Ditto 3 - NEAJEEDA EESH BEA BUUNEESSEAN

Searoojiga fuga Gristo

¹ Apkeassiina saawa gweada geat ng'eanyi aba heeda fuga ahaaghwa ng'eanyiida ea gea mideawa gheambalmeeda, ak gwasissa mureeda, nea hidaat aba gilinyoo ea gadiyeeda miy gil,

² adagoong'eawi siida wassean, amulsiina jaliida, ahuuwa emoojiga miyaas, nea ghoahiimu garbabanda sean aba heeda buuneessean.

³ Aba gideaba ghayi ammwadi geewoschi dasheahi, ak ea meendeawani mureeda ak geewoschi roodanga, ea ging'ng'oonyanga aba miyeenooda muunda ng'eanyiida, nea geeppiidi jeeda ng'asheega munyas, ea lajoodeaba ghuut, nea ghwasteagwa buuneeda nea goostayi geat agooga;

⁴ Ak miyinda ea bariinyeega Aseetta was lealnoochcheandeanya geattajiit,

⁵ hean gwalealneasa, ea meabaysiinana sinaweagaasa doobiiweadi sisinnyi aseasa niny gwalealneasa ak geejilneasa niba iyyeenya ak ghwanung' eahuuwa fuga eashish aba Gurorooda Ghaydit,

⁶ nea gagoaneasa nea gooheedu aba naweeda Yeesu Gristoyda was lealnoochcheandeanya,

⁷ ak abeeda gegoaneasa doobiiwnatta aba dagheerjeandumeedaannyi ak geararji hearanda eaweega manda muudeanooda.

⁸ Ng'asheanji earguun huumwa gil. Ak geagasayi rukta ng'asheesu nea giimajeegi, aba gideaba fukka mwas Aseettean goobiida jeeda sinooda ng'asheega miyaas; nea suuh ea miyaas nea ghwadoabiiw aba heeda buuneeda.

⁹ Ak giing'aami geaw ng'asheega jaleadinga, ea ng'asheega suroaproabwaada, ea foolayda ea sheang'nyeeda appadayda deaweeda, aba gideaba mayghwaloat gil ak ea mwahida.

¹⁰ Asi siida foolayda iinireekusi dea madeeda ghana deabiyyeenya, adagudismi eara gil,

¹¹ ak ginali gideaba siida uurji nii niramwas, aba gideaba gwasin ring'eeda, ea niirgweaksa geaw.

Ng'asheega huydean bea gichchea eabeada

¹² Iiduw iyeajeagu heedaang'u Attema ea Digiko, abeeda gisni badiida hinni heedeanyu ng'eanyiida Nigopoli, aba gideaba neabaday gideaba gaydeaksa hoowa meahooda.

¹³ Sina badiida aba bareannyeekka Seena, was diinagiida ea Appolo aba buweanooda nyaawa; ng'ulla adaghoashoanya gil.

¹⁴ Ak eara fugaasa saawa gamiisa gideaba ghoanaal geat gibinda jeeda sinooda ng'asheega miyaas, ak gwasissin ng'asheega gasa ealamwach sinooda, ak ea mawosa gea manda haghweega.

¹⁵ Ghoaghannyi fuga sean eandeawi. Aghada gikka bwariinyeasa aba naweeda masaweegean. Gagasa anyasa dagheerjeandumeeda oagasean.