Лука 18 - Бур Юӧр 2019

¹ Исусыс велӧтіс, колӧ пӧ пыр кеймыны, оз ков киэз лэдзны. Сэтчӧ Сія висьтасис сэтшӧм велӧтан висьт:

² «Ӧтік карын олас судитісь. Сія Енісь абу полӧм да и отирӧс абутӧм туйӧ пуктӧм.

³ Сія жӧ карын олас дӧва. Сія вовлывлас судитісьыс дынӧ да корас: "Дорйы менӧ дзескӧтісьыс шогья".

⁴ Судитісьыс дыр абу мӧдӧм дорйыны. Сэсся аслыс висьталас: "Енісь ме ог пов да и отирсӧ абутӧм туйӧ пукта.

⁵ Дӧваыс эд меным зника оз сет. Дорья сійӧ. Сія сэсся оз понды вовлыны"».

⁶ Исусыс висьталіс: «Кыліт умӧль судитісьыслісь кыввесӧ?

⁷ Оз разь Еныс дорйы Ассис бӧрйӧммесӧ, ой и лун Сылісь отсӧт кориссесӧ? Сёрмӧтчас разь Сія нылӧ отсавны?

⁸ Висьтала тіянлӧ: чожа дорьяс нійӧ. Но Морт Зон кӧр локтас, адззас я му вывсис веритӧмсӧ?»

Фарисей да вот ӧктісь йылісь велӧтан висьт

⁹ Сэтӧн вӧлісӧ отир, кӧдна асьнысӧ пуктісӧ Ен сьӧрті веськыта оліссезӧ, а мӧдіккесӧ пуктісӧ абутӧм туйӧ. Нылӧ Исусыс висьтасис велӧтан висьт:

¹⁰ «Кык морт, фарисей да вот ӧктісь, пырасӧ Вежа Керкуӧ кеймыны.

¹¹ Фарисейыс сувтас да пондас ас йывсис кеймыны сідз: "Енӧ, буркывта Тэнӧ, ме эд абу мӧдік йӧз кодь: ог гусясь, ог бӧбӧт, иньӧ сайсянь ог ветлӧт, ме абу эта вот ӧктісь кодь.

¹² Сизим лунас ме кыкись кӧслунала, шедтӧмсим дасӧт торсӧ сета".

¹³ Вот ӧктісьыс сулалас пыранін дынас. Сія оз лысьт енӧжлань лэбтыны синнэсӧ. Моросас сӧталӧмӧн висьталас: "Енӧ, ло небыт сьӧлӧма ме дынӧ, умӧльсӧ керись дынӧ!"

¹⁴ Висьтала тіянлӧ: вот ӧктісьыс гортас муніс Ен сьӧрті веськыта олісьӧн, а не фарисейыс. Асьсӧ быд лэбтісьыс эд лоас лэдзӧм, а асьсӧ учӧтӧ пуктісьсӧ лэбтасӧ».

Челядьӧс бласлӧвитӧм

¹⁵ Исусыс дынӧ вайӧтісӧ поснит челядьӧс, медбы Сія павкӧтчыліс ны бердӧ. Сійӧ адззикӧ велӧтчиссес локтӧммесӧ видісӧ.

¹⁶ Исусыс челядьсӧ корис дынас да висьталіс: «Лэдзӧ челядьсӧ локны Ме дынӧ. Эдӧ падмӧтӧ нійӧ. Ны коддеслӧ эд лӧсьӧтӧм Енлӧн Юраланіныс.

¹⁷ Быльсӧ тіянлӧ висьтала: кин челядь моз оз босьт Енлісь Юралӧмсӧ, сія оз пыр Енлӧн Юраланінӧ».

Бура олісьлӧ сьӧкыт пырны Енлӧн Юраланінӧ

¹⁸ Кытшӧмкӧ веськӧтлісь Исусыслісь юаліс: «Бур Велӧтісь! Мый меным керны пырся оланӧ пырӧм понда?»

¹⁹ Исусыс сылӧ висьталіс: «Мыля тэ менӧ шуан бурӧн? Ӧтік Енся бурыс некин абу.

