Марк 5 - Бур Юӧр 2019

¹ Исусыс велӧтчиссескӧт вуджис ты мӧдӧрись Гадара муӧ.

² Кӧр Исусыс чеччис пыжсис, сэк жӧ панталіс Сійӧ керӧс гыркын дзебсянінісь петӧм морт. Сійӧ вӧлі видзӧм-маитӧм сэрпӧсь лов.

³ Сылӧн оланіныс вӧлі дзебсяніннэзын, и некин эз вермы сійӧ кӧртавны нельки цеппезӧн.

⁴ Сылісь ки-коксӧ унаись кӧртавлісӧ, дорлісӧ цеппезӧн, но сія орлавліс-жугӧтліс кӧртӧттэсӧ. Некин сійӧ эз вермы лӧньсьӧтны.

⁵ Ой и лун, керӧссэзын да дзебсяніннэзын сія пыр горӧтліс да дойдіс асьсӧ иззэзӧн.

⁶ Мортыс ылісянь казялӧм Исуссӧ, котӧрӧн локтіс да копыртчис Сылӧ.

⁷ Сэсся горӧтіс лёк горшӧн: «Исус, Медвылісь Енлӧн Зон! Мый Тэныт ме дорӧдз? Енӧн кора, эн маит менӧ!»

⁸ Исусыс сылӧ висьталіс: «Сэрпӧсь лов, пет эта морт пытшкись».

⁹ Исусыс юаліс сылісь: «Кыдз тэнӧ шуӧны?» Сія висьталіс: «Нимӧ менам Легион, мийӧ эд унаӧсь».

¹⁰ Сія ӧддьӧн корис, медбы Исусыс эз вашӧт нійӧ сія муись.

¹¹ Сэтчин керӧс дорас йирсисӧ ӧддьӧн уна порссез.

¹² Сэрпӧсь ловвес корисӧ Исуссӧ: «Лэдз миянӧс пырны порссес пытшкӧ».

¹³ Исусыс лэдзис. Сэрпӧсь ловвес петісӧ мортыс пытшкись да пырисӧ порссес пытшкӧ. Порсь чукӧрыс керӧс вывсяняс уськӧтчис тыас да вӧйис. А порссес вӧлісӧ кык сюрс гӧгӧр.

¹⁴ Порссес сьӧрын видзӧтіссес котӧртісӧ да висьтасьӧмась лоӧмыс йылісь карас да посаддэзас. Сэтчин оліссес петісӧ видзӧтны, мый лоис.

¹⁵ Нія локтісӧ Исусыс дынӧ да казялісӧ: мортыс, кӧда пытшкын вӧлісӧ легион мымда сэрпӧсь ловвес, пукалӧ паськӧма да вежӧра. Отирыс повзисӧ.

¹⁶ Кӧдна адззылісӧ, мый лоис мортыскӧт да порссескӧт, отирыслӧ висьтасисӧ, кыдз быдӧс вӧлі.

¹⁷ Йӧзыс пондіс корны Исуссӧ мунны ны муись.

¹⁸ Кӧр Исусыс пуксис пыжас, сэрпӧсь ловвезсянь мезмӧм мортыс пондіс корсьыны мунны Сыкӧт.

¹⁹ Исусыс эз лэдз сійӧ и висьталіс: «Мун гортат да висьтась отирнытлӧ, мый тэныт керис Дӧсвидзисьыс да кытшӧм небыт сьӧлӧма Сія вӧлі тэ дынӧ».

²⁰ Мортыс муніс да Дас карлӧн му пасьта пондіс висьтасьны, мый керис сылӧ Исусыс. Быдӧннысӧ диво кутіс.

Нывкаӧс ловзьӧтӧм да инькаӧс веськӧтӧм

²¹ Кӧр Исусыс бӧра вуджис ты мӧдӧрас, Сы дынӧ ӧксисӧ уна отир. Сія вӧлі ты дорын.

²² Сэтчӧ локтіс Иаир нима морт, синагогаын веськӧтлісь. Сія казяліс Исуссӧ да уськӧтчис Сы коккезӧ.

