Марк 7 - Бур Юӧр 2019

¹ Исусыс дынӧ локтісӧ фарисейез да Ерусалимись кынымкӧ Туйдӧтӧ велӧтісь.

² Нія казялісӧ, кыдз Сылӧн мукӧд велӧтчиссес сёйисӧ няньсӧ мисьтӧм киэзӧн.

³ Фарисейес да и иудейес быдӧнныс керӧны айезлӧн висьтавлӧм сьӧрті: озӧ сёйӧ мисьтӧм киэзӧн.

⁴ Вузасянінісь локтӧм бӧрын озӧ сёйӧ миссьытӧг. Нія и уна мый мӧдік тшӧктӧммез сьӧрті керӧны: миссьӧтӧны бекӧрпань, пусян доззэз, лабиччез.

⁵ Фарисейес да Туйдӧтӧ велӧтіссес юалісӧ Исусыслісь: «Мыля Тэнат велӧтчиссет озӧ олӧ кӧркӧсянь ни айезнымлӧн висьтавлӧм сьӧрті? Мыля няньсӧ сёйӧны мисьтӧм киэзӧн?»

⁶ Сія нылӧ висьталіс: «Ылӧтлісь отир! Тіян йылісь бура висьтавлӧм Енсянь юӧртісь Исай. Гижӧм тай: ─ Эта йӧзыс дзир ӧмнаныс Менӧ бурӧ пуктӧны. Нылӧн сьӧлӧмныс эд Ме дынсянь ылын видзсьӧ.

⁷ Весись нія Меным копрасьӧны мортлӧн тшӧктӧммезӧ велӧтікӧ.

⁸ Тійӧ колит Енлісь тшӧктӧмсӧ да керат мортлӧн висьталӧм сьӧрті: паньбекӧр миськалӧммез да уна мый мӧдікӧ сэтшӧммесӧ».

⁹ Исусыс нылӧ висьталіс: «Бура жӧ тійӧ Енлісь тшӧктӧмсӧ абутӧм туйӧ пуктат, медбы керны айезныт висьтавлӧм сьӧрті!

¹⁰ Моисейыс висьтавлӧм: "Ай-мамтӧ бурӧ пукты". "Кин умӧля баитӧ ай-мам йылісь, сійӧ колӧ сетны вийны".

¹¹ А тійӧ тай отирсӧ сідз велӧтат: морт кӧ ай-мамлӧ висьталас, мыйӧн ме верми бы тіянлӧ отсавны, сія Енлӧ козин ─ "корбан".

¹² Сідз велӧтӧмнаныт тійӧ отирсӧ лэдзатӧ овны ай-мамлӧ отсасьтӧг.

¹³ Айезныт тшӧктӧм сьӧрті керӧм кузя тійӧ Енлісь Кывсӧ абутӧм туйӧ пуктат. Уна мый мӧдікӧ сэтшӧмсӧ керат».

Мортсӧ мый сэрпӧсьтӧ

¹⁴ Исусыс бӧра корис быдӧс отирсӧ да шуис нылӧ: «Кывзӧ Менӧ быдӧнныт да вежӧртӧ.

¹⁵ Мортсӧ оз сэрпӧсьт ӧмӧттяс пытшкас пырӧмыс, мортсӧ сэрпӧсьтӧ ӧмсис петӧмыс.

¹⁶ Пеля мортыс ась кылӧ!»

¹⁷ Отирыс дынісь Исусыс пырис керкуӧ. Сэк велӧтчиссес юалісӧ висьталӧмыс йылісь.

¹⁸ Сія висьталіс нылӧ: «И тійӧ ӧнӧдз одӧ вежӧртӧ? Одӧ разь вежӧртӧ: мый мортыс гыркӧ пырӧ ӧмӧттяс, сія оз вермы сэрпӧсьтны?

