Лука 13 - Бур Юӧр 2019

¹ Исуслӧн баитӧм коста локтісӧ отир, кӧдна висьтасисӧ Галилеяись отирӧс вийӧм йылісь. Нійӧ вийны тшӧктӧм Пилатыс. Отирсӧ вийӧмась Енлӧ езъялан козиннэз вайӧм коста. Нылӧн вирныс сорласьӧм езъялан козиннэз вирӧн.

² Исусыс сэтчӧ висьталіс: «Поди, юраныт видзат: Галилеясис нія оліссес унажык керисӧ умӧльсӧ, сідз кӧ кулісӧ?

³ Абу сідз. Висьтала тіянлӧ: умӧль керӧммезныт дынісь одӧ кӧ бергӧтчӧ Енлань, быдӧнныт сідз кулат.

⁴ Силоамын башняыс усикас вийӧм даскыкьямыс мортӧс. Натьтӧ, шуат: нія керисӧ умӧльсӧ унажык Ерусалимын быд олісься?

⁵ Абу сідз. Шуа тіянлӧ: умӧль керӧммезныт дынісь одӧ кӧ бергӧтчӧ Енлань, быдӧнныт сідз кулат».

Инжир пу йылісь велӧтан висьт

⁶ Сэк Исусыс висьтасис нылӧ велӧтан висьт: «Ӧтік мортлӧн пуйӧрас виноград коласын быдмӧм инжир пу. Мортыс локтас кошшыны сы вылісь воӧмсӧ да оз адззы.

⁷ Сія висьталас виноград вӧдитісьыслӧ: "Ме куимӧт во сьӧрна вовла кошшыны инжир пу вывсис воӧмсӧ, да ог адззы. Керав сійӧ. Мыйлӧ сія весь быдмӧ му вылас".

⁸ Сэк виноград вӧдитісьыс висьталас: "Кӧзяинӧ, коль сійӧ таво кежӧ. Ме сы гӧгӧр мусӧ небзьӧта, назьмита.

⁹ Мӧдпыр, поди, лоас сы вылын воӧмыс, а оз кӧ ло, сэк кералан"».

Шоччисян лунӧ инькаӧс веськӧтӧм

¹⁰ Шоччисян лунӧ Исусыс велӧтіс синагогаын.

¹¹ Сэтчин вӧлі кӧстісьӧм инька. Даскыкьямыс во сьӧрна сэрпӧсь лолыс видзӧм сійӧ кӧстӧмӧн, сія абу вермӧм веськӧтчыны.

¹² Исусыс казяліс сійӧ, корис дынас да висьталіс: «Инька, тэ мезмин аслат шогӧтісь».

¹³ Сія пуктыліс инькаыс вылӧ киэсӧ. Инькаыс сэк жӧ веськӧтчис да пондіс ошкыны Енсӧ.

¹⁴ Сэк синагогасис веськӧтлісьыс лӧгасис, мыля Исусыс веськӧтіс инькасӧ шоччисян лунӧ. Отирыслӧ лӧгувьяс висьталіс: «Шоччисян лунся эмӧсь квать лун, кӧр верматӧ уджавны. Сія луннэзӧ и локтӧ веськӧтчыны».

¹⁵ Дӧсвидзисьыс сылӧ висьталіс: «Ылӧтлісь морт! Быдыс тіян коласісь шоччисян лунӧ оз я лэдз ясли бердісь домйылісь осёлӧс да ӧшкаӧс юктавны?

¹⁶ Авраам увтырись нывсӧ сотанаыс кӧрталӧмӧн видзис даскыкьямыс во сьӧрна. Эз я ков шоччисян лунӧ мездыны сійӧ этна домӧттэзісь?»

¹⁷ Исусыслӧн кыввес Сы вылӧ лэбтісьӧммесӧ рожа кулянӧдз вайӧтісӧ, а отирыс гажӧтчисӧ Исуслӧн быд вына керӧмсянь.

Горчига тусь да майӧв йылісь

¹⁸ Исусыс висьталіс: «Мый вылӧ вачкисьӧ Енлӧн Юралӧмыс? Сійӧ мый сьӧрті позьӧ видзӧтны?

