2 Timōteo 1 - Bibilia Tapu

PENE I - 1

To Paulo aroa ia Timoteo, e tona akarongo pikikaa kore: ko Onesiphoro.

¹ PAULO, e aposetolo na Iesu Mesia, i te anoano o te Atua ra, no te ora i te Mesia ra ia Iesu i tuatuaia maira,

² I taku tamaiti akaperepere, ïa Timoteo: ei ia koe te aroa ua, te tangi, e te au, no ko mai i te Atua Metua ra, e to tatou Atu ra ko Iesu Mesia.

³ Te akameitaki nei au i te Atua, (taku e akamori nei ma te akava-ngakau viivii kore mei taku ui tupuna katoa ra,) i te mea e tika iaku kia manako ia koe i taku nei pure i te po e te ao, auraka e tivata;

⁴ Te manako nei au i taua aue noou ra, e anoano maata toku kia kite atu au ia koe, kia akakiia mai au i te rekareka;

⁵ Te manako nei oki au i te akarongo pikikaa kore i roto ia koe na, ko tei vai marie i roto i to tupuna vaine ia Loi i muatangana ra, e i roto katoa i to metua vaine ia Eunike; e te manako nei au e, tei roto katoa ia koe na.

⁶ E teianei, e tuatua atu ei au ia koe, kia maara koe e, e akaaraara koe i tei roto ia koe i oronga uaia mai e te Atua i te tuku anga i taku rima ki rungao ia koe na.

⁷ Kare oki i te ngakau kopē ta te Atua i oronga mai no tatou; te ngakau maroiroi ra, e te aroa, e te ngakau akono meitaki.

⁸ Eiaa koe e akama i te tuatua-akakite a to tatou Atu, e eiaa katoa e akama iaku i tona tangata tapekaia nei, e āriki katoa ra koe i te mate o te evangelia nei i te maroiroi o te Atua ra;

⁹ Ko tei akaora ia tatou nei, e kua kapiki ia tatou i te kapikianga tapu ra, eiaa no ta tatou angaanga, no tona uaorai ra akakoroanga e te aroa ua i orongaia mai i te Mesia ra ia Iesu no tatou, ou te akamataanga i teianei ao:

¹⁰ Kua akakite uaia maira i teianei i te mama anga mai o to tatou Ora ia Iesu Mesia, ko tei akakore i te mate nei, e kua akakite pu mai i te ora mutu kore i te evangelia nei:

¹¹ I akonoiaʼi au nei ei ako, e ei aposetolo, e ei orometua, na te etene ra.

¹² I rokoia mai ei au i taua au kino nei: kare ra au i akama: kua kite akenei au i taku i akarongo akenei, e kua kite au e, e tika iaia kia tiaki i taku i tuku atu iaia ra e tae ua atu ki taua rā ra.

¹³ E tāpu meitaki i te akonoanga tuatua tikai taau i kite iaku nei ra, ma te akarongo e te anoano i te Mesia ra ia Iesu.

¹⁴ Taua tuatua meitaki i tukuia atu ia koe ra, e mou meitaki ïa, i te Vaerua Tapu e noo ki roto ia tatou nei ra.

¹⁵ Kua kite oki koe e, kua akaruke anake to Asia ra iaku, no ratou oki a Phugelo e Heremogene.

¹⁶ Kia aroa mai te Atu i te kopu-tangata o Onesiphoro; kua matuapuru putuputu mai aia iaku, e kare i akama i taku nei pirianganaoa;

¹⁷ Kua kimi marie ra aia iaku iaia i Roma nei, e kitea iora au.

¹⁸ Kia aroaia mai oki aia e te Atu kia tae ki taua rā ra: e te maata oki o tona takinga-meitaki anga iaku i Ephesia ra, kua kite ua oki koe i te reira.