Ephesia 1 - Bibilia Tapu

PENE I - 1

Te akakite rā Paulo e ko te aroa te tumu o to te tangata nei ora; e te pure ra kia kite ratou.

¹ PAULO, e aposetolo na Iesu Mesia i te inangaro o te Atua, i te aronga tapu i akarongo i te Mesia ia Iesu i Ephesia na:

² Ei ia kotou te aroa ua e te au, no ko mai i te Atua i to tatou Metua ra, e te Atu oki ia Iesu Mesia.

³ Kia akameitakiia te Atua te Metua o to tatou Atu ra o Iesu Mesia, ko tei akameitaki mai ia tatou nei i te au meitaki ravarai o te vaerua i te ao ra i te Mesia nei:

⁴ Koia i iki mai ia tatou i roto iaia nei, ou te tumu o teianei ao, kia riro tatou ei aronga tapu, e te apa kore, i mua iaia, ma te anoano:

⁵ E kua akono takere ia tatou, kia riro ei tamariki rave nana uaorai ia Iesu Mesia ra, mei tei tau i te anoano takinga-meitaki o tona uaorai ngakau,

⁶ Kia akameitakiia te kakā o tona aroa ua, i riro ei tatou iaia ei aronga kiteia mai i roto i tei Akaperepereia:

⁷ Nona i raukaʼi te ora ia tatou i tona toto, i te akakore anga i te ara nei, no te maata o tona aroa ua;

⁸ Ko tei akamaata ravaia e ia ia tatou nei, ma te pakari katoatoa oki e te akono meitaki;

⁹ E kua akakite mai ia tatou i te tuatua ngaro o tona anoano, i tona uaorai inangaro takinga-meitaki i akakoroia e ia i roto iaia uaorai:

¹⁰ E kia tae ki te akaaerenga i te openga tikai o te au tuatau ra, kia tavaitai aia i te au mea katoatoa i te Mesia ra, to te rangi, e to te ao katoa nei: ei iaia rai,

¹¹ E e tuanga oki ta matou i rauka iaia, ko matou ko tei akono takereia i te akakoro nana, na tei rave i te au mea katoa kia tau i te akakoro a tona anoano:

¹² Kia riro matou nei ei akameitaki anga i tona kakā, ko matou ko tei irinaki i te Mesia i muatangana.

¹³ Ko ta kotou katoa oki i irinaki, i to kotou akarongo anga i te tuatua-mou ra, i te evangelia o to kotou ora; e kotou katoa i akarongo, i akairoiaʼi kotou e ia, i te Vaerua Tapu i tuatuaia maira,

¹⁴ Ko te akakite ïa o ta tatou tuanga e tae ua atu ki te ora mou o te aronga i okoia ra, kia akameitakiia tona kakā.

¹⁵ No reira katoa au nei, i kite katoa akenei au i to kotou akarongo i te Atu ra ia Iesu, e te aroa i te aronga tapu katoa ra,

¹⁶ I kore ei i tivata i te akameitaki i te Atua ia kotou, i te taiku anga ia kotou i roto i taku nei pure;

¹⁷ Kia oronga mai te Atua o to tatou Atu ra ko Iesu Mesia, te Metua nona te kakā, i te Vaerua nona te pakari, e te tuatua akakiteia, kia kotou, kia kite kotou iaia:

¹⁸ Kia mārama te mata o to kotou ngakau; kia kite kotou i te manakonakoanga o tana tuatua anga mai, e te maata anga o te kakā o te tuanga nona, i akonoia na te aronga tapu ra,

¹⁹ E te maata anga oki o tona mana kia tatou i tei akarongo, i te maroiroi maata o tana ravenga mana,

²⁰ Tana i rave i te Mesia ra, ka akatu mai ei iaia i te matenga ra, e akanoo iora oki iaia i tona uaorai rima katau i te ao ra,

²¹ Ki runga rava atu i te au ariki ravarai, e te aronga mana, e te marōrō, e te maata, e te au ingoa katoa i akaikiia nei, eiaa i teianei ao anake, i te ao katoa ra a muri atu:

²² E kua tuku oki i te au mea ravarai ki raro ake i tona vaevae, e kua akono oki iaia ei upoko i rungao i te au mea katoa i te ekalesia,

²³ Ko tona ïa kopapa, ko te ki ïa nona no te akaki i te au melo katoa i te au mea ravarai.