Kolosa 1 - Bibilia Tapu

PENE I - 1

Te akameitaki rā Paulo i te Atua i to ratou akarongo, e te pure ra kia maata rai to ratou meitaki.

¹ PAULO, e aposetolo na Iesu Mesia, i to te Atua inangaro, e taku taeake nei ko Timoteo,

² Ki te aronga tapu i te au taeake akarongo i te Mesia, i Kolosa na; Ei ia kotou te aroa ua, e te au, no ko mai i te Atua i to tatou Metua ra, e te Atu oki ia Iesu Mesia.

³ Te akameitaki nei oki matou i te Atua, i te Metua o to tatou Atu ra o Iesu Mesia, e kare e tivata i te pure ia kotou,

⁴ Mei to matou kite anga mairai i to kotou akarongo i te Mesia ra ia Iesu, e to kotou aroa i te aronga tapu katoa ra;

⁵ I te irinakianga i vaioia no kotou i te ao, ta kotou i kite i muatangana i te tuatua-mou i te evangelia nei;

⁶ Ko tei kitea mai i roto ia kotou na, e i te ao katoa nei, e te akatupu nei i te meitaki mei tei i o kotou katoa na, mei te rā mairai i akarongo ei kotou, e i kite tikaʼi i te aroa ua o te Atua ra:

⁷ Ko ta kotou rai oki i kite akenei ia Epaphera, i to matou taeake tavini akaperepere nei, e e orometua tuatua-mou na te Mesia ia kotou;

⁸ Ko tei akakite katoa mai ïa kia matou i to kotou aroa ngakau ia matou ra.

⁹ I kore katoaʼi matou i tivata i te pure ia kotou, mei te rā mairai i kite ei matou, e te pati akatenga anga atu kia akakiia mai kotou i te kite i tona anoano, i te pakari i te au mea ravarai e te kite i te vaerua;

¹⁰ Kia tau to kotou aerenga i te Atu i te au mea katoa e mareka mai ei ra, e kia tupu te au angaanga meitaki katoa ia kotou, e kia maata oki to kotou kite i te Atua;

¹¹ Ma te akamaroiroiia mai i te au maroiroi katoa, kia tau i tona mana kakā, kia maata atu te akakoromaki, e te maru anga kia roa, ma te rekareka;

¹² Te akameitaki nei matou i te Metua, i tei akatau mai ia tatou i tetai tuanga i te kainga o te aronga tapu i te ao ra:

¹³ Ko tei akaora ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere;

¹⁴ Nona i raukaʼi to tatou ora, ko te ara i akakoreia, i tona toto;

¹⁵ Ko te tu tikai aia o te Atua akara koreia, ko te Tama mua aia o te au mea ravarai i angaia ra:

¹⁶ E nana oki i anga i te apinga tini ravarai nei, ko to te rangi, e to te enua nei, ko tei akaraia nei e te kore e akaraia, te au terono, e te aronga tutara, te ui ariki, e te aronga mana, nana ïa i anga, e nona anake:

¹⁷ Ko mua rai aia i te au mea ravarai nei, koia oki tei mou i te au mea katoa nei.

¹⁸ Koia te upoko o te kopapa, te ekalesia nei, ko te momua aia, te tama mua o te aronga i mate ra; kia maata ua atu rai aia i te au mea katoa nei.

¹⁹ E mea meitaki oki i te Metua e, ei roto iaia te ki o te au mea katoa nei e vai atu ei;

²⁰ E kia ongi oki iaia te au mea katoa i roto iaia uaorai i te au i rauka i te toto o tona satauro; ko to te rangi, e to te enua nei oki, kia ongi rai iaia.

²¹ Ko kotou oki, ko tei taka ke i muatangana, e te ngakau enemi, i te tuatua kikino ra, kua akaongi katoaia e ia i teianei,

²² I tona matenga i te kopapa tangata nona ra, kia tuku aia ia kotou ma te tapu, e te apa kore, e te tapepeanga kore, ki mua i tona aroaro:

²³ Kotou oki i noo tamou tikai i te akarongo, kua akatumu e kua tinamou tikai, kare i ngaueue i te akinanga i te evangelia nei, ta kotou i akarongo akenei, e tei akakiteia akenei ki te tangata ravarai i raro ake i teianei rangi, i akariroiaʼi au nei ko Paulo ei orometua.

²⁴ E te rekareka nei au i toku nei mate ia kotou i teianei, e te akatika nei au i te mate o te Mesia i toe iaku i toku nei kopapa, no tona kopapa, koia oki te ekalesia nei:

²⁵ Tei akariroia au nei ei orometua, i te akaaerenga a te Atua i oronga mai kiaku nei no kotou, kia akaope ua atu au i te akakite i te tuatua a te Atua:

²⁶ I te tuatua ngaro kare i kitea i te au tuatau e te au uki taito ra, kua akakiteia mai i teianei ki te aronga tapu nona ra:

²⁷ Ko ta te Atua i anoano i te akakite mai i te meitaki maata kakā o taua tuatua ngaro nei i rotopu i te au etene ra; koia oki te Mesia i roto ia kotou ei manakoanga i taua kakā ra:

²⁸ Ko ta matou ïa e akakite aere nei, i te ako anga atu i te tangata ravarai, e te apii anga i te tangata katoa ma te akono meitaki; kia tuku matou i te au tangata ravarai ma te apa kore i te Mesia ra ia Iesu:

²⁹ I rave ei oki au i te angaanga, i te uapou marie anga ma te maroiroi nona; ko tana i rave io nei i roto iaku nei ma te ririnui maata.