Марк 8 - Бур Юӧр 2019

¹ Нія луннэзӧ бӧра ӧксисӧ уна отир. Нылӧ нем вӧлі сёйны. Исусыс корис Ассис велӧтчиссесӧ да висьталіс:

² «Менам сьӧлӧмӧ висьӧ отирыс понда. Куим лун ни нія Мекӧт, а сёйны нылӧ нем.

³ Лэдза кӧ нійӧ гортаныс сёйтӧг, туй вылас садьныс бырас. Мукӧдыс эд ылісянь локтісӧ».

⁴ Велӧтчиссес Сылісь юалісӧ: «Кин вермас адззыны эстӧн кушмуас няньсӧ, медбы вердны нійӧ?»

⁵ Исусыс нылісь юаліс: «Мымда тіян няньныт?» Нія висьталісӧ: «Сизима».

⁶ Исусыс тшӧктіс отирсӧ пуксьыны му вылас. Сія босьтіс сизим няньсӧ, буркывтіс Енсӧ, чеглаліс няньсӧ да сетіс аслас велӧтчиссезлӧ, медбы нія сеталісӧ отирыслӧ. Мӧддэс сеталісӧ сійӧ быдӧнныслӧ.

⁷ Нылӧн вӧлі невна чери. Исусыс бласлӧвитіс да тшӧктіс сетавны черисӧ.

⁸ Отирыс сёйисӧ да пӧтісӧ. Кольччӧм торресӧ ӧктісӧ сизим куд.

⁹ Сёйиссес вӧлісӧ нёль сюрс гӧгӧр морт. Исусыс лэдзис отирсӧ горттэзаныс.

¹⁰ Сія сэк жӧ Аслас велӧтчиссезкӧт пуксис пыжӧ да уйис Далманута муӧ.

Мыччалан пас корӧм

¹¹ Локтісӧ фарисейез да пондісӧ Исусыскӧт етшасьны. Сійӧ кутӧм могись нія корисӧ, медбы Сія керис енӧжсянь мыччалан пас.

¹² Исусыс пыдына ловзисис да шуис: «Ӧння кадӧ оліссес мыйлӧ корӧны енӧжись пассӧ? Быльсӧ висьтала тіянлӧ: нылӧ оз ло мыччалӧм енӧжись пасыс».

¹³ Сія колис нійӧ, бӧр пуксис пыжас да иньдӧтчис ты мӧдӧрас.

Фарисейезлӧн велӧтӧммезісь ӧлӧм

¹⁴ Велӧтчиссес вунӧтӧмась босьтны няньсӧ, сьӧраныс вӧлӧм дзир ӧтік нянь.

¹⁵ Исусыс шуис нылӧ: «Видзӧтӧ, фарисейезлӧн да Иродлӧн нянь шӧмись асьнытӧ видзӧ».

¹⁶ Велӧтчиссес ас коласаныс баитісӧ: «Миян няньыс абу да сійӧн Сія сідз и висьталіс».

¹⁷ Исусыс тӧдіс нылісь баитӧмнысӧ да шуис: «Мый баитатӧ, тіян няньыс абу? Тійӧ ӧнӧдз одӧ вежӧртӧ да одӧ ылӧстӧ? Тіян мый, сьӧлӧмныт чорзис?

¹⁸ Эмӧсь синнэзныт, да одӧ адззӧ? Эмӧсь пеллезныт, да одӧ кылӧ? И тӧдвыланыт одӧ видзӧ?

¹⁹ Кӧр ме вит няньсӧ чеги вит сюрс мортлӧ, кыным куд тійӧ тыртіт кольччӧм нянь торрезнас?» Велӧтчиссес шуисӧ: «Даскыкӧ».

²⁰ «А кӧр сизим няньсӧ чеги нёль сюрс мортлӧ, кыным куд тыртіт кольччӧм нянь торрезнас?» Нія висьталісӧ: «Сизимӧ».

²¹ Исусыс шуис нылӧ: «Кыдз инӧ ӧнӧдз одӧ вежӧртӧ?»

