Ebraniya 3 - NEAJEEDA EESH BEA BUUNEESSEAN

Yeesu ahaweewa Muusa

¹ Asi fuga eaduupcheewi ghaydidi, siguuyeesi guurnooda humng'eeda, asikteawana Yeesu, was giijasoochcheanda ea ashoohoochcheanda haw masaweagaasa.

² Niny adoabiiwaat aba heeda dea ghayi ajeagu niny, gawuurji gidawoseatta Muusa doabiiwaat aba jeeda gheeda Aseetta.

³ Eara Yeesu ea sinung' ghoaw dea doabiiwaat muuchchi biissa aghambiidaat ea ghang'al Muusa ak gawuurji siida deas gheeda gwandeawa mureeda ea ghang'al gheeda.

⁴ (Aba gideaba giliwas gheeda gwanda siida deas, nea dea deas haleanjeessean ea Aseetta.)

⁵ Nea Muusa ea doabiiwaat aba haleanjeessean mida jeeda gheeda Aseetta nea gawuurji soomjeanda, ak gamuuwwu haleanjeeda jea eergu galannya,

⁶ nea Gristo ea doabiiwaat aba jeeda gheeda Aseetta nea gawuurji balleanda. Ak geewoschi gheannyi ising'ng'waanyi muuchchi gitta sisikteawiin nea geaghwarji gitta sirarjiin.

Fuufta fuga Aseetta

⁷ Asi, gawuurji gitta rugu Gurorooda Ghaydidiin, nea gwayi, “Askwearean, iyoayiinyi ghuuttaannyi,

⁸ ea adoahhang'waanyi guroruunatkeagwa awuurjeewana fuga nittambiilan, aba eaweetta simsimda aba jeeda dareapcheeda,

⁹ damanda simanean ghweanigeagwa ak ghwadaa gadiyoojigeasu aba gweannyeew haradam.

¹⁰ Asi iiduw ghoanyareasan seaygeedida, nea gwayi, ‘Iissa gwarooda galeagasean aba jeesinga guroruunatka nyaawa; ak ghanyea mwanala naweadingeasu.’

¹¹ Gawuurji gidayaakti habeawooda aba nyarasteanyu, ‘Ghanyea maygaweay heeda jea dafuufa.’”

¹² Ang'ulla, fuga eaduupcheewi, adiiduw gobiida jeedeang'wa munyinda ea gurorooda mandeawana masaweega, jea ghwanung' ooppeada ea asheagiidana Aseetta mideawa eaweega.

¹³ Daba siisi amajeek nuut galeagasean, aba hiji duueeguura “ghamneawean,” ak ea manda jeedeang'wa siida jea ghoahang'waay aba reengaweega ring'eeda.

¹⁴ Aba gideaba geguuyeesi Gristo, iisibeachcheewi gideaba geang'ng'waanyi muuchchi gitta sisikteawi ammwadiin ea gagul muudeanooda,

¹⁵ Iiduw ea siyi, “Askweareani, iyooyiinyi, ea adoahhang'waanyi guroruunatkeagwa awuurjeewana fuga nittambiilan.”

¹⁶ Geabeang'a gil fuga iiy ak ghwattambiilan? Neada ea mii fukghayi leabu Misri nea ghoahaghwiidaan Muusahi?

¹⁷ Ak ea akkeega gil fuga anyareas gweannyeew haradam? Neada ea moanyareasa fukghayi sin ring'eeda, abeedeaysa muscheekka nyaawa dareapcheeda?

¹⁸ Ak ea akkeega gil fuga aksa habeawooda gideaba maygaweay heeda fuuftaannyi, neada ea mii fukka ghayi masissiina mureedeani?

¹⁹ Hean geadaayi gideaba mayghoammu gaweay jeeda aba nyootta masaweega.