Осьтӧм 15 - Бур Юӧр 2019

¹ Енӧжсис ме казялі эшӧ ӧтік вына мыччалан пас, кӧдасянь диво кутіс. Ме казялі сизим ангелӧс, кӧдна видзисӧ медбӧрья сизим умӧльсӧ. Этна медбӧрья умӧллезӧн чулалӧ Енлӧн лӧгыс.

² Ме адззылі мыйкӧ стеклоись саридз кодьӧ, сія кыдз биӧн ӧграліс. Сы вылын сулалісӧ вӧрпасӧ вермиссес. Нія вермисӧ и вӧрпаыс вылӧ вачкисяна керӧмсӧ да сы нимлісь лыд пассӧ. Киэзаныс нылӧн вӧлісӧ Еныслӧн сиа орсаннэз.

³ Нія сьылісӧ Енлӧн Моисей раблісь да Дзельыслісь сьыланкывсӧ: ─ Дӧсвидзись, Дӧсвермись Енӧ! Вынаӧсь Тэнат керӧммет, диво кутӧ! Веськытӧсь да быльӧсь Тэнат туйезыт, вежа отирлӧн Ӧксу!

⁴ Дӧсвидзисьным, Кин оз пов Тэись да оз сьылӧт Тэнчит нимтӧ? Тэ эд Ӧтнат вежаыс. Быд отирись йӧзыс локтас да копыртчас Тэныт. Ӧні эд быдӧнныс адззӧны Тэнчит веськыта судитӧмметӧ.

⁵ Сыбӧрын ме видзӧті да казялі: енӧжас оссис Вежа Керкуыс ─ скинияыс.

⁶ Сэтісь петісӧ сизим ангел медбӧрья сизим умӧльнас. Нія пасьтасьӧмась лёнісь сӧстӧм свиттялан паськӧмӧ. Морос вылӧттяныс йыасьӧмась зарниись йыӧн.

⁷ Нёль енӧжись олісь коласісь ӧтікыс сетіс сизим ангеллӧ зарниись сизим доз. Нія вӧлісӧ тыраӧсь пырся олісь Енлӧн лӧгӧн.

⁸ Сэк Енлӧн югьялӧмсянь да Сылӧн вынсянь Вежа Керкуыс тырис тшынӧн. Сэтчӧ некин оз вермы пырны, кытчӧдз эзӧ чулалӧ ангеллэзлӧн вайӧм сизим умӧльыс.