Осьтӧм 8 - Бур Юӧр 2019

¹ Дзельыс жугдіс сизимӧт пассӧ. Енӧжас шы не тӧв лоис. Сідз вӧлі джын час мымда.

² Ме казялі сизим ангелӧс. Нія сулалісӧ Еныс одзын. Нылӧ сетӧмась сизим буксан.

³ Сэсся сибӧтчис эшӧ ӧтік ангел да сувтіс езъяланіныс одзӧ. Сія киас видзис зарниись тшынӧтчан доз. Сылӧ вӧлі сетӧм уна ладан. Сійӧ ӧтлаын вежа отирлӧн кеймӧммезӧн колӧ пуктыны зарниись езъяланін вылӧ, кӧда сулаліс юралан пукӧс одзас.

⁴ Ангелыс киись ладансянь чӧскыт руа тшыныс ӧтлаын вежа отирлӧн кеймӧммезӧн лэбтісис Еныс дынӧ.

⁵ Сэсся ангелыс босьтіс тшынӧтчан дозсӧ, тыртіс сійӧ езъяланін вылісь бинас да шупкис му вылас. Сэтӧн кылісӧ гора шыэз, пондіс вирдавны-гымавны, муыс ёна зэгаліс.

Ангеллэзлӧн буксаннэзӧ пӧльтӧм

⁶ Сизим ангел лӧсьӧтчисӧ пӧльтны сизим буксанӧ.

⁷ Медодзза ангеллӧн пӧльтӧм коста му вылас киссис вир сора биа шер. Сысянь муыслӧн да пуэслӧн куимӧт торыс сотчисӧ. Быдӧс зелёнӧй туруныс сотчис.

⁸ Мӧдік ангел пондіс пӧльтны аслас буксанӧ. Сэк биӧн сотчан ыджыт керӧс кодь мыйкӧ усис саридзас. Сысянь саридзыслӧн куимӧт торыс пӧртчис вирӧ.

⁹ Саридзас оліссез коласісь куимӧт торыс куліс. Корабллеслӧн куимӧт торыс вӧйис.

¹⁰ Куимӧт ангел пондіс пӧльтны аслас буксанӧ. Сэк енӧжсис ӧгралӧмӧн усис ыджыт кӧдзув. Сія усис юэзлӧн да ва петаніннэзлӧн куимӧт тор вылӧ.

¹¹ Кӧдзулыслӧн нимыс вӧлі Курыт урбӧж. Быдӧс ваэслӧн куимӧт торыс курзис. Сія курзьӧм васянь унаӧн кулісӧ.

¹² Нёльӧт ангел пондіс пӧльтны аслас буксанӧ. Сэк шондіыслӧн, тӧлісьыслӧн да кӧдзуввеслӧн куимӧт торрезныс изводасисӧ да кусісӧ. Сійӧн луныслӧн да ойыслӧн куимӧт торныс пемдіс.

¹³ Сэсся ме казялі, кыдз енӧж шӧрӧттяс лэбзис ангел. Ме кылі сылісь горӧн висьтавлӧмсӧ: «Умӧль, умӧль, умӧль лоас му вылын оліссеслӧ куим ангеллӧн буксан шысянь. Нія чожа пондасӧ пӧльтны!»