Синтӧмлісь синнэз осьтӧм

²² Нія локтісӧ Вифсаидаӧ. Исусыс дынӧ вайӧтісӧ синтӧмӧс да корисӧ павкӧтчыны сы бердӧ.

²³ Исусыс кутіс синтӧмсӧ киӧттяс да петкӧтіс посадсис. Сьӧвзьыштіс синнэзас, пуктіс сы вылӧ киэсӧ да юаліс: «Адззан я мыйкӧ?»

²⁴ Синтӧмыс видзӧтіс да шуис: «Адзза ветлӧтісь отирӧс, нія пуэз кодьӧсь».

²⁵ Сэсся Исусыс бӧра пуктыліс киэсӧ сы синнэз вылӧ да тшӧктіс видзӧтны. Мортыс веськаліс да пондіс бура адззыны.

²⁶ Исусыс ыстіс сійӧ гортас да висьталіс: «Посадсӧ орддьы, некинлӧ эн висьтась».

Петра шуӧ Исуссӧ Кристос-Мездӧтісьӧн

²⁷ Исусыс Аслас велӧтчиссезкӧт муніс Филиплӧн Кесария посаддэзӧ. Туй вылас Сія нылісь юасис: «Кин туйӧ пуктӧны Менӧ отирыс?»

²⁸ Велӧтчиссес висьталісӧ: «Ӧтіккез ─ Пыртісь Иоан туйӧ, мӧдіккез ─ Илля туйӧ, мукӧдыс ─ ӧтік пӧ Енсянь юӧртіссез коласісь».

²⁹ Сія юаліс нылісь: «А тійӧ кин туйӧ Менӧ пуктат?» Петра Сылӧ висьталіс: «Тэ ─ Кристос-Мездӧтісь».

³⁰ Исусыс велӧтчиссесӧ ӧліс, медбы нія Сы йылісь некинлӧ эз висьтасьӧ.

Исуслӧн Аслас кулӧм йылісь висьталӧм

³¹ Исусыс велӧтчиссеслӧ пондіс баитны: «Морт Зонлӧ ковсяс уна пессьыны-мырсьыны. Бӧрйӧм пӧриссес, аркирейес да Туйдӧтӧ велӧтіссес Сійӧ абутӧм туйӧ пуктасӧ да виясӧ. Но куим лун бӧрті Сія ловзяс».

³² Исусыс одзланьсяыс йылісь висьталіс веськыта. Сэк Петраыс кежӧтіс Сійӧ да пондіс ӧвны.

³³ Исусыс бергӧтчис велӧтчиссеслань, видзӧтіс ны вылӧ да чорыта ӧмаліс Петрасӧ: «Вешшы Ме дынісь, сотана! Тэнат юрат пыртӧмыт мортлӧн, абу Енлӧн».

Исус сьӧрӧ мунӧм йылісь

³⁴ Исусыс корис отирсӧ да Ассис велӧтчиссесӧ. Нылӧ висьталіс: «Кин мӧдӧ мунны Ме сьӧрӧ, ась вунӧтӧ асьсӧ, босьтӧ ассис крестсӧ да мунӧ Ме бӧрсянь.

³⁵ Кин мӧдӧ видзны ассис олансӧ, сійӧ ӧштас. Кин ӧштас ассис олансӧ Ме понда да Бур Юӧр понда, сійӧ мездас.

³⁶ Мый бурыс мортлӧ, босьтас кӧ сія быдӧс му вылісьсӧ, а ассис олансӧ ӧштас?

³⁷ Мый вермас сетны мортыс, медбы бӧр небны ассис олансӧ?

³⁸ Ӧння кадӧ олӧны умӧльсӧ керись, лэдзчисьӧм отир. Ны одзын кинлӧ тӧдны Менӧ да Менчим кыввезӧс рожа кулян, и сійӧ мортсӧ тӧдны Морт Зонлӧ лоас рожа кулян, кӧр локтас Айыс югьялӧмӧн вежа ангеллэзкӧт».