1 Goriinto 11 - NEAJEEDA EESH BEA BUUNEESSEAN

¹ Awuurjeewanean aniini, gawuurji gideabeaheatti Gristo.

Dukutteayda uhuuda damanda badooda Aseetta

² Asi ghaaghwarjeedwa aba gideaba noapkachchaan aba haleanjeessean ea gideaba noang'ng'waanyi searoojikka ghayi eagoonnyeegwean.

³ Ak geagasayi anala gideaba giliwas gatmooda ea ng'eedeeda Gristo gil, nea uhuuda gatmooda ea siyeadaannyi, nea uhuuda Gristo ea Aseetta.

⁴ Ng'eedeeda wassean moora Aseetta, ghana gwaramoorani ng'asheega nea gwadukuta uhuudaannyi, ghoabwaaspwaas uhuudaannyi,

⁵ nea gatmooda wassean mwaash Aseetta ghana gwaramoorani ng'asheega nea madukuta uhuudaannyi masissiina uhuudaannyi mureeda, abeeda gawuurji gili uhuudaannyi sireakghu.

⁶ Aba gideaba gatmooda ii madukuta uhuudaannyi, ghang'wana ghwareakghu budeagaaschi; amadeeppa gaba baspaseega gideaba gayghwalach gatmooda buudeagaaschi ghana eareakghu abeeda ghang'wana gwadukuta uhuudaannyi.

⁷ Aba gideaba ng'eedeeda mammiisiina gideaba gaygwadukuta uhuudaannyi, aba gideaba niny geegala sea gigheambiitta Aseetta; nea gatmooda ea gigheambiitta ng'eedeeda gil.

⁸ (Aba gideaba ng'eedeeda maleapna heeda gatmooda, gwaleabu gatmooda heeda ng'eedeeda.

⁹ Nea ng'eedeeda ea meesna appadayda gatmooda, nea gatmooda geesin appadayda ng'eedeeda.)

¹⁰ Nii gidasibaysiina gil gideaba gatmooda gagasa gwandeawa gichchea gwadukuteawa uhuudaannyi, appadahuukka malaykajeega.

¹¹ (Eara gwasa, aba heeda Ng'uttamiida asi gatmooda mii gili, ii manda ng'eedeeda nea ng'eedeeda ea mii gili ii manda gatmooda,

¹² aba gideaba gatmooda ghayi gwarinna heeda ng'eedeeda gwasnu eara ng'eedeeda ghamneawa gwajiilu gatmooda. Nea haleanjeessean gwaleabu heeda Aseetta.)

¹³ Asi asikteawana nea gobwageat; ghwadeabiiwi gideaba ghamwaash gatmooda Aseetta nea madukuta uhuuda?

¹⁴ neada geallaan ea moanaaleagwa gideaba ng'eedeeda ii mideawa buudeega geawwi ghoabwaaspwaas geaw,

¹⁵ Iiduu gatmooda ii mideawa buudeega geawwi gahaguuwsa? Aba gideaba geattaw budeega geawwi gwadukuta saseeda.

¹⁶ Amadeeppa gwanda siida gasa ghang'ut foolayda, ghanyea meanali seareeda nuut ghana eara ganiisajeega Aseetta.

Hamitta Ng'uttamiida

¹⁷ Asi aba goonidi eagoonnyeegwa ng'asheesu bea gichchea ebeedaan, mwaaghwareegwa, aba gideaba iyoabwachchi geat, moobatteeni geat alooheeda, goobatti geat munyinda.

¹⁸ Aba gideaba gidamadeeda, iyoroonnyi nea goowoschi ganiisa, anayiinyi gideaba gwanda jeedeang'wa dardeayda; ak hich ghaamwaschi,

¹⁹ aba gideaba jeedeang'wa ghaghanyi gwanda foolayda ak abeeda fuga sumwas aba heedeang'wean abeeda geanal.

²⁰ Asi iyoabwachchi geat, ea mwahida gideaba gajayaaga hamitta Ng'uttamiida.

²¹ Aba agiischooda, iissa gaba siisi geanda hamittaannyi, nea siyagi gabearji jalooda nea niirja ea boogideat.

²² Naaha! Neada ea moondeawani gealga jea ayeagiischeewana nea gooleeshi? Ghana ofoolli ganiiseeda Aseetta nea ghoanung ghabeal fuga mandeawana gil? Gaydayeeshshineegwaan? Gaydagwarseegwa aba ng'asheanji? Manda! Maydagwarseegwa.

²³ Aba gideaba ghaanyaschi aba heeda Ng'uttamiida gitta ghamneawa eagoonnyeegwa agoogean, nea Ng'uttamiida was Yeesuun eaweetta jea ealaabwa bwadawiin gageanu mukkatte,

²⁴ hean, iing'atta badiischeesiinda, ghabwanach, ak gwayi, “Nii saseedeanyu gil ghayi sibeagu appadahuukkeagwa, asindunu aba giipkeatteanyu.”

²⁵ Gwasnu iing'atta agiischoodeaba shing'ada gageanu bayookta ak gwayi, “Bayoogi neajeedeesh gil aba foojeandeanyu. Asindunu, iinyoo aleesheena, aba giipkeatteanyu.”

²⁶ Aba gideaba iyoayaaji mukkatteheeni nea ghoaleaydi bayoogi, goorukkwiidi miyeeda Ng'uttamiida ea ghwahitta eaweeda jea ghwahinna.

²⁷ Nea siida wassean, akk mukkatte ghana ghwalealeada bayookta Ng'uttamiida aba naweeda mwadoabiiwa, abeeda gaygwanyaksa geaw giidinyeanda ak ghang'uda saseeda ririnnyeanda ea foojeanda Ng'uttamiida.

²⁸ Nea siida ea dasikteawana geaw, ak ghwaak mukkatte ak ghwaleayda bayookta.

²⁹ Aba gideaba siida wassean akk nea ghwali nea masikteawana ghwaak nea ghwali ghoorjooda saseadaannyi.

³⁰ Nii gidaghamneawa nung' gang'arng'ariidi fuga saang'a aba jeedeang'wa gil nea gamnyeani, nea mwaatkwa ea nimeewa.

³¹ Ama inyeetta ghwanyawa gergweaksi geat huumwa, ghwanyawa ea majeergweakseasa.

³² Nea iyargweakseasa Ng'uttamiida, geanung' eanyasa mureeda ak abeeda ea mergweakseasa sea fuga muunda ng'eanyiida.

³³ Asi fuga eaduupcheewi, iyoabwachchi geat nea googasayi ayeagiischeena, ommuukkuuni geat,

³⁴ siida ibearji jalooda, ea deagiischi aba gheannyi, adiiduu gweadu nyeascheedeang'wa girgweaksiinda. Nea ng'asheega suurja iyaawunnyi gaydarukuneegwa.