²³ Мортыс ӧддьӧн кеймисис: «Менам нылӧ кулӧ. Лок да пуктыв киэтӧ сы вылӧ, медбы сія веськаліс да кольччис ловья».

²⁴ Исусыс иньдӧтчис юралісьыскӧт. Уна отир мунісӧ бӧрсяняс да Сійӧ ӧтмӧдӧрсянь дзескӧтісӧ.

²⁵ Ӧтік инька шогалӧм вир ӧштан шогӧтӧн даскык во сьӧрна.

²⁶ Сія уна сьӧкытсӧ адззылӧм веськӧтіссезсянь. Инькаыс быдӧс видзыштӧм, мый сылӧн вӧлӧм, но абу веськалӧм, нельки умӧльжык лоӧм.

²⁷ Сія кылӧм Исусыс йылісь. Отир коласӧт инькаыс сибӧтчӧм Исусыс дынӧ мышксяняс да павкӧтчӧм паськӧм бердас.

²⁸ Сія висьталӧм: «И паськӧм бердас павкӧтча кӧ, веськала».

²⁹ Сэк жӧ дугдӧм котӧртны сылӧн вирыс. Сія пытшкас кылӧм шогӧтсис веськалӧмсӧ.

³⁰ Сэк жӧ Исусыс кылӧм пытшксис вын петӧмсӧ. Сія бергӧтчис отирыслань да юаліс: «Кин павкӧтчис Менам паськӧм бердӧ?»

³¹ Велӧтчиссес Сылӧ висьталісӧ: «Тэ адззан, отирыс дзескӧтчӧны Тэ гӧгӧрын, а Тэ юалан: "Кин павкӧтчис Ме бердӧ?"»

³² Исусыс пондіс видзӧтчыны, медбы казявны павкӧтчисьсӧ.

³³ Инькаыс тӧдіс, мый сыкӧт лоис. Повзьӧмувьяс зэгсьӧмӧн сія сибӧтчис, усис Исусыс одзӧ да быдӧс веськыта висьтасис.

³⁴ Исусыс сылӧ висьталіс: «Нылӧй, тэнӧ мездіс веритӧмыт. Мун лӧнь сьӧлӧмӧн, аслат шогӧтісь тэ веськалін».

³⁵ Исуслӧн баитӧм коста веськӧтлісьыс гортісь локтісӧ отир. Нія Иаирыслӧ висьталісӧ: «Тэнат нылыт куліс. Мыйлӧ ни Велӧтісьсӧ падмӧтлыны?»

³⁶ Исусыс кыліс нылісь кыввесӧ да висьталіс Иаирыслӧ: «Эн пов, дзир верит».

³⁷ Исусыс сьӧрас босьтіс Петраӧс, Яковӧс да сылісь Иоан вонсӧ, сэсся некинлӧ эз лэдз мунны.

³⁸ Сія локтіс веськӧтлісьыс керкуӧ да казяліс гажтӧм отирӧс. Нія горзісӧ да горӧн герьясисӧ.

³⁹ Исусыс пырис керкуас да шуис: «Мый тійӧ сэтшӧм гажтӧмӧсь да горзат? Нылочкаыс эз кув, сія узьӧ».

⁴⁰ Сы вылын пондісӧ серавны. Сія быдӧннысӧ тшӧктіс петны, корис сьӧрас нылочкаыслісь ай-мамсӧ да куимнан велӧтчисьсӧ, кӧдна вӧлісӧ Сыкӧт. Нія пырисӧ жырӧ, кытӧн куйліс нылочкаыс.

⁴¹ Исусыс кутіс нылочкасӧ киӧттяс да шуис сылӧ: «Талифа куми», мый позьӧ вуджӧтны: «Нылӧй, тэныт шуа: чеччы».

⁴² Нылочкаыс сэк жӧ чеччис да пондіс ветлӧтны. Сылӧ вӧлі даскык во гӧгӧр. Быдӧннысӧ ӧддьӧн диво кутіс.

⁴³ Исусыс чорыта ӧліс нійӧ, медбы лоӧмыс йылісь некинлӧ эзӧ висьтасьӧ. Сія тшӧктіс нылочкасӧ вердны.