1 Goriinto 8 - NEAJEEDA EESH BEA BUUNEESSEAN

Iitta Hamichchoojiga siittaw haleanjeeda mawosa Aseetta

¹ Asi ghamneawa aba iitta hamichchoojiga siittaw haleanjeeda mawosa Aseetta; geanalli gideaba “Aseasa easasean gendeawi fughareeda.” Fughareeda iissa ghaghwar geaw, nea bariinyeega iissa gwadeegu.

² Siida iighay gili nal ng'asheanda, siisi mwanala eara gil eara ghamneawa, mwanalda gidagwachchi haguuw ghwanalda.

³ Nea siida iibwariiy Aseetta, abeeda siisi ghwanal Aseetta.

⁴ Hean aba iitta agitta hamitta siittaw haleanjeeda mawosa aseetta, geanalli gideaba, “Gidamawosa aseetta mayghwashng'u,” ea gideaba manda Aseetta nuut geaghus akkalealla.

⁵ Earappeadi mida fuga suguura aseechcheekka, aba humng'eeda ghana ng'eanyiida, aba huumwa gwanda “aseechcheekka” saang'a ea “ng'uttamooji” saang'a,

⁶ iiduu aba heedeanya aseasa Aseetta aakkalealla, was Ghweanda, was deaghayi leabu haleanjeessean, ak geepiideewi bwadaydaannyi ak gabiissa gwanda Ng'uttamiinagi, was Yeesu Gristo, ghayi rinna haleanjeessean badaydeaba niny, nea eara aseasa geepiideewi niny.

⁷ Eara gwasa, mii sean gil gea mideawa fughareani. Geaghus suuh ng'ay, aba gideaba nineaji haleanjeeda mawosa aseetta, nea fughareenga nyaawa, ng'arng'ari, ea sung'uda ririnnyeanda.

⁸ Nea hamitta ghanyea maygagwarseasa aba heeda Aseetta. Iisunung'waadi agitta amwasunyeawaneasa gil, ama siyaaji ea maygooheadeeseasa gil.

⁹ Asi ashageada giibali itteang'wa bwaageadiin adiiduu gwaruusa fukka ng'arng'ariin.

¹⁰ Aba gideaba siida idaannyi, ang'iing'eeda mideawa fughareeda, nea gipteadi ak giyeagiischi aba jeeda gheeda sibatta haleanjeeda mawosa Aseetta, neada ea majiiduu gwayeessa jihi, iing'arng'ar fughareedaannyi, ak ghwaak hamitta siittaw maloonghajeega?

¹¹ Nea aba fughareadaang'u genuus siida ng'arng'ar, was oorjeeda giyeang'wa ghayi meah Gristo appadaydaannyi.

¹² Asi iyoonung gwasin fuga oduupcheewi riing'eeda nea gookkachchi fugheerga nyaawa nea ng'arng'ari, abeeda ea nootiiysi Gristo.

¹³ Asi, hamitta ijea ghoaw gichchea ghabwaay oorjeediyya, abeeda ea may guttaak bannyeega, ak abeeda amwabwaanyi oorjeediyya.