Иоан 19 - Бур Юӧр 2019

¹ Сэк Пилатыс тшӧктіс Исуссӧ виззьыны-шулявны.

² Воиннэс кыйисӧ желля шатись юркытш, кышалісӧ сійӧ Исусыслӧ юр вылас, пасьтӧтісӧ пемыт-гӧрд паськӧмӧ.

³ Нія шувлісӧ: «Дыр Тэныт юравны, Иудейезлӧн Ӧксу!» Асьныс сӧталісӧ Сылӧ чужӧмас.

⁴ Пилатыс бӧра петіс да шуис: «Ме петкӧта Сійӧ тіян одзӧ. Тійӧ тӧдӧ: ме ог адззы Сы сайын некытшӧм умӧль керӧм».

⁵ Сэк Исусыс петіс желля шатись кыйӧм юркытша да пемыт-гӧрд ӧксу паськӧма. Пилатыс нылӧ шуис: «То Сія Мортыс!»

⁶ Аркирейес да Вежа Керку сьӧрын видзӧтіссес казялісӧ Исуссӧ да пондісӧ горӧтны: «Дор Сійӧ крест вылӧ, дор!» Пилатыс нылӧ шуис: «Асьныт босьтӧ Сійӧ да дорӧ. А ме эг адззы Сы сайын умӧль керӧмсӧ».

⁷ Иудейес сылӧ висьталісӧ: «Миян эм Туйдӧт. Туйдӧтным сьӧрті Сылӧ колӧ кувны, мыля Сія Асьсӧ пуктіс Ен Зонӧ».

⁸ Сійӧ кылӧмсянь Пилатыс ӧддьӧнжык повзис.

⁹ Сія пырис да Исусыслісь юаліс: «Кытісь Тэ?» Исусыс сэтчӧ шы эз сет.

¹⁰ Пилатыс шуис Сылӧ: «Мекӧт он мӧд баитны? Он разь тӧд: ме верма Тэнӧ дорны крест вылӧ, верма и лэдзны?»

¹¹ Исусыс шуис: «Тэ Мекӧт нем бы эн вермы керны, эз кӧбы вӧв тэныт сетӧм вылісянь. Сійӧн унажык умӧль керӧмыс Менӧ тэныт вузалісь вылын».

¹² Сія кадсянь Пилатыс мӧдіс лэдзны Исуссӧ. Иудейес тай горӧтлісӧ: «Лэдзан кӧ Сійӧ, сэк Римись ӧксулӧ тэ абу ёрт. Кин сувтӧтӧ асьсӧ ӧксуӧн, сія Римись ӧксулӧ умӧльсӧ керӧ».

¹³ Сійӧ кылӧм бӧрын Пилатыс Исуссӧ петкӧтіс. Ачыс пуксис судитісьлӧн пукалан вылӧ. Сійӧ судитанінсӧ шуисӧ Лифострот, а еврей кыв вылын сійӧ шуисӧ Гаввафа.

¹⁴ Эта вӧлі Ыджыт лун одзын луншӧр гӧгӧрас. Пилатыс иудейеслӧ висьталіс: «То тіян Ӧксуныт!»

¹⁵ Мӧддэс горӧтісӧ: «Вий Сійӧ, вий! Дор крест вылӧ!» Пилатыс нылісь юаліс: «Тіянлісь Ӧксунытӧ дора?» Аркирейес висьталісӧ: «Римись ӧксуся миян абу мӧдік ӧксу».

Исуссӧ крест вылӧ дорӧм

¹⁶ Сэк Пилатыс Исуссӧ сетіс нылӧ дорны крест вылӧ. Нія Сійӧ кутісӧ да нуӧтісӧ.

¹⁷ Исусыс Ачыс нуӧтіс крестсӧ. Сія локтіс Юр лы нима керӧс вылӧ. Юр лы ─ еврей кыв вылын лоӧ Голгофа.

¹⁸ Сэтчин дорисӧ Сійӧ крест вылӧ. Сыкӧт ӧтлаын дорисӧ кык мортӧс. Ӧтсӧ ─ ӧт ладорас, мӧдсӧ ─ мӧд ладорас. Ны шӧрын вӧлі Исусыс.

¹⁹ Пилатыс тшӧктіс гижны: «Назаретісь Исус, иудейезлӧн Ӧксу». Сійӧ гижӧтсӧ ӧшӧтісӧ крест вылас.

²⁰ Сійӧ гижӧмсӧ лыддьӧтісӧ ӧддьӧн уна иудейез. Исусыс эд вӧлі дорӧм кар дынас матын. Гижӧмыс вӧлі еврей, грек да латин кыввез вылын.

²¹ Аркирейес висьталісӧ Пилатыслӧ: «Эн гиж "Иудейезлӧн Ӧксу", гиж сідз: "Сія висьталіс, Ме пӧ иудейезлӧн Ӧксу"».

