2Tesalonika 1 - ALLAH NEN WENE NGGET MENDE WAROGO WOKNINAKIKE WENE

Keyagi warinakike wene

¹ Kit Allah aʼburi o Tesalonika nandoko dogolik ninombae Allah ninewe Endaganggok Yesus Kristus imbisak kinom kunik dogoligogi mende, nagarlagi nirugi o. An Paulus, Silas inom, Timotius inom, ninom nen wene yi kolal mbalogo kinoba laʼbi wago o.

² Ninombae Allah, ninewe Endaganggok Yesus Kristus imbisak inobabut pano etnogo nen, pano mende wokisigik, kinendainggen kambugut dinagigik, kagako dogowak o.

Kristus nen wene inoba ʼbigik nggokik, kagasigin wene

³ Nagarlagi nirugi o. Kit kinendainggen Kristus oba panggot diluk werek mende eti omanggi inom nggokogo panggot digik, kit-kit kinebe dombok naʼbuwa-kaʼbuwarogo kagarigogi mende eti omanggi inom nggokogonat inaʼbuwa kigik, kagarigogi eti paga, nit nen kit pasik Allah pogorasusak mendeat pogorako mondok werek o.

⁴ Akoni nen yi aik ndi aik kagat kinako nggorlegat, kinobakanini kambuk yiluk dogolik, kinendainggen Kristus oba esigit diluk panggot diluk werek eti paga, nit nen Allah aʼburi o yi ai ndi ai nandorligogi mende kinabok yogisasi dogolik ninalon arigogo o.

⁵ Allah nen akoni wene inoba ʼbigik nggokik ndak-ndagat ʼbiligogo yiluk enggagat asigin. Kit yogondak Allah apma unggiluk ane kologo werek eti paga, akoni nen yi aik ndi aik kagat kinako nggorlek esigit diluk werek eti paga, at nen yabunggane, “Kit erlok an napma unggiluk kinaiwerek mondok dogono o,” yiluk, yokisagin o.

^6-8 Ninewe Endaganggok Yesus agoromi malaikat yonggo liligogi mende inom mbogot oba nen inobatnerogo selekmaat, kindu amulok inom wusa wagonem, Allah nen wene akoni inoba motogonat ʼbisi dogolik, it nen kit yi aik ndi aik kagat kinabigogi mende, onggo ndak-ndagat weyagarinakik, nen, kit yi aik ndi aik kiligogi mende eti nit ninomat ninakla panot ninakik, kagasigin o. Esigit diluk kagako dogolik, it akoni Allah ebe inilu asusak inaʼit dogolik, ninewe Endaganggok Yesus kagakike wene pano wene etnogo waganggidek togot diyiligogi mende wene inoba ʼbiyagin o.

⁹ It esigit diluk wene inoba ʼbiluk, ninewe Endaganggok obatneyak nen pogorakik, alon palkik, mondok kagarigogima il oba etoma nenat weyakma etoma mondogat dogowagaluk laʼbiyagin o.

¹⁰ At wisigin etinem ebe wagonem, enggaerek aʼburi inendainggen at oba panggot diluk dogoligogi mende nen, at ebe pogorakik, alon palkik, kagasuwagaluk wisigin o. Nen, nit nen wene eti ninilu mende ʼbukakogo yokisa wagagumo, kit nen, “Eberogonat o,” yiluk waganggigip eti paga, kit ninom nenat, at pogorasugun o.

¹¹ At Allah nen, “Kit esigit diluk kagako dogono o,” yiluk, kinayonggo ʼbisike kagat, erlok kagako dogobagik nen yiluk, nit nen kit kinake sembayan yisi mondok werek o. Kit kinakla nen, “Nit pano kagako dogolep,” yiluk, ambaligogi mende eti Allah nen esigit diluk kagat kinakik, nen, kinendainggen at oba panggot diluk dogolik kagarigogi mende eti at nenat kinendainggen korlet dinagagik, at obatne paga kagat kinako dogowak o.

¹² Ninombae Allah, ninewe Endaganggok Yesus Kristus imbisak inobabut pano etnogo nen kagat kinakonem esigit diluk kagako dogogun eti paga, kit nen, ninewe Endaganggok Yesus endaga mbalogo pogorakik, at nen, kit pogot kinakik, kagasugun o.