²⁰ Тӧдан Енлісь тшӧктӧммесӧ: "гозйӧн овтӧн ӧтамӧдныт сайсянь эд ветлӧтӧ", "эн вий", "эн гусясь", "морт йылісь вӧвлытӧмсӧ эн баит", "ай-мамтӧ бурӧ пукты"».

²¹ Сія висьталіс: «Ны сьӧрті ме томсянь ола».

²² Сійӧ кылікӧ Исусыс висьталіс сылӧ: «Дзир ӧтік тэныт оз тырмы. Быдӧс пажытьтӧ вузав, сетав кориссезлӧ. Сэк лоас тэныт дона пажытьыс енӧжас. Сэсся лок мунны Ме сьӧрӧ».

²³ Сэтшӧмсӧ кылӧмсянь мортыс юрсӧ ӧшӧтіс. Сылӧн эд пажытьыс вӧлӧм ӧддьӧн уна.

²⁴ Сылісь гажтӧмсялӧмсӧ казялікӧ Исусыс висьталіс: «Ӧддьӧн сьӧкыт бура олісьыслӧ пырны Енлӧн Юраланінӧ!

²⁵ Кокнитжык верблюдлӧ мунны ем пысӧт, нежели бура олісьлӧ пырны Енлӧн Юраланінӧ».

²⁶ Быдӧс сійӧ кыліссес юалісӧ: «Кин нӧ сэк вермас мезмыны?»

²⁷ Исусыс висьталіс: «Мый морт оз вермы, сійӧ вермӧ Еныс».

²⁸ Петраыс висьталіс: «Мийӧ быдӧс колим, мунім Тэ сьӧрӧ».

²⁹ Исусыс висьталіс нылӧ: «Быльсӧ тіянлӧ висьтала: Енлӧн Юралӧм понда кин коляс керкусӧ, ай-мамсӧ, сойесӧ, воннэсӧ, иньсӧ, челядьсӧ,

³⁰ сылӧ унапӧв лоас сетӧм ӧння кадӧ да локтан кадӧ ─ пырся олан».

Аслас кулӧм йылісь Исуслӧн висьталӧм

³¹ Исус корис дынас даскык велӧтчисьсӧ. Нылӧ висьталіс: «Мийӧ мунам Ерусалимӧ. Енсянь юӧртіссезлӧн Морт Зон йылісь гижӧмыс быдӧс аркмас.

³² Сійӧ сетасӧ ентӧдтӧммез киӧ. Сы вылын сераласӧ, Сійӧ умӧльтасӧ, сьӧлаласӧ.

³³ Сійӧ вартласӧ. Сэсся виясӧ, но куимӧт лунас Сія ловзяс».

³⁴ Велӧтчиссес сэтісь нем эзӧ вежӧртӧ. Нія кыввес нылӧ вӧлісӧ пӧданаӧсь.

Синтӧмӧс веськӧтӧм

³⁵ Исусыс сибаліс Ерикон дынӧ. Сэтӧн ӧтік синтӧм морт кортӧн пукаліс туй дорас.

³⁶ Сія кылӧм сы дынӧт уна отирлісь мунӧмсӧ да юаліс: «Мый сэтшӧмыс?»

³⁷ Сылӧ висьталісӧ: «Назаретісь Исус мунӧ».

³⁸ Сэк сія горӧтіс: «Исус, Давидлӧн Зон! Небыт сьӧлӧмсянь отсав меным!»

³⁹ Одзас муніссес тшӧктісӧ сійӧ чӧвны, но Сія ӧддьӧнжык горӧтіс: «Давидлӧн Зон! Небыт сьӧлӧмсянь отсав меным!»

⁴⁰ Исусыс сувтчис, тшӧктіс сійӧ вайӧтны дынас. Синтӧмыс сибӧтчис Сы дынӧ. Исусыс сылісь юаліс:

⁴¹ «Мый тэныт Месянь колӧ?» Мӧдыс висьталіс: «Велӧтісь! Осьт менчим синнэзӧс».

⁴² Исусыс сылӧ висьталіс: «Адззы! Тэнат веритӧмыт мездіс тэнӧ».

⁴³ Мортыс сэк жӧ пондіс адззыны. Енсӧ ошкӧмӧн сія муніс Исусыс сьӧрӧ. Сэтшӧмсӧ адззылӧм понда быдӧс отирыс ошкисӧ Енсӧ.