1 Goriinto 2 - NEAJEEDA EESH BEA BUUNEESSEAN

Giijasta badayda Yeesuuyda ghayi singoor

¹ Hean iyaawunnyi heedeang'wa, fuga eaduupcheewi, mwaawuuni darukuneegwa muuwwuunooda Aseetta aba ghwarjeeda ghana aba weaghuumeeda.

² Aba gideaba aniini meagassi danal ng'asheanda wassean aba jeedeang'wa geaghus Yeesu Gristo, dea ghayi singoor.

³ Nea aniini ghayi gendeayi nea geawoschi ng'arng'ar ea muuwda sea hirbabandeeda;

⁴ nea girgweageedeanyu ea giijasteanyu ghanyea maba ng'asheega gurguriischooda bea weaghuumeeda, gagadiiyi Guroorooda aba uurda,

⁵ ak abeeda masaweegeagwa ea mabeachchi weaghuumeeda buuneeda, gagasa gwaleabu uurda Aseetta.

Weaghumeeda Aseetta

⁶ Nea jeeda fuga nihittiisa heeda aba masaweega ginaali weaghuumeeda, earappeadi mii weaghuumeedeaba damani ghana dea fuga ambaliischi aba damani, was gea jea gammuudean gil.

⁷ Ak geergu makcheameetta ea weaghuumeetta funyaat bea Aseettean, ghayi nung' Aseetta ghoaw digheanda ammwadi aba gigheambiitteanyean.

⁸ Ea manda aba jeeda fuga ambaliischi aba damani dea nal ng'asheanji; aba gideaba inyeeda heetta ghwanal, abeeda ea maygongoor Ng'uttamiida ghambiidaat.

⁹ gawuurji gissung'waarda, “Haleanjeeda manda gheang'da nidaa, ghana iitta niyiiy, ghana ghoapkaat guroorooda siida, haleanjeeda nigeawiit gwasissin Aseetta appadahuukka fuga bwariiy niny.”

¹⁰ Aseetta niihiimneasa aseasa aba naweeda Guroorooda. Aba gideaba Guroorooda iissa ghwanal haleanjeessean, eara haleanjeeda mida jeeda Aseetta.

¹¹ Nii gajea ana sihi jea ghwanal fughareemba sih nuut iimeakghusa guroorootta mida jeessiidean? Gwasnu manda siida ammu ghwanal fughareeda Aseetta geaghus Guroorooda Aseetta.

¹² Aseasa meanyasi guroorooda ng'eanyiida, geanyaschi guroorooda leabu heeda Aseetta, ak abeeda geenalli gidagoaneasa Aseetta aba innyeanda jeeda.

¹³ Ak geerukkwiidi gili aba ng'asheega maleapna weaghuumeeda anaal fii siida geaghus dea anaal fii Guroorooda, ak gwaroobu humeanda guroorooda aba heeda fuga mideawa Guroorooda.

¹⁴ Siida maba guroorooda mayghwanyas gida jea ghoadaw Guroorooda Aseetta, aba gideaba aba headaannyi lendeeda gil, ak ea mayghwanal aba gideaba geaghus eanal aba jeeda guroorooda.

¹⁵ Siida guroorooda iissa goorgweaksa haleanjeessean, nea niny ghanyea manda siida jea goorgweaksa.

¹⁶ “Aba gideaba, siida nal fughareeda Ng'uttamiida ng'eaha, ak abeeda ghoanaal?” Duukku aseasa gendeawi fughareeda Gristo.