2 Goriinto 2 - NEAJEEDA EESH BEA BUUNEESSEAN

¹ Asi geatteemsheesi geaw aba fughareedeanyu ak ea meanneegwa wunoodeanyu jea dabareasseegwa sawanadeeda.

² Aba gideaba iyaang'udaneegwa giseaneega, abeeda gajeang'eaha siida jea gohoosanan aniini ii mii siitta anung' gagiisaniini?

³ Ak ghang'waarji gawuurji gideasindi, ak abeeda iyaawunnyi ea measawanani aba heedeaba fukka ghwanyawa jea ghwanung' dahoosaniin. Aba gideaba ghadaayi aba huumwa aba jeedeang'wa oagasean, gideaba hooseaneegeasu gajea hooseaneegeagwa gil oagasean.

⁴ Aba gideaba geang'oorneegwa ng'asheesu nea geandeawi sawanadeeda haw ea hang'weaniidooda aba jeeda gurorooda nea geabeayi dabeakka saang'a, nea mii gideaba geagasayi asawanana gili, geagasayi anala bariinyeegeasu eandeawi appadahuukkeagwa gitteenna aba hawunda.

Samsiinda siida adiiy

⁵ Ama deeppa ea ninung' sih ghwanyas nuut sawanadeeda, ea meagealna heedeanyu aniini, nea aba haleanjeeda mwaatkwa sitteenniida ea adinung' ghang'waaniit aba heedeang'wa oagasean.

⁶ Siida sunu ghoahiit ghoorjooda ghayi adaw fuga saang'a;

⁷ hean ghang'wana giyami geaw ak gisamsi nea gigeandeawi salgheang'da, ghana gajiiduw ghwajoar giseaneega ng'waan muuchchi.

⁸ Ak geamuscheegwa gideaba ohhimsiina nea goommajeekchi bariinyeegeagwa aba headaannyi.

⁹ Nii gideang'oorsi barawajeanji gil, gideaba geagasayi dasin danal ea goosissi mureeda ng'asheega sean.

¹⁰ Siida wassean oosamsi, earaniini gaydasamsa. Gidaneasamsi, ama deeppa eaneasamsi gidawassean, nii gweagu badahuukkeagwa aba madeeda Gristo,

¹¹ adaghwanyas Shattaani gheatta jea ghwanyagaadawa appadahuukkaasa; aba gideaba meewosi dasheahi aba gitta gasean.

Hirbabandaa Baulo aba Droa

¹² Hean nea ghahitti Droa darukkwiida giijasta miy bea Gristo, ghwajaada gidaghuut aba heedeanyu aba heeda Ng'uttamiida;

¹³ ak ghanyea moapta ng'eanyi fughareedeanyu aba gideaba mwadaahi orjeediyya was Ditto aba hoowa. Ng'atta geegasayi fuufta appadahuukka nyaawa ak geawi ng'eanyiida Makkedoniya.

Joriischooda aba naweeda Gristo

¹⁴ Asi badiischeesiinda gammiisa Aseetta, nea ghoadoabiiweasa aba naweeda Gristo aba hooseaneega, ak aba aseasa ghwadarda shearooda ng'andit bea fughareadaannyi aba hiji wassean.

¹⁵ Aba gideaba aseasa geewoschi shearooda ng'andit bea Gristo aba madeeda Aseetta, aba heeda fuga lalaan ea heeda fuga nirooda,

¹⁶ aba hichpa sih shearooda ng'andit gil ng'eada miyeeda ea ghwahitta miyeeda, aba hichpa sih nuut ea shearooda ng'andit ng'eada eaweega ea ghwahitta eaweega. Siida nilang'uuda ng'asheesu ng'eaha?

¹⁷ Aba gideaba aseasa meewuurjeewani buuneeda suurja saang'a, fuga sheahhiida ng'asheanda Aseetta; gagasa ewuurjeewana fuga mideawa doobiiwnatta, was fuga adaw Aseetta gadiyeeda, aba madeeda Aseetta iissa geebaloolli appadayda Gristo.