Осьтӧм 6 - Бур Юӧр 2019

¹ Ме адззылі: Дзельыс сераку вывсис жугдіс сизимсис медодзза пассӧ. Сэсся кылі, кыдз енӧжись оліссез коласісь ӧтікыс гымалан шыӧн горӧтчіс: «Лок да видзӧт!»

² Ме видзӧті да казялі чочком вӧлӧс. Вӧв вылас верзьӧмӧн пукалісь киын вӧлі ньӧв. Сылӧ вӧлі сетӧм юркытш. Сія петіс вермалісь моз да медбы бӧра вермыны.

³ Дзельыс жугдіс мӧдік пассӧ. Ме кылі енӧжын мӧдік олісьлісь висьталӧмсӧ: «Лок да видзӧт!»

⁴ Сэк петіс мӧдік вӧв. Сія вӧлі би кодь гӧрд. Сы вылын верзьӧмӧн пукалісьлӧ вӧлі сетӧм вын босьтны му вывсис отирыс коласын лӧсялӧмсӧ, медбы отирыс вийлісӧ ӧтамӧднысӧ. Сылӧ вӧлі сетӧм ыджыт шыпурт.

⁵ Дзельыс жугдіс куимӧт пассӧ. Сэк ме кылі енӧжын оліссес коласісь куимӧтыслісь висьталӧмсӧ: «Лок да видзӧт!» Сэтӧн ме казялі сьӧд вӧлӧс. Сы вылын верзьӧмӧн пукалісьыс киас видзис ӧшлісян.

⁶ Нёль енӧжись оліссез шӧрись ме кылі висьталӧм: «Ӧтік хиникс шогдіыс сулалӧ динарий. Куим хиникс идыс ─ динарий. Висӧ да винасӧ эн тшыкӧт!»

⁷ Кӧр Дзельыс жугдіс нёльӧт пассӧ, ме кылі енӧжын нёльӧт олісьлісь висьталӧмсӧ: «Лок да видзӧт!»

⁸ Ме видзӧті да казялі чавмӧм вӧлӧс да сы вылын верзьӧмӧн пукалісьӧс. Нимыс сылӧн ─ Кулӧм. Сы бӧрын муніс Адыс. Кулӧмыс кипод увтӧ вӧлі сетӧм муыслӧн нёльӧт торыс. Сія мунӧ вийны шыпуртӧн, тшыгьялӧмӧн, лёк пӧрӧсӧн да вӧрпаэзӧн.

⁹ Дзельыс жугдіс витӧт пассӧ. Ме казялі езъяланін увтсис отирлісь ловвесӧ. Нійӧ вӧлі вийӧмась Енлӧн Кыв понда да Ен йылісь висьтасьӧм понда.

¹⁰ Нія горӧтлісӧ: «Вежа да былись Юралісь! Мыля ӧнӧдз он мыжйы му вылісь оліссесӧ? Кӧр пондан вештісьны миян кисьтӧм вир понда?»

¹¹ Сэк нылӧ быдӧнныслӧ сетісӧ чочком паськӧм. Нійӧ тшӧктісӧ невна видзчисьыштны. Ась пӧ тырӧ лыдыс ны моз вийӧммезнас. Лыдсӧ содтасӧ воннэзныс да ны моз уджаліссес.

¹² Дзельыс жугдіс кватьӧт пассӧ. Сэк муыс ёна зэгаліс. Шондіыс пемдіс, рӧмнас лоис сьӧд ной кодь. Тӧлісьыс лоис вир рӧма.

¹³ Енӧжсис кӧдзуввес усисӧ му вылас, кыдз дзор туссес вына тӧвсянь усялӧны инжир пу вывсис.

¹⁴ Енӧжыс юкӧ каттисис да ӧшис. Быдӧс керӧссэс да ваэз шӧрись муэс вешшисӧ.

¹⁵ Му вылісь ӧксуэс, вылына пуктӧммес, бура оліссес, сюрс воинӧн веськӧтліссес, вынаэс, раббес, кӧзяиннэс дзебсисисӧ му гырккезӧ да керӧс колассэзӧ.

¹⁶ Керӧссэслӧ да иззэслӧ нія шуисӧ: «Усьӧ-буждӧ миян вылӧ, сайӧвтӧ миянӧс юралан пукӧс вылас Пукалісьыс син одзись да дзебӧ Дзельыс лӧг шогья.

¹⁷ Локтіс тай Сылӧн ыджыт Лӧг луныс. Кин вермас видзсьыны?»