Яков 2 - Бур Юӧр 2019

¹ Менам воннэзӧ, ӧтіккезӧс мӧдіккез одзын эд лэбтӧ. Быдыскӧт лӧсялӧ ӧтмоза. Тійӧ эд веритат миян Кристос Исуслӧ, югьялан Дӧсвидзисьлӧ.

² Шуам, тіян ӧксьӧм коста пырас дона, бур паськӧма, зарни чунькытша морт. Пырас и бырӧм паськӧма умӧля олісь морт.

³ Тійӧ дона паськӧмаыс вылӧ видзӧттӧн висьталат сылӧ: «Эстӧн бур, пуксьы этчӧ». Умӧль паськӧмаыслӧ висьталат: «Тэ сувт сэтчин». Али сідз висьталат: «Верман пуксьыны менам коккез дынӧ джоджас».

⁴ Сідз кӧ керат, сэк тійӧ отирсӧ янсӧтат буржыккез да умӧльжыккез вылӧ, а асьнытӧ сувтӧтат умӧля судитіссезӧн.

⁵ Менам дона воннэзӧ, кывзӧ! Еныс бӧрйис му вывсис умӧля оліссесӧ, медбы сетны нылӧ ёна веритӧмсӧ да Ассис Юраланінсӧ. Этӧ кӧсйис сетны Сійӧ радейтіссезлӧ.

⁶ А тійӧ умӧля олісьсӧ абутӧм туйӧ пуктітӧ. Озӧ я бура оліссес тіянӧс дзескӧтлӧ? Озӧ я нія кыскалӧ тіянӧс суддэзӧттяс?

⁷ Озӧ я нія сералӧ тіянлӧ сетӧм бур ним вылын?

⁸ Вежа Гижӧтас медыджыт, медколана тшӧктӧмыс сэтшӧм: «Матісьтӧ радейт асьтӧ моз». Олат кӧ тійӧ сія тшӧктӧм сьӧрті, бурӧ керат.

⁹ Тійӧ ӧтіккезӧс мӧддэс сьӧрті пуктат кӧ буржыккезӧ, сэк умӧльсӧ керат. Тійӧ одӧ керӧ Туйдӧтас гижӧм тшӧктӧмыс сьӧрті. Сійӧн Туйдӧтыс сьӧрті тійӧ лёк кериссез.

¹⁰ Шуам, мортыс олӧ Туйдӧтас тшӧктӧммез сьӧрті, но сэтісь дзир ӧтік тшӧктӧм сьӧрті оз кер, кыдз колӧ. Сэк ӧтікыс кузя сія быдӧс тшӧктӧммез сьӧрті лоӧ лёк керисьӧн.

¹¹ Еныс висьталіс: «Гозйӧн овтӧн ӧтамӧдныт сайсянь эд ветлӧтӧ». Сія висьталіс и сідз: «Эн вий». Тэ гозйӧн овтӧн он ветлӧт, а виян кӧ, сэк тэ Туйдӧтыс сьӧрті лёк керись.

¹² Баитӧ да керӧ кыдз отир, кӧднакӧт пондасӧ бӧрйисьны мортсӧ мездӧтан Туйдӧт сьӧрті.

¹³ Мортыс эз кӧ вӧв небыт сьӧлӧма, сэк сійӧ асьсӧ суд вылас сетасӧ чорыта мыжйыны. Небыт сьӧлӧмсянь керӧмыс эд судитӧмысся вынажык.

Веритӧм да бурсӧ керӧм

¹⁴ Менам воннэзӧ, мый бурыс мортлӧ, шуас кӧ сія, ме пӧ верита, аслас керӧмыс оз кӧ мыччав веритӧмсӧ? Вермас я сэтшӧм веритӧмыс мездыны сійӧ мортсӧ?

¹⁵ Шуам, сойлӧн, вонлӧн я абу паськӧмыс, абу сёяныс.

¹⁶ Тіян коласісь кинкӧ висьталас нылӧ: «Мунӧ лӧнь сьӧлӧмӧн, шонтісьӧ, сёйӧ-юӧ». Асьныт одӧ кӧ сетӧ нылӧ коланасӧ, мый сэтісь бурыс?

¹⁷ Сідз и веритӧмыс. Веритӧмыссянь абу кӧ бурсӧ керӧмыс, сэк сія абутӧм туйӧ.

¹⁸ Поди, кинкӧ висьталас: «Ӧтіклӧн эм веритӧм, а мӧдіклӧн эм керӧм». Сылӧ висьтала сідз: «Мыччав меным веритӧмтӧ керӧмыттӧг. А ме мыччала веритӧмӧс бурсӧ керӧмнам».

¹⁹ Тэ бурӧ керан, веритан кӧ: Еныс ӧтік. И сэрпӧсь ловвес веритӧны да зэгсьӧны-полӧны.

²⁰ Оз я ков тэныт тӧдны, учӧт мывкыда морт: веритӧмыс керӧмыстӧг абутӧм туйӧ?

²¹ Миян Авраам айным эз я вӧв керӧмыс кузя пуктӧм Ен сьӧрті веськыта олісьӧ? Сія тай езъяланін вылас пуктылӧм ассис Исак зонсӧ.

²² Адззан, веритӧмыс сылӧ отсалӧм керны коланасӧ. А керӧмыссянь веритӧмыс вынсялӧм.

²³ Петӧм Вежа Гижӧтас висьталӧм сьӧрті: «Авраамыс веритӧм Еныслӧ, сы понда сія вӧлі пуктӧм Ен сьӧрті веськыта олісьӧ». Сійӧн и шуӧмась Авраамсӧ Енлӧн ёртӧн.

²⁴ Адззатӧ, мортыс лоӧ Ен сьӧрті веськыта олісьӧн веритӧмыссянь керӧмыс понда, оз дзир ӧтік веритӧм понда.

²⁵ Сідз и Раав, лэдзчисьӧм инькаыс, керӧмыс понда эз я вӧв пуктӧм Ен сьӧрті веськыта олісьӧ? Сія эд этӧ мусӧ видзӧтісь иудейесӧ лэдзӧм гортас да иньдӧм нійӧ мӧдік туй вылӧт.

²⁶ Мортыс оз кӧ лолав, сія кулӧм. Сідз и мортлӧн веритӧмыс: бурсӧ нем оз кӧ кер, сія кулӧм.