Ditto 2 - NEAJEEDA EESH BEA BUUNEESSEAN

Ginealshooda huumwa

¹ Asi ang'iing'i anaala ng'asheega miisa ginealshooda huumwa.

² Fuga hees gagasa gwandeawa gheadeenda, miina gheanyanga buuneeda, mideawa fughareenga, mideawa masaweega huumwa, mideawa bariinyeega huumwa ea majeeknatta.

³ Ak eara gadeemga woosi gamiisa ea fuga sinniisa geat mureeda gil, nea adagwanaba ng'uyyeega, ghana leeyeanda, gamiisa gideaba gaygoonealli ng'asheega miyaas,

⁴ ak gayghoanaal gadeemga manang'i gichchea, ghabwariiy siyeenatka ea diibiga nyaawa,

⁵ nea gwandeawa fughareeda, ak ea miyaas, nea goobiida gealga nyaawa, nea innya jih, nea gwasisa siyeenatka nyaawa mureeda, aba gideaba ea meeng'ng'eawa ng'asheega Aseetta.

⁶ Ak gireekusi eara gheareemanga gwandeawa gheadeenda.

⁷ Ahiimda geaw aba mureeda sean eadaa ormeeda gadiyoojiga miyaas, nea aba ginealshoodaang'u gihiimu seareeda miy, ea gideeneadayda,

⁸ nea ng'asheega sirgu bea huumwa ea meeyeatteena ghuussi, ak abeeda siitta heawaan ghabwaspwas, aba ng'asheanda muy jea gwarukuna badahuukkaasa.

⁹ Ging'ng'oonyanga gamiisa gideaba gaygwasiisa meanang'oodiga nyaawa mureeda, nea gahaguwsa aba halanjeesean, ak adagwasheaha ng'asheega,

¹⁰ ak ea adagwajagwadiisachchi, gahaguuw gideaba gayghoahiimu dobiiwnatta huumwa, ak abeeda aba haleanjeessean ghwanyas ginealshooda Aseetta was lealnoochcheandeanya.

¹¹ Aba gideaba dagheerjeandumeeda Aseetta lealu buuneessean sittaajiiti,

¹² ak ghoanaaleasa eeheawana ng'asheega maba diini ea geawunda gheang'da, mideawa gheadeenda, ea doobiiwnatta, ea eaweeda miyaas sea Aseetta aba jeedeaba ng'eanyiini,

¹³ nea geammuughu ghusooda mideawa ghawooda ea gidaheachta gigheambitta Aseetta haw ea lealnoochcheandeanya was Yeesu Gristo,

¹⁴ nea niny ghoadayda geaw appadahuukkaasa ak ghaweadaneasa ng'asheega munyas sean ak ghoammiidu fuga jea ghoaw gaaschi nea gamilmiliidi aba sinooda ng'asheega miyaas.

¹⁵ Ruksiina buuneeda ng'asheesu, reeksiina nea giiwoowsi aba gheambalmeeda indeawi sean. Ak ea adiidu gafoolnyi siida.