1 Goriinto 4 - NEAJEEDA EESH BEA BUUNEESSEAN

Giijasoodiga Gristo

¹ Nii gidagasa ghwadaaktaneasa siida gil, gideaba geewooschi soomjooga Gristo ea fuga siitteaga gadiyeeda funyaat bea Aseetta.

² Nea gissigasa aba heeda fuga siitteaga gadiyeeda doobiiwnatta gil.

³ Nea aba heedeanyu nii ea ng'asheanda mwanang' gil gideaba goorgweaksean agooga ghana girgweageeda wassean bea buuneeda. Ak aniini ea mii deargweaksa geaw.

⁴ Aba gideaba aniini mwaanali gidawassean appadaydeanyu, ak ghanyea meesiksean. Ng'uttamiida dea jea goorgweakseani.

⁵ Asi iissa ea adoorgweaksi ng'asheanda nea miighwahitta damanda nea miighwahidu Ng'uttamiida. Jea ghoabwaay haleanjeeda funyaat mida jeeda misaneeda, ak ghoadahaach ng'asheega mida jeeda guroorooda. Abeeda giliwas sih gay ghwanyas gwarsiinda aba heeda Aseetta.

⁶ Ak geamuschi haleanjeani seaniin sea Appolo ak abeeda ghoanyagaadi, fuga eaduupcheewi, ak abeeda ghoanaalaneasa ea moannaawani gitta ghayi sung'waariin, ak abeeda ea mwaghwara geaw sih aba jeedeang'wa aba giduuksiideaba geaw bea siinuut.

⁷ Ghwadaah ng'eaha gidawassean sajaadawaat aba jeedeang'wa? Ak gondeawi naaha ghayi moanyasi? Ama ghayi oanyaschi, ghwasaan inyas ghoaghwarji geat ea gawuurji gili megooneegwa?

⁸ Asi nihit noolang'uuchchi! Asi nihit noobaruurji! Nea iimeendani ea noahuuyi sugoodiga! Nea appadaydeaba nii ea noombaliischi, ak abeeda geeguuyi gheambalmeeda sea agooga!

⁹ Aba gideaba naapkaachchi gideaba Aseetta ghayi gwasneasa aseasa giijasoodiga eahuuwa fuga huydeana sean, ewuurjeewana fuga sirgweaksiina miyeeda; aba gideaba suhuuyi meagheang'da aba ng'eanyiida, ea aba heeda malaykajeega ea heeda buuneeda.

¹⁰ Aseasa geewooschi dasheahi appadayda Gristo, amaduu agooga goondeawi weaghuumeeda appadayda Gristo. Aseasa geewooschi ng'arng'ar, nea agooga goondeawi uurda. Agooga geesinneegwa mureeda, nea aseasa ghanyea meesinneasa mureeda.

¹¹ Aba damani bea ghamneawean geebearjeewi jalooda ea muwooshta, ak ea mekkwealsheeni muuchchi, geabwareasa, ak ea meendeawani gealga,

¹² geebiissi edeawiida nea geesinnyi gadiyeeda aba geattingaasa. Iisingng'eaweasa geebadiischeesi, iisibwareasa gearjeang'di.

¹³ Iisibeasheagwa googasayi duupcheeda; sunung eahuuwa haleanjeeda mwadaagha aba jeeda ng'eanyiida, nea geewooschi haleanjeeda mwadaagha aba haleanjeessean.

¹⁴ Ng'asheesu mwaang'waari nea geegasayi dabwaspwaseegwa, geabaysiini miinda gheang'deang'wa nea geahindaneegwa diibiga abwariinnyi.

¹⁵ Aba gideaba earappeadi ondeawi ginealshoodiga manda moonneeda aba jeeda Gristo, ea moondeawani ghweaniga saang'a. Aba gideaba aniini naahuuyi ghweandeang'wa aba jeeda Gristo Yeesu aba naweeda giijasta miy.

¹⁶ Asi geamuscheegwa, ayeanni geeshteanyu.

¹⁷ Hean ghoaw gideajeakni Dimotteo heedeang'wa, was jeepteanyu abwariinnyi, biissa adoabiiwaat aba jeeda Ng'uttamiida, jea goopkeaneegwa naweadingeasu aba jeeda Gristo, ak gawuurji gideanealshacheatti aba ng'eanyiissean aba jeesinga ganiisajeega sean.

¹⁸ Asi buuneeda mwaatkwa nung'ut ghwarjeeda nea ghaghay gilimaydoan heedeang'wa.

¹⁹ Nea gaydabay doan heedeang'wa iimwas Ng'uttamiida, ak ea mwajeaghu gideaba gaydasikteawa ng'asheega fuga ghwarjeeda gaydasikteawa eara uurjeenga nyaawa.

²⁰ Aba gideaba sugoochcheandumeeda Aseetta manda jeeda baloolda, gwanda jeeda uurda.

²¹ Ghoabwariinyi anneeda? Gaydoan heedeang'wa nea geayeadu bileangida, ghana jea doana bariinyeega ea guroorooda garbabu?