1 Goriinto 12 - NEAJEEDA EESH BEA BUUNEESSEAN

Gidagu Guroorooda Ghaydit

¹ Fuga eaduupcheewi, asi ghamneawa aba iitta haleanjeeda sugu bea guroorooda, aniini meagassi amoanali.

² Ak ghoanalli gideaba damanda ghayi owoseewi fuga mandeawana masaweega, geehutteawweegwa ak ghoabwachchi haleanjeeda mawosa aseetta, ak earagwasa ghaghanyi sihheelleewaneegwa.

³ Asi geagasayi gideaba anala gideaba manda siida jea gabaloola badayda Gurorooda Aseetta jea gwayi, “Yeesu sumwaashta!” Ak ea manda siida jea gwayi, “Yeesu Ng'uttamiida gil,” geaghus gwargu Gurorooda Ghaydit.

⁴ Asi gwaheelli giimmuusta sugu, nea Gurorooda ea agi;

⁵ Ak gabiissa gwaheelli sinjeandinga gadiyeeda, nea Ng'uttamiida ea agi;

⁶ Iiduu gwaheelli uurda gadiyeeda, nea Aseetta ea akkalealla dea adoabiiw sean appadahuukka buuneessean.

⁷ Nea giliwas sih goohiimsa Aseetta Guroroadaannyi aba alooheeda buuneessean.

⁸ Aba gideaba siyagi aba Gurorooda geattaw gwarukku weaghuumeeda, nea geattaw nuut gwarukku ng'asheega aba fughareeda aba gidabwariiyda Gurorooda,

⁹ nuut geattaw masaweega aba Guroroodida, nea nuut geattaw giimmuusta jea ghoahaabwa buuneeda aba Gurorooda assagiin,

¹⁰ nea nuut geattaw gadiyeeda jea gwasna ng'asheega deamdeameedi, nea nuut geattaw sibaneandumeeda, nea nuut gooheeldooschi gurooruunatka, nuut heeluutka ghuusiga emoojiga, nea nuut geattaw rooppiideayda ghuusiga emoojiga.

¹¹ Nea gadiyoojusu seaniin gwasin akkalealla aba Gurorootta assakkaleallaan, ak gwalakkiisa giliwassih nea gabwageaw gawuurji gitta gassiida ninyiin.

Roobuutka asaang'a nea saseeda aagi

¹² Gawuurji gitta waseatta agi saseedean ak gabiissa gwandeawa damealga saang'aan, earappeadi damealga saang'aan gaba saseanagi, ak ea giduurji earaba heeda Gristohi.

¹³ Nea aba Guroroanagi geppaattiisaneasa aba saseanagi, fuga Yahuudi ghanea fuga Giriikki gili, ea ging'ng'oonyanga gil ghanea fuga abal geat gil, hean geanung' ghwaleayda sean Guroroanagi.

¹⁴ Aba gideaba saseeda mandeawana dameallanjagi gil asaang'a.

¹⁵ Iyayi geeshta, “Aniini meawosi geattinda, ak ea meabeahi saseeda,” nii mii gidamaygabeaheewa saseeda gil.

¹⁶ Ama ayi iitta, “Aniini meawosi gheang'da, ak ea meabeahi saseeda,” nii mii gidamaygabeaheewa saseeda gil.

¹⁷ Abeeda saseessean iihuuw gheang'da, abeeda iing'da gaygwanda yeenu? Amabeeda huuw saseessean iitta, abeeda gwandayeenu joonda gida?

¹⁸ Hean aba giduurji, Aseetta gageanu googuuyi giliwas roabwada mida saseeda, aba giliwas roabwada aba gidagassiida.

¹⁹ Ghwanyawa inyeeda ghoaw roobuutka sean roobwadeanagi, abeeda saseeda gaygwanda yeenu?

²⁰ Amaduu ghamneawa roobuutka asaang'a, amaduukku saseeda aagi.

²¹ Ak ea mayghoammu gheang'da gwayeeshsha geattinda, “Aniini meagasseey,” nea moammu gwayeeshsha uhuuda geeshanga, “Aniini meagasseegwa.”

²² Abeeda iisiyam, roobuutkiga bea saseeda sideaksa ng'arng'arannyeekkean gea sigasa muuchchi gil,

²³ nea roobuutkiga bea saseeda mahaguuwa mureedean gajeattawa mureeda haw muuchchi, nea roobuutkaasa manda leanga geanung' gwandeawa leanga muuchchi ea ghwanaawda.

²⁴ Aba gideaba roobuutkaasa mideawa alooheeda magassa gil. Nea Aseetta ghayi gwasin saseeda, ak ghoadaw mureeda muuchchi roobadeetta ashoayiin,

²⁵ ak abeeda ea dardaawaat saseeda, ak abeeda gang'ula geat roobuutka, gaba roobadeeni ng'ula nuut.

²⁶ Nea iisawana roobadeanagi, abeeda gwasawana roobuutka sean; nea iisisissa mureeda roobadeanagi, abeeda gahoosan sean.

²⁷ Asi noahuuyi saseeda Gristo nea gaba siisi was roabadeadaannyi.

²⁸ Nea Aseetta ea niloat giijasoodiga madeeda aba jeeda ganiisa, deaba iyyeenya sibanga, geaba samwagu ea ginealshoodiga, ea fuga sina ng'asheega deamdeameadi, ea fuga aheabi buuneeda, ea weedanga, ea fuga ambaliischi, ea fuga baloolla ghuusiga emoojiga mwaatkwa.

²⁹ Neada ea giijasoodiga seani? Neada ea sibanga seani? Neada ea ginealshoodiga seani? Ak gwasna sean ng'asheega deamdeameadi?

³⁰ Neada ea siittaw sean giheapta fuga miyeani? Neada gabaloolla sea iit muudi? Ak ghoammu sean rooppiideayda ng'asheega?

³¹ Asi agassa muuchchi haleanjeeda hees jea eegu. Ak gaydahiimneegwa naweeda miy muuchchi miyadaaha.