Марк 1 - Бур Юӧр 2019

Пыртісь Иоан

¹ Енлӧн Зон Кристос Исус йылісь Бур Юӧрлӧн пондӧтчӧм.

² Енсянь юӧртісь Исай гижӧм: ─ Тэ одзын Ме ыста Ассим юӧртісьӧс, сія лӧсьӧтас Тэныт туйсӧ.

³ Кушмуын кылӧ горӧтлісьлӧн шы: «Дӧсвидзисьлӧ туйсӧ лӧсьӧтӧ, мунанінсӧ Сылӧ веськӧтӧ».

⁴ Кушмуӧ локтіс Иоан да отирсӧ пыртіс. Сія отирсӧ тшӧктіс бергӧтчыны умӧль керӧммезныс дынісь да пыртчыны, медбы Еныс нылісь умӧль керӧммезнысӧ проститіс.

⁵ Сы дынӧ отирыс вовлывлісӧ Иудея муись быдласянь да Ерусалим карись. Нія висьтасисӧ асланыс умӧль керӧммез йылісь. Сыбӧрын Иоаныс пыртіс нійӧ Иордан юын.

⁶ Иоаныс новйис паськӧмсӧ верблюд гӧнісь да йыасьліс кучик йыӧн. Сія сёйис саранчаэз да вӧр ма.

⁷ Иоан висьтавліс: «Ме бӧрын локтас месся Вынажыкыс. Ме абу туяна морт нельки мышкыртчӧмӧн пӧрччавны Сы кӧмкӧтісь воннесӧ.

⁸ Ме пырті тіянӧс ваӧн, Сія пыртас тіянӧс Вежа Лолӧн».

Исуслӧн пыртчӧм да Сійӧ ылӧтлӧм

⁹ Сія луннэзӧ Галилея муись, Назарет карись локтіс Исус. Иоаныс пыртіс Сійӧ Иордан юын.

¹⁰ Васис петтӧн Исусыс казяліс: енӧжыс оссис, Сы вылӧ дуді моз лэдзчисис Вежа Лов.

¹¹ Енӧжсянь кыліс шы: «Тэ Менам дона Зонӧ, олан гажӧ».

¹² Сэк жӧ Вежа Лов нуӧтіс Исуссӧ кушмуӧ.

¹³ Сэтчин Сія вӧлі нёльдас лун сьӧрна. Сы коста Сійӧ ылӧтліс сотана. Исусыс вӧлі вӧрпаэз коласын, и Сылӧ отсалісӧ ангеллэз.

Медодзза велӧтчиссез

¹⁴ Иоансӧ пуксьӧтісӧ. Сэк Исусыс муніс Галилея муӧ да пондіс висьтасьны отирлӧ Енлӧн Юралӧм йылісь Бур Юӧр.

¹⁵ Сія висьтавліс: «Локтіс кад, Енлӧн Юралӧмыс матын ни! Бергӧтчӧ умӧль керӧммезныт дынісь да веритӧ Бур Юӧрӧ!»

¹⁶ Галилея ты дынӧт мунікӧ Исусыс казяліс кык вонӧс: Симонӧс да сылісь Ӧндрей вонсӧ. Кыкнанныс кыяннысӧ вӧтьӧны вӧлі ваас. Нія эд вӧлісӧ чериаліссез.

¹⁷ Исусыс нылӧ шуис: «Локтӧ ме сьӧрӧ. Ме кера тіянӧс морт кыйиссезӧн».

¹⁸ Нія сэк жӧ колисӧ ассиныс кыяннэсӧ да мунісӧ Сы бӧрсянь.

¹⁹ Одзлань мунтӧн Исусыс казяліс Зеведейлісь Яков да Иоан зоннэсӧ. Нія пыжын дӧмасалӧны вӧлі кыяннысӧ.

²⁰ Сэк жӧ сія корис Яковсӧ да Иоансӧ сьӧрас. Мӧддэс колисӧ пыжас Зеведей айнысӧ мӧд чериаліссескӧт да мунісӧ Исусыс сьӧрӧ.

Сэрпӧсь лолӧс вашӧтӧм

²¹ Нія локтісӧ Капернаум карӧ. Медодзза шоччисян лунӧ Исусыс пырис синагогаӧ да велӧтіс отирсӧ.

²² Сы велӧтӧмсянь отирсӧ диво кутіс. Сія эд эз велӧт Туйдӧтӧ велӧтіссес моз, а вына юралісь моз.

