2 Goriinto 3 - NEAJEEDA EESH BEA BUUNEESSEAN

Soomjooga Neajeedeesh

¹ Asi sing'ng'eachchi giding'noodeaba geat gichcha? Ghana sigasayi gidagassiida buuneeda suurja barawajeega gwarsiinda jea ghapka heedeang'wa, ghana gwaleabu heedeang'wa?

² Agooga gowoschi barawajeandeanya bea gwarsiinda, sing'oorsa jeesinga guroruunatkeagwa, biissa analaat nea ghoassoamwa buuneessean;

³ ak ghoahhiimu gideaba gowoschi barawajeanda leabu heeda Gristo sugoaneasa aseasa, meang'waarana galaamu geang'waara Gurorooda Aseetta majeek, ak ea mii badahuukka lagheanga gil geeng'oorsa badahuukka guroruunatka hang'oonyi bea buuneeda.

⁴ Nea geendeawi masaweega aba madeeda Aseetta aba naweeda Gristo.

⁵ Mii gideaba geahhiichchi geat aseasa gil aba gipkeatta ng'asheanda wassean gideaba gwaleabu heedeanya aseasa; hidoodeanyu gwaleabu heeda Aseetta,

⁶ aba gideaba niny dea nung' eammuusa eahuwa fuga gadiyeesa neajeedeesh, meng'oorsiina jeeda barawajeanda geang'waar aba jeeda Gurorooda; aba gideaba gissung'waar was deaweeda gaygwanuus, nea Gurorooda gagoona eaweega.

⁷ Asi ghamneawa deaweedeeda miyeeda, iissa ghafnya geaw jeeda barawajeega lagheanga, ghwaan nea gweadu gigheambiitta ak abeeda ea mang'ulla fuga Israeeli gheamamda Muusa aba gidameang'meang'da, amaduw ghwasuunya aba giduurji,

⁸ abeeda deaweedeeda Gurorooda ea majeefurda ak ea majeadeapta aba giigheambiitta hawi?

⁹ Nea iimida gigheambiitta jeeda deaweeda jea gweadu girgweaksiinda, abeeda deaweedeeda doobiiwnatta gagasa ghang'atta aba gigheambiitta.

¹⁰ Aba huumwa, appadaydeaba ng'asheesu, gidaghayi mideawa gigheambiitta ea mudugwandeawa gigheambiitta earahay, nea gweagu gigheambiitida adaraamiin.

¹¹ Nea gitta suunyaan iyeadu gigheambiitta, abeeda gidajea ghwashng'u gaygwandeawa gigheambiitta haw muuchchi.

¹² Ak iinukwa gendeawi rarooda, ng'asheanda uurjunu, ada abeeda gewoschi muranga,

¹³ nea mewuurjeewani Muusayda ghayi dukuta gheamamdaannyi ak abeeda ea mwadaaha muuchchi fuga Israeeli mudeanoodeaba gigheambiittida suunyaan.

¹⁴ Iiduw fugheerga nyaawa geanung' gahang'oonyiidi; aba gideaba eara askweareani damanda sissoamwana neajeedeaba garayi, gili sikkwealliisa uhuudean gudugwanda heeda, geaghus egeanda iguuyi siida sea Gristo.

¹⁵ Eah eara askweareani isissoamwa deaweedeeda Muusa geedukuta fugheerga nyaawa;

¹⁶ nea siida iiyamsa geaw Ng'uttamiida hean geegeanda gitta awiimiin.

¹⁷ Asi ghamneawa Ng'uttamiida Gurorooda, nea heeda mida Gurorooda Ng'uttamiida, gwanda giibaldeaba geaw.

¹⁸ Hean aseasa eesasean, aba gheamamda meedukuta, ng'ulla gigheambiitta Ng'uttamiida, siyam gawuurji sea niny ghang'eada gigheambiitta ea gagul gigheambiitta; aba gideaba ng'asheanji gwaleabu heeda Ng'uttamiida was Gurorooda.