Матвей 2 - Бур Юӧр 2019

¹ Исусыс чужис Иудея муын, Вифлеем карын. Сія муын юралісьнас сэк вӧлі Ирод ӧксу. Исус чужӧм бӧрын Ерусалимас локтісӧ асывланись мывкыда отир.

² Нія юалісӧ: «Кытӧн иудейезлӧн чужӧм Ӧксуыс? Мийӧ асывланьсис адззылім Сылісь кӧдзувсӧ да локтім Сылӧ копыртчыны».

³ Сэтшӧмсӧ кылӧмсянь Ирод ӧксуыс повзьӧм, ӧтлаын сыкӧт повзьӧмась Ерусалимын оліссес.

⁴ Ирод ӧктӧм дынас аркирейесӧ Туйдӧтӧ велӧтіссескӧт. Сія нылісь юасьӧм: «Кытӧн чужас Кристос-Мездӧтісьыс?»

⁵ Нія сылӧ висьталӧмась: «Иудея муын, Вифлеем карын. Сідз тай гижӧм Енсянь юӧртісьыс:

⁶ ─ Тэ, Иуда муись Вифлеем кар, Иудаись мӧдік каррезся абу учӧтжык. Тэись петас ыджыт Юралісь, Менам Израиль отир сьӧрын Видзӧтісь».

⁷ Иродыс гусьӧн корӧм дынас мывкыда отирсӧ да юалӧм кӧдзувлісь петан кадсӧ.

⁸ Сэсся сія иньдӧтӧм нійӧ Вифлеем карас да висьталӧм: «Ветлӧ, Кагаыс йылісь быдӧс тӧдмалӧ. Кагасӧ адззӧм бӧрын юӧртӧ меным, и ме ветла Сылӧ копыртчыны».

⁹ Ӧксуӧс кывзӧм бӧрын нія петісӧ туйӧ. Сэк асывланьын адззылӧм кӧдзулыс пондіс одзаныс лэбзьыны. Сія локтіс сэтчӧдз, кытӧн вӧлӧм Кагаыс да сувтчис.

¹⁰ Кӧдзувсӧ адззылӧмсянь локтіссес ӧддьӧн гажмисӧ.

¹¹ Керкуӧ пырӧм бӧрын нія казялісӧ кагасӧ Мария Мамыскӧт. Кӧдзуввес сьӧрын видзӧтіссес сувтісӧ пидзӧс выланыс да копыртчисӧ Исусыслӧ. Нія осьтісӧ коробьянысӧ да козьналісӧ Сылӧ дона козиннэз: зарни, ладан, смирна.

¹² Узьтӧнняныс Еныс ӧліс нійӧ, эз лэдз бертны Иродыс дынӧ. Сійӧн нія гортаныс мунісӧ мӧдік туй вылӧт.

Египетӧ пышшӧм

¹³ Кӧдзуввез сьӧрын видзӧтіссес мунӧм бӧрын Ӧсиплӧ вӧтӧ уськӧтчис Енлӧн ангел. Сія висьталіс: «Чеччы, босьт Кагасӧ Мамыскӧт да пышшы Египетӧ. Сэтчин ов менам висьтавтӧдз. Иродыс мӧдӧ Кагасӧ кошшыны, медбы вийны».

¹⁴ Ӧсип саймис, босьтіс Кагасӧ Мамыскӧт да ойнас иньдӧтчис Египетӧ.

¹⁵ Сэтчин сія оліс Иродыс кувтӧдз. Сідз керсисӧ Енсянь юӧртісь пыр Дӧсвидзисьлӧн этна висьталӧм кыввес: «Египет муись Ме кори Зонӧс».

Вифлеем карись кагаэзӧс вийлӧм

¹⁶ Иродыс казялӧм: асывланись мывкыда отир сійӧ бӧбӧтӧмась. Сія ӧддьӧн лӧгасьӧм. Иродыс тшӧктӧм Вифлеем карсис да сы гӧгӧр оланіннэзісь кык вося да учӧтжык зоночкаэсӧ вийны. Кагаыслісь чужан кадсӧ Иродыс тӧдӧм асывланись вовлӧм йӧзсянь.

¹⁷ Сідз керсьӧм Енсянь юӧртісь Иеремия пыр висьтавлӧмыс:

¹⁸ ─ Рама карын горзӧм, герьясьӧм кылӧ. Рахиль аслас челядь понда горзӧ, да оз вермы бурасьны, нія эд абуӧсь ни.

Египетісь бертӧм

¹⁹ Иродыс кулӧм. Сэк Египет муын Ӧсиплӧ вӧтӧ уськӧтчис Енлӧн ангел.

²⁰ Сія шуис: «Чеччы, босьт Кагасӧ Мамыскӧт да бӧр мун Израильӧ. Кӧдна мӧдісӧ вийны Кагасӧ, нія кулісӧ».

²¹ Ӧсипыс чеччис, босьтіс Кагасӧ Мамыскӧт да бӧр бертіс Израиль муӧ.

²² Ӧсипыс кыліс, Ирод кулӧм бӧрын Иудея муын пӧ веськӧтлӧ сылӧн Аркелай зоныс. Иудея муас мунны Ӧсипыс поліс. Сэк вӧтын сылӧ вӧлі висьталӧм мунны Галилея муӧ.

²³ Сэтчин локтӧм бӧрын Ӧсип пондіс овны Назарет карын. Сідз аркмис Енсянь юӧртіссез пыр висьтавлӧмыс: «Сійӧ пондасӧ шуны "Назаретісь морт"».