²³ Сэк жӧ синагогаас вӧлі морт, кӧдӧ видзис-маитіс сэрпӧсь лов. Сія горӧтіс:

²⁴ «Мый Тэныт миян дорӧдз, Назаретісь Исус? Тэ локтін миянӧс изводавны? Тӧда, кин Тэ: Тэ Енлӧн Вежаыс».

²⁵ Но Исусыс висьталіс: «Чӧв! Пет сы пытшкись!»

²⁶ Сэк сэрпӧсь лолыс зэгйис мортсӧ, лёкгоршӧн горӧтіс да петіс сы пытшкись.

²⁷ Быдӧнныс повзисӧ да ӧтамӧдлісь пондісӧ юасьны: «Мый сэтшӧмыс? Кытшӧм сэтшӧм виль велӧтӧм? Сылӧн сэтшӧм вын, нельки сэрпӧсь ловвес Сійӧ кывзісьӧны, мый тшӧктас кӧ керны!»

²⁸ Исусыс йылісь юӧрыс чожа паськаліс быдсӧн Галилея му пасьта.

Шогаліссезӧс веськӧтӧм

²⁹ Синагогаись петӧм бӧрын Исусыс Яковкӧт да Иоанкӧт локтіс Симон да Ӧндрей ордӧ.

³⁰ Симоныс иньлӧн мамыс шогалӧм, сылӧн вывтырыс сотчӧм. Сэк жӧ сы йылісь висьталісӧ Исуслӧ.

³¹ Исусыс сибӧтчис, кутіс сійӧ киӧттяс да чеччӧтіс. Шогӧтыс сэк жӧ чулаліс, и инькаыс пондіс лӧсьӧтны пызан вылӧ сёян.

³² Рытнас, шонді лэдзчӧм бӧрас, Исусыс дынӧ вайӧтісӧ быдӧс шогаліссесӧ да сэрпӧсь ловсянь пессись-мырсись отирсӧ.

³³ Быдсӧн карыс чукӧртчис ыбӧс дорас.

³⁴ Исусыс уна отирӧс веськӧтіс быдкодь шогӧттэзісь. Уна сэрпӧсь лов вашӧтіс отир пытшкись. Исусыс эз лэдз баитны сэрпӧсь ловвеслӧ, нія эд тӧдісӧ, кин Сія.

³⁵ А асъяпоннас Исусыс чеччис да муніс овтӧминӧ кеймыны.

³⁶ Симон да мӧдіккез мунісӧ Сы бӧрсянь.

³⁷ Нія адззисӧ Исуссӧ да висьталісӧ: «Тэнӧ быдӧнныс кошшӧны».

³⁸ Исусыс висьталіс: «Мунам матісь посаддэзӧт да каррезӧт, Меным и сэтчин колӧ висьтасьны Бур Юӧрсӧ, Ме эд сы понда и локті».

³⁹ Быдсӧн Галилея муӧт синагогаэзын Сія висьтасис Бур Юӧрсӧ да вашӧтіс сэрпӧсь ловвесӧ.

Проказаӧн шогалісьӧс веськӧтӧм

⁴⁰ Исусыс дынӧ локтіс проказаӧн шогалісь морт. Сія сувтіс Сы одзӧ пидзӧссэз вылас да пондіс кеймисьны: «Колӧ кӧ Тэныт, верман менӧ сӧстӧмтны».

⁴¹ Исусыслӧн сьӧлӧмыс небзис. Сія нюжӧтіс кисӧ, павкӧтчис шогалісьыс бердӧ да висьталіс: «Меным колӧ, сӧстӧммы».

⁴² Шогӧтыс сэк жӧ чулаліс, и мортыс лоис сӧстӧм.

⁴³ Дынсис ыстӧм коста Исусыс мортсӧ чорыта ӧліс.

⁴⁴ Сылӧ висьталіс: «Видзӧт, некинлӧ нем эн висьтась. Мун, асьтӧ мыччав вежауджалісьлӧ. Сэсся Моисейыс тшӧктӧм сьӧрті аслат сӧстӧмсялӧм понда вай езъялан козин. Сідз пондасӧ тӧдны веськалӧмыт йылісь».

⁴⁵ Веськӧтӧм мортыс муніс да пондіс висьтасьны лоӧмыс йылісь. Сійӧн Исусыс эз ни вермы пырны карас тӧдтӧм морт моз. Сія оліс овтӧминнэзын, и отирыс быдласянь вовлісӧ Сы дынӧ.