1 Goriinto 16 - NEAJEEDA EESH BEA BUUNEESSEAN

Gujaweeda jea ghaweat fuga mideawa masaweega

¹ Aba iitta gujaweeda jea ghaweat fuga mideawa masaweega ghaydidi, aba gidaghayi earukusiindi ganiisajeega Galattiya, earagooga asindunu.

² Eaweetta madeeda aba eawooji ispwa aba jeedeang'wa daba siisi adiing'da gil deenna gidamideawa, ak ea mowweamsheeni iyahiidu.

³ Damanda jea dahinna, gaydeajeakta fuga jea ageanni ghwaat barawajeanda ea haleanjeeda oattaydi ak ghwaat gujaweedeang'wa ea ghoahiitta Yerusalmeemu.

⁴ Nea abeeda idoabiiw gideaba gaydeadeayi aniini, abeeda gaydeadeayi sea saawa.

Badiida Baulo

⁵ Asi gaydabareasseegwa agooga iing'atta beatta ng'eanyiida Makkedooniya, aba gideaba geagasayi dasku jeeda ng'eanyiida Makkedooniya,

⁶ ak gwadeeppa deabiida heedeang'wa ghana deabiida damanda goorogeeda, ak abeeda ghoammuuschi aweadaan dalamwajaada aba bareannyeekkeasu, aba heeda eagasayi dawa.

⁷ Aba gideaba meagassi dagoonneegwa ghamneawa nea ghaang'atti; aba gideaba ghararji deabiida ng'eang'deang'wa gilinuwaas, iimwas Ng'uttamiida.

⁸ Ak gayghanyi deabiida ng'eanyiida Efeeso ea ghwahitta damanda ghweelmeeda Bendegoosti,

⁹ aba gideaba nijaada gidaghuut muuchchi aba gadiyeedeanyu aba hiji, earappeadi saang'a weajoodiga.

¹⁰ Eaweeda hinna Dimotteo, goong'ulayi goobiida heedeang'wa nea mwabeada, aba gideaba gwasin gadiyeeda Ng'uttamiida gawuurji gideasindi aniini.

¹¹ Asi adagafool sih niny. Anung' ghwalamwajaada aba bareannyeekkaaschi nea ghabeawa hoyyoo, ak abeeda gabiigu heedeanyu; aba gideaba ghamuughu niny sea fuga eaduupcheewi.

¹² Iiduu aba iitta Appoloyda was oorjeediyya, geamuschi muuchchi gabareasseegwa sea fuga eaduupcheewi, nea niny iinyas gheatta gayghwan.

Ng'asheega huydean

¹³ Oang'ng'wearni, nea ghoamiinaadi muuchchi aba jeeda masaweegeagwa, adarusiitta nea ghoanyaschi uurda.

¹⁴ Ng'asheegeagwa sean iyoosinnyi asna aba bariinyeega.

¹⁵ Asi ghamneawa, fuga eaduupcheewi, agooga ghoanalli gideaba gheah Stefaano fuga madeeda gil asheeda gwayamu geat aba ng'eanyiida Akkayahi, ak ea niidayda geat aba gadiyeesiinda fuga ghaydidi;

¹⁶ geamuscheegwa asissiina mureeda fuga sunu ea heeda siida wassean sin gadiyeeda ea fuga deawiit.

¹⁷ Ak geahoosannyi aba gideaba nihidu geaba Stefaano ea Fotunatto ea Akaiko, aba gideaba fiisu nidukuta seawadeeda ashoay iimoondani agooga;

¹⁸ aba gideaba ninung' ghahawda guroroodeanyu ea guroruunatkeagwa. Asi anala muuchchi fuga sunu.

¹⁹ Ghoaghadeagwa ganiisajeega mida Asiya. Akkila sea Briska, sea ganiiseeda mida jeeda gheannyaawa.

²⁰ Ghoaghadeagwa fuga siduupcheewi sean. Oakghada geat aba samooda ghaydit.

²¹ Aniini Baulo gil, ak geang'oorneegwa giighadi aba geattindeanyu aniini.

²² Siida wassean mwabwariinya Ng'uttamiida, gagasa eamwaashta. Ng'uttamiideanya ghwaan!

²³ Dagheerjeandumeeda Ng'uttamiida was Yeesu gagasa andeawana.

²⁴ Gagasa andeawana bariinyeegeasu oagasean aba jeeda Gristo Yeesu. Amin.