Ebraniya 2 - NEAJEEDA EESH BEA BUUNEESSEAN

Lealeanooda haw

¹ Asi gammiiseasa gideaba gajeeng'ulla muuchchi ng'asheega ghayi siyiinyi, ghana esheagiidana.

² Aba gideaba giijasta ghayi rugu malaykajeega gaba huumwa nea giliwas ramaseanda ghana nyootta mureeda ghwanyas waldeayda doabiiw,

³ aseasa gajeammuusa eemuldaan imeduuppi lealeanooda haw deenu? Aba gideaba ghayi nibay gwayi Ng'uttamiida ammwadi, ak gagoaneasa fukghayi iiy niny,

⁴ nea Aseetta gamuuwwu aba gwadeagwajeega ea ng'asheega haloodi ea deamdeamanga saang'a, ea gidaguh Gurorooda Ghaydit ak gwalakkuuneasa aba gidagassiida niny.

Siida adoabiiweasa ea eanyasa lealeanooda

⁵ Aba gideaba Aseetta moadawa malaykajeega ng'eanyiida jea ghwahidu, was dea sibalooli.

⁶ Iiduw ea sittaajiit aba hich gideaba, “Siida neada ea naaha gil ea apkaada ghana balleanda siida, ea eeyi bwak ea ng'uulla?

⁷ Ginung' ghoaw siida mwanang' aba gheadi nuwaas ea ghwalaabwa hoowa malaykajeega, ak gishshuubi shiipka gigheambiitta ea mureeda,

⁸ ak ghwayiin haleanjeessean hing'eadayda geeshangaaschi.” Hean nea niyiin haleanjeessean hing'eadayda baneaguukka geeshangaaschi ak gagadiyeesa niny, ea manung'usiina gil bwadaw aba heeda ahaaghwa. Eara gwasa, miyeadaaha haleanjeessean nea gagadiyeesa niny.

⁹ Iiduw geedaayi Yeesu, dea aba gheadi nuwaas geanung' ghamwanng'iit ea ghwalaabwa hoowa malaykajeega, nea siyiin uhuuda gigheambiitta ea mureeda aba sawanadeeda ea miyeeda, ak abeeda aba dagheerjeandumeeda Aseetta abeeda gwasamu miyeeda aba giliwas sih.

¹⁰ Aba gideaba ghwahit aba headaannyi, niny ea aba heeda dea ghayi abiideewa haleanjeessean, ak gweadu balloojiga sean heeda gigheambiitta ak ghoaw gidamadeeda jea gagadiyeatta bea lealeanoodean aba sawanadeeda.

¹¹ Aba gideaba dea ammiidu ea gea simmiidu gwaleabu sean hijagi. Ak ghoaw gidamwabwaspwasana iguureewaneegwa fuga eaduupcheewi,

¹² nea gwayi, “Gaydarukusa gheawungaagu fuga eaduupcheewi, appugusta fuga bwat geat gaydaduumseey.”

¹³ Nea gichcha, “Gaydayiin masaweegeasu heeda Aseetta.” Nea gichcha, “Aniini geandi hiji, ak ea nigoonan Aseetta diibiga.”

¹⁴ Gwasnu eara diibiga gaguuyi saseeda ea foojeanda, gwasnu eara niny gwandeawa saseeda uurji nii, ak aba naweeda miyeeda abeeda ghwadattas diitta mideawa uurda miyeedean, nea meang'nyeandeenda,

¹⁵ abeeda gwalealu fukka sean mida jeeda gheawalmeeda miyeedean goobiida jeeda eaweega geawwi bea soomjeandumeeda.

¹⁶ Ak ea daach gideaba mwaweada malaykajeega niny ghaweat jeatta Abrahaamu.

¹⁷ Asi gajeenung' gawuurji sea fuga duupchi aba gheatkweakka sean, ak abeeda ghoaw siida bayyiida buuneeda ea dea doabiiwaat was ashoohoochcheanda haw bea gadiyeeda Aseetta, ak gaygohuun ring'eeda buuneeda.

¹⁸ Aba gideaba niny ghayi gwasawana nea geesimsim, niny ghoammu ghaweat fukka sisimsimiin.