus eanooga mwanala gil aba ng'asheega doabiiw, aba gideaba niny jeepta.

¹⁴ Hamitta hang'waay gaba fuga nihittiisa heeda, nea giikka mideawa fughareengean ea sinnaal sinooda gichchea goheelleatta ng'asheega miyaas ea gea munyas.