1 Goriinto 5 - NEAJEEDA EESH BEA BUUNEESSEAN

Fuga munyas searooji aba jeeda ganiisa

¹ Gwanda iitta huumwa nighayda bea gideaba jeedeang'wa gwanda fuga mideawa searoojiga munyas, ak gabiissa ea muy ea manda earaba jeeda Emoojiga; bea gideaba iissa siida gwalluudayi gatmooda ghwaan.

² Ak ghoaghwarji geat! Gwachchi mang'wana gogiisannyi? Siida nisin ng'asheanji oang'ng'aamwana jeedeang'wa.

³ Nea earappeadi meandani aba saseeda geandi aba guroorooda, ama uurji gileandi, abeeda ea meargu girgweaksiinda

⁴ aba gheawunga Ng'uttamiida was Yeesu nang'aatti girgweaksiinda siida sin ng'asheanda muy sunuun. Hean nea ghoabwachchi geat, abeeda eara gurooroodeanyu gaygwanda hiji, sea uurda Ng'uttamiideanya was Yeesu,

⁵ ak geattaw Shattaani siisi ak ghwanyas saseadaannyi lasooda, ak abeeda gelealu gurooroadaannyi aba eaweeda Ng'uttamiida was Yeesu.

⁶ Ghwaroodeang'wa bwaageat miimiy. Moanali gideaba gidamwanang mwattaw ghoammu ghoamwattawiit murmurjeanda seani?

⁷ Asi ageanda mattawandeaba garayi ak abeeda ghoahuuyi murmurjeanda eesh, ak ea huumwa gil miyeammwattawiideegwa. Aba gideaba Gristo, was dayeenda gisilleanda bea basakka, ning'atta giidaydeayda.

⁸ Asi esna ghweelmeeda, nea mii dea mattawanda ghayi bea garayi was mattawanda bwada geawunda gheang'da ea munyinda, gagasa gaba mukkatteyda meammwattawiida, nii weeshinda jeeda gil ea huumwa.

⁹ Geang'oorneegwa aba barawajeanji itteanyuun, gideaba adooguuyeewi fuga mealuuli;

¹⁰ meayeeshshiineegwa eara hay gideaba adooguuyeewi fuga munyas bea jeedeaba ng'eanyiini, ghana fuga geawwi ghaanyan, ea fuga areedi buuneeda haleanjeeda, ghana fuga bada gidamawosa Aseetta, abeeda gwachchi gajea gideaba gagasa ang'amwana jeeda ng'eanyiida gil.

¹¹ Ak geang'oorneegwa gideaba adoobareannyeewi siida was oorjeeda suguura dea giyeang'wa, iyaadiiy ghana gwaseeja haleanjeeda, ghana ea siida bada haleanjeeda mawosa Aseetta, ghana ea siida ang'eawi buuneeda gil, ghanea siida boogidi, ghana ea siida areedi buuneeda haleanjeeda, siissunu adoamwaschi eara gideaba gajoombucheewana.

¹² Abeeda gaygwarachchi naaha iyeargweaksi fuga jarooda? Nea ea mii fukka mida jeeda ganiisaan gil gea jea argweaksiina.

¹³ Aseetta gaygoorgweaksa fuga mida jarooda. “Ak ghahoan fuga munyas aba jeedeang'wa.”