Осьтӧм 14 - Бур Юӧр 2019

¹ Ме видзӧтышті да казялі: Дзельыс сулалӧ Сион керӧс вылын. Сыкӧт ӧтлаын сулалӧны сё нёльдас нёль сюрс морт. Кымӧс вылас нылӧн гижӧм Сы Айлӧн нимыс.

² Ме кылі енӧжсянь баитан шы, кӧда вачкисис уна ва усян шы вылӧ да ӧддьӧн гымалӧм шы вылӧ. Кыліс и шы, жыв орсісӧ сиа орсаннэз вылын.

³ Енлӧн юралан пукӧс одзын, нёль енӧжись олісь одзын да пӧриссес одзын нія сьылісӧ виль сьыланкыв. Сійӧ сьыланкывсӧ сьывны некин эз вермы велавны. Сійӧ сьылісӧ дзир сё нёльдас нёль сюрс мортыс, кӧдна небӧмась му вывсис.

⁴ Нія инькаэзкӧт узьлӧмӧн асьнысӧ эз сэрпӧсьтӧ, нія сӧстӧмӧсь. Нія мунӧны Дзельыс сьӧрӧ, кытчӧ бы Сія эз мун. Му вылісь отир коласісь нія медодзза небӧммез Еныслӧ да Дзельыслӧ.

⁵ Ны ӧмись некӧр эз петлы бӧбӧтчӧмыс, Енлӧн юралан пукӧс одзын нія сӧстӧмӧсь.

Куим ангел

⁶ Сыбӧрын ме казялі: енӧж шӧрӧттяс лэбзис мӧдік ангел. Сылӧн вӧлі пырся Бур Юӧр. Сылӧ коліс Юӧрсӧ висьтасьны му вылас оліссезлӧ: быд увтырлӧ, быд чужан вужлӧ, быдкодь кыв вылын баитіссезлӧ да быд отирлӧ.

⁷ Сія горӧн висьтавліс: «Полӧ Енсис да ошкӧ Сійӧ, локтіс Сылӧн Суд Луныс! Енӧжсӧ, мусӧ, саридзсӧ да ва петаніннэсӧ Аркмӧтісьыслӧ копыртчӧ!»

⁸ Сы сьӧрын лэбзис мӧдік ангел. Сія висьталіс: «Разьсис, разьсис Вавилон, ыджыт кар! Сія эд быдӧс отирсӧ кыдз винаӧн кодззӧтліс аслас пӧтлытӧг кыскасьӧмӧн».

⁹ Одзза кык ангел бӧрсянь лэбзис куимӧт ангел. Сія горӧн висьтавліс: «Кин копыртчас кӧ вӧрпаыслӧ да сы кодь керӧмыслӧ да лэдзас пуктыны сылісь пассӧ кымӧс вылас али ки вылас,

¹⁰ сія пондас юны Еныс лӧгись керӧм сорлавтӧм вина. Сія пондас юны Ен лӧгӧн тырӧм дозісь. Вежа ангеллэс да Дзельыс одзын пондасӧ сійӧ маитны биын да сотчан истӧгын.

¹¹ Нійӧ маитансянь тшыныс пыр пондас кайны. Вӧрпаыслӧ да сы кодь керӧмлӧ копрасисьыс да сылісь ним пассӧ пуктісьыс зникасӧ оз понды тӧдны ойӧн не, лунӧн не.

¹² Вежа отирлӧ, кӧдна олӧны Енлӧн тшӧктӧммез сьӧрті да веритӧны Исуслӧ, колӧ видзсьыны мыланыс быртӧг».

¹³ Сэк ме кылі шы, кӧда висьталіс меным енӧжсянь: «Гиж: Шудаӧсь нія, кӧдна ӧнісянь кулӧны Дӧсвидзисьлӧ веритӧмӧн. "Сідз эд", шуӧ Лов. "Ӧні нія шоччисясӧ асланыс уджжезісь. Нылӧн керӧмныс локтӧ ны бӧрсянь"».

Му вылын вундӧм

¹⁴ Ме видзӧтышті да казялі чочком кымӧр. Кымӧр вылас пукаліс кинкӧ Морт Зон кодь. Юр вылас Сылӧн вӧлі зарниись юркытш, киас ─ лэчыт чарла.

¹⁵ Сэтӧн Вежа Керкусис петіс эшӧ ӧтік ангел. Сія горӧтіс кымӧр вылас Пукалісьлӧ: «Босьт Ассит чарлатӧ да вунды. Вунданнэс му вылас воисӧ, вундан кадыс локтіс».

¹⁶ Сэк кымӧр вылас Пукалісьыс чарласӧ шентіс му вылас. Му вывсис воӧмыс вӧлі вундӧм.

¹⁷ Енӧжын Вежа Керкуись петіс мӧдік ангел. Лэчыт чарла вӧлі и сылӧн.

¹⁸ Езъяланіныс дынсянь петіс эшӧ ӧтік ангел. Сылӧ вӧлі сетӧм би видзан вын. Лэчыт чарланас ангелыслӧ сія горӧтіс: «Босьт ассит лэчыт чарлатӧ да му вывсис орлав виноград вывсис роззэсӧ, ягӧдыс эд воис ни».

¹⁹ Ангелыс шентіс ассис чарласӧ му вылас да орлаліс виноград роззэсӧ. Сія чапкис виноградсӧ Ен лӧгӧн тырӧм ыджыт пичканінӧ.

²⁰ Виноград туссесӧ талисӧ кар сайын пичканінас. Пичканінсис вирыс лэбтісис вӧввез сермӧтӧдз да визывтіс сюрс кватьсё стадий кузя.