1 Petero 1 - Bibilia Tapu

PENE I - 1

Ko te Mesia te tumu o to tatou meitaki: e meitaki te akarongo kia timataia: ta te tuatua ora angaanga.

¹ PETERO, e aposetolo na Iesu Mesia, i te au tuitarere i pueurikiriki i Ponoto, i Galatia, i Kapadokia, i Asia, e i Bitunia,

² I ikiia i te akakoro atea anga a te Atua Metua ra, i te akatapu a te Vaerua i te akarongo, e te pîpî anga i te toto o Iesu Mesia ra: Ei ia kotou te aroa ua, e te au, kia maata atu rai.

³ Kia akameitakiia te Atua te Metua o to tatou Atu ra o Iesu Mesia, ko te akaanau akaou ia tatou no te maata o tona aroa, kia rauka te manako ora i te tuakaouanga o Iesu Mesia mei te mate maira,

⁴ Kia rauka te tuanga kino kore, e te viivii kore, e te mae kore, ko tei vaioia ki runga i te rangi na kotou,

⁵ Ko tei tiakiia ïa e te mana o te Atua i te akarongo kia rauka te ora, i vave i te akakiteia mai kia tae ki te tuatau openga ra:

⁶ Kia maata to kotou rekareka i te reira, taitaia poto ua rai kotou i teianei (no te mea tika ïa) i te au timataanga tu ke ke ra:

⁷ Kia riro te timata anga o to kotou akarongo, ko tei maata rava i te meitaki i to te auro ngaro ua nei, timata uaʼi i te ai, ei akameitaki, ei teitei, e ei meitaki, i te mama anga mai o Iesu Mesia:

⁸ Ko ta kotou i anoano na, kore ua atu rai te kite iaia; ko ta kotou e rekareka ra i te rekareka e kore e tika kia tuatua ra, e te ki oki i te kakā, i te akarongo anga atu, kore ua rai kotou i te akara atu iaia i teianei:

⁹ Ma te rauka oki te openga o to kotou akarongo, koia te ora o to kotou au vaerua.

¹⁰ Ko te ora ïa ta te au peroveta i uiui, e kua kimi pu tikai, ko tei totou i te aroa ua e riro mai ia kotou na;

¹¹ I te kimi marie anga, e ei teea tuatau, e ei teea tu tuatau, ta te Vaerua o te Mesia i roto ia ratou ra i tuatua mai, ka akakite mamao mai ei aia i te au mate katoa o te Mesia ra, e te kakā e tupu i muringao.

¹² E kua akakiteia mai oki ratou e, kare to ratou uaorai, no tatou ra, ta ratou i tuku maira, i te au mea i tuatuaia mai ia kotou, e te aronga i ako mai ia kotou i te evangelia, ma te Vaerua Tapu i tonokia mai mei te rangi maira; ko te au mea ta te au angela e arōrō mai e akara.

¹³ E teianei, ka tatua na i te taukupu o to kotou ngakau, kia akono meitaki, ka tatari ua atu ei i te aroa ua te ka apaiia mai no kotou i te mama anga mai o Iesu Mesia ra:

¹⁴ Mei te tamariki akarongo ra, auraka e akaarite ia kotou uaorai i te au inangaro taito i to kotou kamakura anga ra;

¹⁵ Mei iaia i kapiki mai ia kotou e tapu ra, kia tapu katoa kotou i ta kotou tuatua ravarai ra;

¹⁶ Kua oti oki i te tataia e, “Kia tapu kotou; te tapu nei oki au.”

¹⁷ E te pure na kotou i te Metua, ko tei eumiumi i tei tau i ta te tangata katoa ra angaanga, ma te akara kore i te tu o te tangata, ka noo i to kotou tuitarere anga i ku nei ma te mataku:

¹⁸ Kua kite oki kotou e, kare kotou i okoia i te mea kino ua ra, mei te ario, e te auro, i ta kotou tuatua marikonga kore i tukuia mai e to kotou ai metua ra;

¹⁹ I te toto apinga maata ra o te Mesia ra, mei to te punua mamoe kino kore e te maki kore:

²⁰ Ko tei tou na takereia na, ou ua te tumu o teianei ao, i teianei ra au tuatau openga i akakiteia mai ei no kotou;

²¹ Ko tei akarongo i te Atua iaia, ko tei akatu iaia mei te mate maira, e kua oronga i te kakā nona; kia riro to kotou akarongo, e te irinaki, ki te Atua.

²² E tenana kua tamā i to kotou au vaerua i te akarongo anga i te tuatua-mou i te Vaerua ra, e kua tae i te aroa taeake pikikaa kore ra, kia aroa maata kotou ia kotou uaorai ma te ngakau kinokino kore:

²³ No te mea kua akaanau akaouia, eiaa no te ua pe ua nei, no te ua pe kore ra, i te tuatua ora a te Atua, ko te ka tika i te vairanga, kare rava e mutu ra.

²⁴ “Mei te ngangaere oki te tangata katoa nei, e tona manea ravarai, mei te tiare ïa o taua ngangaere ra. E marō te ngangaere, e topa oki te tiare ki raro:

²⁵ Kareka te tuatua a Iehova ra, e tu ïa e rimua:” teia oki taua tuatua ra ko te evangelia i akoia atu ia kotou na.