Angaanga 1 - Bibilia Tapu

PENE I - 1

Ta Iesu tuatua porokiroki e te aerenga ki runga i te rangi: te au aposetolo: ta Petero tuatua ia Iuda: to Matatia iki angaia.

¹ I TATA ana oki au i tei muatangana papa tuatua, e Teophilo, no te au mea katoa ta Iesu i rave ra, e tana i apii ra,

² E tae rava akenei i te rā i raveia atu ei aia ki runga ra, kia oti tana ikuiku anga, ma te Vaerua Tapu, i te au aposetolo i ikiia e ia ra;

³ Ko tana katoa ïa i akakite iaia uaorai i te ora anga, i muri ake i tona mate anga, ma te akairo ara kore e manganui; e a ngauru anga ona po i te akara angaia e ratou, e te tuatua anga atu i te tuatua no te basileia o te Atua:

⁴ E putuputu akera aia ma ratou, kua ako atura aia ia ratou, Auraka e akaruke i Ierusalema, e tatari ra i ta te Metua i tuatua maira, kua kite ana oki kotou iaku:

⁵ Kua bapetizo rai oki a Ioane ki te vai, e bapetizoia ra kotou ki te Vaerua Tapu i eianei puke rā.

⁶ E putuputu akera ratou, kua ui maira ratou kiaia, na ko maira, E te Atu, ei teianei aina koe e akaoki mai ei i te au kia Iseraela?

⁷ Kua karanga atura aia kia ratou, Kare ïa i akonoia kia kite kotou i te taime te tuatau, ta te Metua i vaoo iaia uaorai:

⁸ Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.

⁹ E te tuatua ua ra aia i taua au tuatua nei, e te akara ua maira ratou, kua raveia atura aia ki runga; e i vaîia maira aia e te tiao, ngaro atura i to ratou mata.

¹⁰ E tei to ratou akara matariki anga atu ki runga i te rangi, iaia i aere atu ki runga ra, i na, te tu ua maira e toko rua puke tangata i vaitata ia ratou ma te kakau teatea;

¹¹ Ko tei tuatua mai ïa e, E te au tangata Galilea nei, eaa kotou i tu uaʼi, e i akara tamou ei ki runga i te rangi ra? Ko Iesu nei rai tei raveia akenei i roto ia kotou ki runga i te rangi, ka oki mai ïa mei te reira katoa, mei ta kotou i kite atu iaia i te aere anga atu ki runga i te rangi ra.

¹² Oki maira ratou ki Ierusalema, mei te maunga mai i tuatuaia ra e, ko Oliveta, tei vaitata i Ierusalema, mei te ngai aereia i te sabati nei te roa.

¹³ E tae atura ratou ki roto i te oire, kake atura ki runga tomo atura ki roto i te pia e nooia e Petero ma ra, e Iakobo, e Ioane, e Anederea, ko Philipa, e Toma, ko Baratolomea, e Mataio, ko Iakobo a Alephaia ra, e Simona te Maroiroi, e ko Iuda oki te taeake o Iakobo ra.

¹⁴ E tamou marie atura ratou katoa i te pure anga, e te pati anga, ma te ngakau okotai, e te au vaine katoa, e ko Maria oki te metua vaine no Iesu, e tono katoa kopu-tangata.

¹⁵ E i te reira au rā, kua tu akerā Petero ki runga i rotopu i te au pipi ra, kua na ko maira, (okotai anere e rua ngauru anga paa tangata i putuputu mai,)

¹⁶ E tāma, e te au taeake nei, kia tupu te tuatua i tataia ra e tikaʼi, ta te Vaerua Tapu i tuatua mai na roto i te vaa o Davida i muatangana ia Iuda, ko tei riro ei arataki i te aronga i opu ia Iesu ra.

¹⁷ I kapiti katoaia oki aia i roto ia tatou nei, e kua rauka katoa oki teianei taoonga iaia.

¹⁸ E kua oko atura taua tangata ra i tetai kainga ki te tutaki i te ara; e topa atura aia ki raro te mata, ngaa atura i rotopu iaia, pururū atura tona ngaku katoa ki vao.

¹⁹ E kua kite oki to Ierusalema ravarai: e tapaia iora taua kainga ra i ta ratou uaorai tuatua, e Akeledama, koia oki Te kainga toto.

²⁰ Kua tataia oki ki roto i te buka Salamo ra, “Kia riro tona kainga i te tanea, e auraka rava ei tangata e noo i reira,” e “Kia riro oki tana taoonga ki tetai ke.”

²¹ E teianei, i te au tangata i kapiti katoa mai kia tatou, ka noo katoaʼi te Atu ra ko Iesu i rotopu ia tatou nei,

²² Mei tona bapetizo angaia mairai e Ioane, e tae rava mai nei ki te rā i raveia atu ei aia ki runga ra, mei ko nei ia tatou nei, kia akatakaia tetai o ratou e tikaʼi, ei akakite e ko tatou katoa oki, i tona tuakaouanga nei.

²³ Kua akataka atura ratou i e toko rua, ko Iosepha Barasaba, ko tei tapaia ia Iuseto ra, e ko Matatia oki.

²⁴ Kua pure iora ratou, na ko atura, E te Atu, ko tei kite i te ngakau o te tangata ravarai, ka akakite mai koe i taau i iki i eianei puke tangata,

²⁵ Kia rave katoa mai aia i teianei taoonga i te aposetolo i topa ia Iuda no te ara, kia tae atu aia ki tona ngai tikai

²⁶ Kua tuku atura ratou i te kelero, riro atura te kelero kia Matatia, kua kapiti katoaia maira aia e te au aposetolo tino ngauru ma tai ra.