1 Goriinto 10 - NEAJEEDA EESH BEA BUUNEESSEAN

Reekusiinda aba gidamawosa Aseetta

¹ Fuga eaduupcheewi, geagasayi anala gideaba, gheambaghwanigaasa ghayi gookkwa shamooghooda sean, ak ghoaghaawa sean basooda,

² amang'atta geeppattiisan sean ghoaw fuga Muusa aba jeeda shamooghooda ea jeeda basooda,

³ ama ng'atta ghwaak sean hamittida bea gurooroodean

⁴ ak ghwali sean beekka bea gurooroodean. Aba gideaba ghwaleaydaawa badayda lagheaneeda was guroorooda ghayi aat geeshta, nea lagheaneetta ea Gristohi.

⁵ Nea gwanda fuga saang'a aba jeennyaawa magassa Aseetta; ammuchchu gealas uhuuda aba dareapcheeda.

⁶ Asi ghamneawa ng'asheesu niiw reekusiinda aba heedeanya, ak abeeda ea meegassi ng'asheega munyas.

⁷ Nea adoowoschi fuga bada haleanjeeda mawosa Aseetta, ak goowuurjeewi giduurji fuga mwaatkwa; gawuurji gidaghayi sung'waar bea gideaba, “Buuneeda ghayi gobiitpiit gweagiischi nea gwaleeshi, ama ng'atta ghang'eatng'eat ghwaanghan.”

⁸ Nea adeemealuulli ak gewuurjeewi gidasiinda fuga mwaatkwa aba jeennyaawa, ak ghoabeeda fii sagalamnyooji diktam ea samwagu aweachchaanjagi.

⁹ Nea adaghanyi eesna Ng'uttamiida, ak geewuurjeewi gidaghayi simda fuga mwaatkwa aba jeannyaawa, ak ghwaak inchipkeega;

¹⁰ nea adoannikghti gidaghayi aniikghta fuga mwaatkwa aba jeannyaawa, ak ghwalas uhuuda habitkwajeega.

¹¹ Asi ghamneawa, ng'asheesu ghwanyas nea gawuurji reekusiinda, ak geang'waar ghoahiimu gichchea eabeada, aba heeda fuga jeagweadu mudeanooda gweannyeekka.

¹² Asi siida eeshsha geaw giminaadi dang'ulla geaw adiiduu ghoabeeda.

¹³ Manda simsimda ninyaseagwa agooga mawosa dea geallaan aba heeda siida. Aseetta doabiiwaat, nea niny ea mayghwanung'waada eesmeegwa ea ghwanaawa uurjeengeagwa, earappeadi jea eesmeegwean gaygwasin naweeda jea aritteawana ak abeeda ghoammuuschi arjeang'da.

¹⁴ Asi fugeasu abwariinnyi, aba sareani anung'waada baditta gidamawosa aseetta.

¹⁵ Geabalooldaneegwa fuga mideawa fughareenga; asi otteemsheesiina agooga ng'asheesu earguun.

¹⁶ Bayooktida bea ghawooda sippareannyi aba ghawoodean, heappi mii giibareannyeeda foojeanda Gristohi? Ama mukkateeyda subwanajaadi mii giibareannyeeda saseeda Gristohi?

¹⁷ Aba gideaba gwanda mukkatteheanagi, nea aseasa geawoschi saang'a ak gewooschi saseanagi, aba gideaba aseasa eesasean geanyaschi banajaneedeaba mukkatteydida assagiin.

¹⁸ Ang'ulla fuga Israeeli; neada ea mii fukka ghayi akk haleanjeeda ghasmeahooda bareannyi sea altaarihi?

¹⁹ Asi gaydayiin? Gaydayi hamitta sighadoawana haleanjeeda mawosa aseetta gili, ghana maloonghajeanda gili?

²⁰ Manda, geargu gideaba haleanjeetta sisappa geadi adayda fuga mandeawana masaweega ghoadaw meangeenda nea moadawa Aseetta. Ak ea meagassi aniini gideaba gajabareannyeewana meangeenda.

²¹ Mwajoammuusa aleayda bayookta Ng'uttamiida ea bayookta meang'eenda. Ak ea mwajoammuusa oppareannyeena measeeda Ng'uttamiida ea measeeda meangeenda.

²² Ghana sigasayi eang'udana Ng'uttamiida lachng'eanyiida? Neada gendeawi uurda ea eburdeawana ninyi?

²³ “Haleanjeessean ghwahit,” ak ea mii haleanjeessean gil gea jea ghaweat fii, ak ea mii sean gil gea jea gwadeegu.

²⁴ Siida adagagakkiisa geaw haleanjeeda miyaas, ghang'wana gagasa ghwanyas gischeewoochcheandaannyi gidamiy.

²⁵ Ayaaga haleanjeessean sikghaas aba heeda sigheahhiideawa bannyeega was jeeda naada nea adoonnyeariidi aba gidamwachmwach fughareedeang'wa.

²⁶ Aba gideaba, “Ng'eanyiida gaba Ng'uttamiida, sea haleanjeessean mida jeeda.”

²⁷ Asi iguurneey siida mandeawana masaweega hamitteaba shing'ada ak gigasayi beatta, aga gidawassean sugoonnyi nea adinyaashti ng'asheanda wassean aba gidamwachmwach fughareeda.

²⁸ (Ama deeppa gwayeeshshineey sih, “Gili geattaydaawa lukghumajeega,” iiduu nea mang'ulleey siida ghwanyawa rukuneey, ea aba gidamwachmwach fughareeda,

²⁹ geargu gitta mwachmwach fughareadaannyiin, mii geagwa gil, adiiduu giyaagi.) Ghwasaan abeeda inyas gibaldeanyu bea geaw jea goorgweaksa fughareemba siinuut?

³⁰ Abeeda iyaagi nea geabadiischeesi Aseetta, abeeda ghwasaan inyas geeng'ng'eawwean aba gili naabwachchi Aseettean?

³¹ Asi iyooyeagiischi ghana iyooleeshi, ghana iyoosinnyi ng'asheanda wassean, asna sean aba gigheambiitta Aseetta.

³² Adoanung' goodiiy fuga Yahuudi ghana gea Yunaani ghana ganiiseeda Aseetta,

³³ asi gawuurji gidiissa eagassiidi aniini deahoosan buuneessean aba haleanjeessean easinnyi, ak ea meegassi gideaba gaydanyagaada nea gabwageaw, geagasayi dea buuneessean, ak abeeda geelealu.