Ebraniya 4 - NEAJEEDA EESH BEA BUUNEESSEAN

¹ Asi helleesiinda beatta jeeda giibindaannyi gwanda heeda, ak gidabal geabealli ak ea mwaramwasa sih aba jeedeang'wa ak geergweaksiina gideaba mwanyasa.

² Aba gideaba giijasta miy ghwahittaayda heedeanya gidahittaayda heannyaawa; nea iitta nyas ghanyea maloossiina gil, aba gideaba mwanyasa masaweega aba jeeda fuga iiy.

³ Aba gideaba aseaseeda ghayi numwas gaygaweay jeedeaba fuuftida, gawuurji gidanyaashta niny, “Gawuurji gidayaakti habeawooda aba nyarasteanyu, ‘Ghanyea maygaweay jeeda fuufteanyu,’” earappeadi niisha gadiyoojigaaschi ghang'eada dea ghayi subwada sindeetta ng'eanyiida.

⁴ Aba gideaba gwanda heeda rugu iitta eaweetteaba ispwa nea gwayi, “Ak gafuuf Aseetta eaweetteaba ispwa aba gadiyoojigaaschi sean.”

⁵ Nea gabiikta gwayi aba hiji, “Maygaweay jeeda fuufteanyu.”

⁶ Asi earagwasa gideaba gwanda fuga jea gaweay jeeda, nea fukka ghayi asheeda ghoang'ng'waay giijasta miyiin ghwaraay gaweay jeeda aba nyootta mureeda,

⁷ gichcha gagasa eaweechcha nuut, “Askweareani” nea gwarukuna ghuutta Dawdi iimuchchu nea ning'atta damanda haw, aba ng'asheega ning'atta giideascheeda, “Askweareani, iyooyiinyi ghuuttaannyi, ea adoahhang'waanyi guroruunatkeagwa.”

⁸ Inyeeda ghayi Yoshuwa aniidaw saawa fuufta, abeeda gwachchi Aseetta ea maygabaloola eaweechcha nuut.

⁹ Asi, sighus fuufta eaweetta sabatto aba heeda fuga Aseetta;

¹⁰ aba gideaba siida weah jeeda fuufta Aseetta earada gayghwanung'waada gadiyeadaannyi gawuurji gidanung'waadayda Aseetta gadiyeadaannyi.

¹¹ Asi egagasa gimiriikta beatta jeedeaba fuufidi, ak abeeda ea manda siida jea ghoabeadaayda gidada aba nyootta mureeda.

¹² Aba gideaba ng'asheanda Aseetta ea majeek ak gagadiyi ak gwandeawa eaweega, ak gwandeawa uurda, ak ea ng'aniip ea ghang'al bwaangeeda ng'aniip meadajeega sean, iissa ghang'ut ak goheelli fughareeda ea gurorooda, ea robuutka ea gudadeeda, ak ghoammu gwasikteawa fughareenga ea gidabwariiy gurorooda.

¹³ Ak ammadeadaannyi ea manda gidaghayi sisin jea afunyaat, amaduw adaach haleanjeessean ea dawiiri nea daach aba madeeda gheanyangaaschi nea dea jea gorgweakseasa.

Yeesu Ashohoochcheanda haweewa seani

¹⁴ Ghang'eada damandida geendeawi ashoohoochcheanda haw ambal sean ghayi sik bugusta humng'eeda, nea Yeesu, Balleanda Aseetta, asi eangn'ng'waanya muuchchi gitta sumwaschiin.

¹⁵ Aba gideaba meendeawani ashoohoochcheanda haw moammu ghabwayda ng'arng'arannyeakkaasa, gendeawi dea sisissa mureeda sean ak gesimsimda gidaghayi sisimsimdaneasa, amaduw ea miigwasin ring'eeda.

¹⁶ Asi gagasa eneekkiida aba gissirarji eapkaana heeda hoorgeeda ghambiidaat bea dagheerjeandumeeda, ak abeeda geanyaschi baydeayda ak geanyaschi dagheerjeandumeeda jea ghaweat fih damanda sigasseewa.