Apokalupo 1 - Bibilia Tapu

PENE I - 1

Te tata nei a Ioane i te tuatua i nga ekalesia e itu ra: te teitei e te mana o te Mesia: tei te enua tei Patamo tona riro anga i te Vaerua: te orama i te Tamaiti a te tangata, nga etu e itu, e nga lamepa e itu.

¹ TE eeuanga a Iesu Mesia, ta te Atua i tuku mai iaia ra, kia akakite atu aia i tona au tavini i te au mea e vaitata i te tupu ra; e kua unga maira aia i tana angela e kua akakite maira ki tona nei tavini ia Ioane:

² Ko tei akakite i te tuatua a te Atua, e te tuatua no Iesu Mesia ra, e te au mea ravarai tana i kite ra.

³ E ao tona to tei tatau, e to te aronga e akarongo i teianei tuatua totou, e tei akono i tei tataia ki roto ra: kua vaitata oki te tuatau.

⁴ Ko Ioane i te au ekalesia katoa e itu i Asia ra; Ei ia kotou te aroa ua, e te au, no ko mai iaia no te vai nei, e tei vai ana oki, e te ka tae mai; e no ko mai oki i te au Vaerua toko itu i mua i tona terono;

⁵ E no ko mai oki ia Iesu Mesia, i te kite tuatua-mou ra, te tama mua mei te mate maira, e te ariki o te au ariki o te ao nei. Ei iaia, ei tei aroa mai ia tatou nei, e kua tamā ia tatou i ta tatou ara i tona uaorai toto,

⁶ E kua akariro ia tatou ei ariki anake, e ei taunga na te Atua i tona Metua; ei iaia te kakā, e te au, e tuatau ua atu. Amene.

⁷ I na, te aere mai na aia i roto i te tiao rangi; e akara te au mata katoa iaia, e te aronga i ko atu iaia ra: e ka aue te au kopu ravarai o te ao nei iaia. Koia ïa. Amene.

⁸ Te na ko maira te Atu ra, Ko au te Alepha e te Omega, te muatangana e te akaopenga, ko te vai nei, e tei vai ana oki, e te ka tae mai, ko te Mana katoatoa ra.

⁹ Ko au nei ko Ioane, ko to kotou taeake, e te oa oki, i te tumatetenga, i te basileia e te akakoromaki o Iesu Mesia ra, i te enua au i karangaia ra e ko Patamo, no te tuatua a te Atua ra, e no toku akakite anga ia Iesu Mesia ra.

¹⁰ I riro au i te Vaerua i te rā o te Atu ra, e akarongo akera au i tetai reo maata i muri ake iaku, mei te tangi pu ra, I te na ko anga mai e,

¹¹ Ko au te Alepha e te Omega, te muatangana e te akaopenga: e taau e kite nei, e tata ki roto i tetai buka, e akau atu ei ki nga ekalesia e itu i Asia ra; i tei Ephesia ra, e Semurina, e Peregamo, e Tuatira, e Saradi, e Philadelaphia, e Laodikea ra.

¹² Kua ariu akera au e akara i taua reo i tuatua mai iaku ra: e tei taua ariu anga noku ra, kite atura au i e itu lamepa auro ra;

¹³ E tetai mei te Tamaiti a te tangata i rotopu i taua nga lamepa e itu ra, kua kakau i te kakau e raro rava i te vaevae, kua tatuia te umauma i te tatua auro ra.

¹⁴ E tona upoko ma te rauru ra, mei te vavai ra ïa te teatea, mei te kiona te teatea; e mei te mura ai ra ona mata;

¹⁵ E mei te veo meitaki i tungia i te ai ra ona vaevae: e tona reo mei te aruru ïa o te tai maata ra.

¹⁶ Te mou ra tona rima katau e itu etu: e te riro atura tetai koke kokoi matarua mei roto atu i tona vaa: e tona mata, mei te ra ra ïa kia kakā mai i te avatea ra.

¹⁷ E i toku akara anga atu iaia ra, inga iora au ki raro i tona pae vaevae mei te tangata mate ra te tu. Kua tuku maira aia i tona rima katau ki rungao iaku, e kua na ko maira iaku, Auraka e mataku; ko au te muatangana e te akaopenga;

¹⁸ Ko au teia e ora nei, i mate ana rai oki: e i na, e ora atu rai au e tuatau ua atu, Amene; e tei iaku te taviri o te mate e to ade.

¹⁹ E tenana, e tata koe i te au mea taau i kite io nei, e te au mea e vai nei, e te au mea te ka tupu a muri nei;

²⁰ Te arite anga o nga etu e itu taau i akara mai i taku rima katau nei, e i nga lamepa auro e itu nei, ko teia ïa, Nga etu e itu nei, koia nga angela ïa a te au ekalesia e itu ra; e nga lamepa e itu taau e akara na, koia nga ekalesia ia e itu ra.