¹⁹ Сія эд оз пыр сы сьӧлӧмӧ, пырӧ гыркас да бӧр петӧ». Сійӧн Исусыс висьталіс, быдӧс сёяныс пӧ сӧстӧм.

²⁰ Одзлань Сія висьталіс: «Мортісь петӧмыс сэрпӧсьтӧ мортсӧ.

²¹ Мортыс пытшкись эд, сы сьӧлӧмись, петӧны умӧльсӧ керны юрӧ пыртӧммес: гозйӧн олӧм коста ӧтамӧд сайсянь ветлӧтӧм, кыскасьӧм, морт вийӧм,

²² гусясьӧм, горшасьӧм, лӧгалӧм, ылӧтлӧм, лэдзчисьӧмӧн олӧм, завид кутӧм, Ен вылын сералӧм, асьӧс вылына лэбтӧм, мывкыдтӧг олӧм.

²³ Быдӧс эта умӧльыс петӧ мортыс пытшкись да сэрпӧсьтӧ сійӧ».

Инькалӧн веритӧм

²⁴ Сэтчинісь мунӧм бӧрын Исусыс локтіс Тир да Сидон муэзӧ. Сэтчин пырис керкуӧ, медбы некин эз тӧд Сы йылісь, но Сійӧ казялӧмась.

²⁵ Исусыс йылісь кылӧм инька, кӧдалӧн нылыс пытшкын вӧлӧм сэрпӧсь лов. Сія локтіс да уськӧтчис Исус коккезӧ.

²⁶ Инькаыс вӧлі Сирия муын Финикияись, баитіс грек кыв вылын. Сія Исуссӧ корис вашӧтны сэрпӧсь ловсӧ нылыс пытшкись.

²⁷ Исусыс сылӧ висьталіс: «Сёянсӧ пӧттӧдз сёйны медодз колӧ сетны челядьлӧ. Абу бур босьтны челядьлісь няньсӧ да чапкыны поннэзлӧ».

²⁸ Инькаыс висьталіс Сылӧ: «Сідз, Дӧсвидзисьӧ! Но и поннэс эд сёйӧны челядьыс пызан вылісь усялӧм нянь тороккесӧ».

²⁹ Исусыс сылӧ висьталіс: «Сідз кӧ тэ висьталін, верман мунны гортат. Сэрпӧсь лолыс петіс нылыт пытшкись».

³⁰ Инькаыс локтӧм гортас да казялӧм: нылыс куйлӧ ольпасьын, сэрпӧсь лолыс сы пытшкись петӧм.

Пельтӧм морт пондӧ кывны

³¹ Тир да Сидон муэзісь мунӧм бӧрын Исусыс Дас карлӧн муӧт бӧра локтіс Галилея ты дорӧ.

³² Сы дынӧ вайӧтісӧ мортӧс, кӧда эз кыв да умӧля баитіс. Вайӧтіссес корисӧ Сійӧ пуктывны мортыс вылӧ кисӧ.

³³ Исусыс кежӧтіс сійӧ отирыс дынісь. Сія сюйыштліс чуннесӧ сылӧ пеллезас, сьӧвзис чуннес вылӧ да павкӧтчис сы кыв бердӧ.

³⁴ Исусыс видзӧтіс енӧжӧ, ышловзисис да висьталіс мортыслӧ: «Эффата!», мый позьӧ вуджӧтны: «Оссьы!»

³⁵ Сэк жӧ мортыс пондіс кывны. Сылӧн кылыс вӧрзис, сія пондіс бура баитны.

³⁶ Исусыс эз тшӧкты некинлӧ висьтасьны лоӧмыс йылісь. Но кыным унажык Сія ӧліс, сыным ӧддьӧнжык отирыс висьтасисӧ.

³⁷ Отирсӧ ёна диво кутіс. Нія баитісӧ: «Быдӧс бура керӧ: пельтӧммесӧ керӧ кыліссезӧн, кывтӧммесӧ ─ баитіссезӧн».