¹⁹ Сія вачкисьӧ горчига тусь вылӧ. Сійӧ морт босьтас, аслас йӧрын сюйыштас муӧ. Сія быдмас ыджыт пуӧдз. Сы уввез коласын нельки енӧжись кайез поздісьӧны».

²⁰ Исусыс бӧра шуис: «Мый сьӧрті Ме верма видзӧтны Енлісь Юралӧмсӧ?

²¹ Сія вачкисьӧ майӧв вылӧ. Инька сійӧ босьтас, пуктас шӧмӧсӧ, сэтчӧ лыддян дозӧн куимись пуктас пизь, сорлалас. Няньыс быдӧс ловзяс».

Векнит ыбӧс

²² Исусыс каррезӧт да посаддэзӧт мунӧм коста отирсӧ велӧтіс. Сія туйсӧ видзис Ерусалимлань.

²³ Ӧтік Сылісь юаліс: «Дӧсвидзись! Етшаӧн разь мезмасӧ?» Исусыс висьталіс:

²⁴ «Быд вынӧн вынсьӧтчӧ пырны векнит ыбӧсӧт. Тіянлӧ висьтала: уна пондыласӧ пырны, да озӧ вермӧ.

²⁵ Локтас кад, керкусис кӧзяиныс чеччас, пӧдналас ыбӧссӧ. Сэк тійӧ ӧтӧрас сулавтӧн пондат ыбӧсас ёркӧтны да горӧтлыны: "Кӧзяин! Кӧзяин! Осьт миянлӧ!" Сія висьталас тіянлӧ: "Кытісь тійӧ? Ме тіянӧс ог тӧд".

²⁶ Сэк пондат шуны: "Тэкӧт мийӧ ювлім-сёйлім. Тэ миян дынын ӧтӧрас велӧтін".

²⁷ Сія сэк висьталас: "Тіянлӧ баита: кытісь тійӧ? Ог тӧд тіянӧс. Умӧльсӧ кериссез, мунӧ Ме дынісь быдӧнныт".

²⁸ Тійӧ пондат горзыны, пиннезӧн гырскыны, кӧр Енлӧн Юраланінісь казялат Авраамсӧ, Исаксӧ, Яковсӧ, Енсянь юӧртіссесӧ быдӧннысӧ. А асьныт сэтчинісь лоат вашӧтӧмӧсь.

²⁹ Енлӧн Юраланінӧ отирыс локтасӧ асывланьсянь, рытланьсянь, лунланьсянь да ойланьсянь. Нія быдӧнныс пуксясӧ пызан сайӧ.

³⁰ Эмӧсь медбӧрьяэс, кӧдна лоасӧ медодззаӧсь. Эмӧсь медодззаэс, кӧдна лоасӧ медбӧрьяӧсь».

Ерусалим понда тӧждісьӧм

³¹ Сія кадӧ локтісӧ мукӧд фарисейес да висьталісӧ Исусыслӧ: «Пет, мун эстісь. Иродыс мӧдӧ Тэнӧ вийны».

³² Исусыс нылӧ висьталіс: «Мунӧ, висьталӧ сія ручлӧ: Ме вашӧтла сэрпӧсь ловвесӧ, веськӧта шогӧттэзісь талун, ашын, а мӧдлун уджӧс досповна кера.

³³ Меным колӧ мунны одзлань талун, ашын да мӧдлун. Оз эд овлы, медбы Енсянь юӧртісьсӧ вийисӧ мӧдіклаын, сія пыр керсьӧ Ерусалимын.

³⁴ Ерусалим! Ерусалим! Енсянь юӧртіссесӧ вийлісь! Тэ дынӧ ыстӧммесӧ иззэзӧн шупкалісь! Кынымись Ме мӧді ӧктыны тэнчит челядьтӧ, кыдз кай ӧктӧ пияннэсӧ борддэз увтас! Тійӧ тай эдӧ кывзісьӧ.

³⁵ Сідз и кольччӧ тіянлӧ Вежа Керкуныт кушӧн. Тіянлӧ юӧрта: тійӧ Менӧ одӧ адззылӧ сія кадӧдз, кӧр ӧмсиныт петасӧ сэтшӧм кыввез: "Бласлӧвитӧм Дӧсвидзись нимӧн Локтісьыс!"»