Nehemia 1 - Bibilia Tapu

PENE I - 1

Kite akerā Nehemia i te tu o Ierusalema, kua akakore iora i te kai, e kua pure.

¹ TE tuatua a Nehemia te tamaiti a Hakalia ra. Tae akera ki te marama ra ia Kisileu, i te mataiti okotai takau ra, iaku i Susana i te are ariki ra,

² Kua aere mairā Hanani, tetai taeake oku ra, koia e ko etai tangata no Iuda; kua ui atura au kia ratou i te au ngati Iuda i ora ra, ko tei toe i te tuikaa ra, e ia Ierusalema katoa oki.

³ E kua tuatua maira ratou kiaku, Te toenga, ko tei toe i te aronga i tuikaa, i noo ei i te enua ra, e tumatetenga maata to ratou, e te akakino angaia: te vai ngaangaa ua nei oki te patu o Ierusalema, e te au ngutupa kua ka i te ai.

⁴ E kite akera au i te reira tuatua, kua noo au ki raro ma te aue, e kua mii ua au i etai puke rā, e kua akakore au i te kai, e kua pure ki mua i te aroaro o te Atua o te rangi,

⁵ E kua karanga atura au, Te pure atu nei au ia koe, e te Atua no te rangi, e Iehova e te Atua maata e te matakuia, ko tei akono i te koreromotu e te aroa i te aronga i inangaro iaia, e kua mako i tana au akauenga:

⁶ E akarongo mai to taringa i teianei, e akapuera mai oki o mata, kia rongo koe i te pure a to tavini, taku e pure ua atu ki mua ia koe i teianei, i te po e te ao, i te au tamariki a Iseraela, i to au tavini; e te aaki nei au i te au ara a te tamariki a Iseraela, ta matou i rave ia koe nei: ko au e te ngutuare katoa o toku metua, kua ara katoa ïa.

⁷ E takinga-kino to matou ia koe, kare rai i akono i te au akauenga, e te au akonoanga, e te au tuatua-tau ra, taau i akaue mai ki to tavini ra kia Mose.

⁸ Te pure atu nei au kia koe, e akamaara i te tuatua taau i akaue i to tavini ra kia Mose, ka na ko ei ra e, I rave kotou i te kino, e akapueurikiriki ke atu au ia kotou ki te pa enua:

⁹ Kia ariu maira ra kotou kiaku ra, e kia akono mai i taku nei au akauenga, e kua rave i te reira; akangaoro ua kotou e tae ua atu ki te openga rava o te rangi ra, ka akaputuputuia mairai ratou e au mei reira mai, e ka apai mairai au ia ratou ki te ngai i ikiia e au ei vairanga no toku nei ingoa.

¹⁰ E teianei, ko toou teianei au tavini, e toou ïa au tangata, i akaoraia e koe i toou ra mana maata, e toou rima marōrō.

¹¹ Te pure nei au kia koe, e te Atu, kia akarongo mai to taringa i te pure a to tavini nei, e te pure a to au tavini ra, i tei anoano i te mataku i toou ra ingoa: e te pati atu nei au ia koe, e akamanuia mai i ta to tavini i teianei rā, kia aroaia mai aia e teianei tangata. E apai kapu oki au na te ariki.