²² Пилатыс шуис: «Мый гижи, сійӧ и гижи».

²³ Исуссӧ крест вылӧ дорӧм бӧрын воиннэс босьтісӧ Сылісь паськӧмсӧ да торйӧтісӧ нёль морт коласын. Сылӧн йӧрнӧсыс эз вӧв вурӧм, вӧлі вылісянь улӧдз кыйӧм.

²⁴ Сійӧн ӧтамӧдныслӧ висьталісӧ: «Йӧрнӧссӧ огӧ пондӧ косявлыны, а босьтам кыскӧм сьӧрті, кинлӧ дӧнзяс». Аркмис Вежа Гижӧтын висьталӧм сьӧрті: ─ Торйӧтісӧ Менчим паськӧмӧс ас коласаныс. Менчим паськӧмӧс янсӧтісӧ кыскӧм сьӧрті. Воиннэс сідз и керисӧ.

²⁵ Крестыс дынын сулалісӧ Исуслӧн Мамыс, Мамыслӧн сойыс, Клеоплӧн Мария иньыс да Магдала Мария.

²⁶ Исусыс казяліс Мамсӧ да велӧтчисьсӧ, кӧдӧ Сія радейтіс. Сія Мамыслӧ шуис: «Мортіньӧй, сія Тэнат зон!»

²⁷ Сэсся висьталіс велӧтчисьыслӧ: «Сія тэнат Мам!» Сія кадсянь велӧтчисьыс босьтіс Исуслісь Мамсӧ дынас.

Исуслӧн кулӧм

²⁸ Исусыс тӧдіс, быдӧс ни керсис. Сія шуис: «Горшӧ косьмӧ». Сідз быдӧс и керсис, кыдз вӧлі висьталӧм Вежа Гижӧтын.

²⁹ Матын сэтӧн сулаліс шӧма винаӧн доз. Воиннэс юанас боссьӧтісӧ губка, кышалісӧ иссоп за бердӧ да вайӧтісӧ Исуслӧ ӧм дынас.

³⁰ Исусыс тырпыштіс юансӧ да шуис: «Аркмис!» Сэсся ӧшӧтіс юрсӧ да лэдзис ловсӧ.

³¹ Сэк вӧлі шоччисян лун одзын рыт. Иудейез сьӧрті шойесӧ эз туй кольны кресттэз вылын шоччисян лунӧ, а локтан шоччисян лунӧ вӧлі Ыджыт лун. Сійӧн Иудейес корисӧ, медбы Пилатыс лэдзис крест вылӧ дорӧммеслісь чеглавны кокгумаэзнысӧ да лэдзны нійӧ кресттэс вылісь.

³² Воиннэс локтісӧ. Нія чеглалісӧ кокгумаэзнысӧ Исускӧт кыкнан дорӧмыслісь.

³³ Сибӧтчисӧ Исусыс дынӧ да казялісӧ, Сія кулӧм ни. Сылісь кокгумаэсӧ эзӧ пондӧ чеглавны.

³⁴ Ӧтікыс ны коласісь шысӧ мӧртіс Исусыслӧ ордлыэс коласӧ. Сэтісь петіс вир да ва.

³⁵ Этӧ висьтасьӧ быдӧс адззылісьыс, медбы и тійӧ веритіт. Сія тӧдӧ, сылӧн висьтасьӧмыс быль.

³⁶ Лоис Вежа Гижӧтын висьталӧм сьӧрті: «Сылӧн лыыс оз ло чегӧм».

³⁷ Вежа Гижӧтас и мӧдіклаын висьталӧм: «Пондасӧ видзӧтны Сы вылӧ, Кӧдӧ бытшкисӧ».

Исусӧс дзебӧм

³⁸ Аримафея карись Ӧсип вӧлі Исуслӧн велӧтчись. Сія поліс иудейезісь, сійӧн вовлывліс Исусыс дынӧ гусьӧн. Быдӧс лоӧм бӧрын Ӧсипыс локтіс Пилат дынӧ да корис лэдзны крест вывсис Исуслісь шойсӧ. Пилатыс тшӧктіс лэдзны. Ӧсипыс муніс да босьтіс Исуслісь шойсӧ.

³⁹ Сэтчӧ локтіс и Никодим. Сія вовлӧм вӧлі Исусыс дынӧ ойнас. Никодимыс вайис куимдас кило алойӧн сорлалӧм смирна.

⁴⁰ Сія чӧскыт руа мавтасӧн нія кӧтӧтісӧ дӧраэз да каттисӧ Исуслісь шойсӧ. Сідз иудейес дзеблісӧ кулӧммесӧ.

⁴¹ Кытӧн Исуссӧ дорисӧ крест вылӧ, сэтӧн вӧлі пуйӧр. А пуйӧрас вӧлі виль дзебсянін. Сэтчӧ абу на дзебсьылӧмась.

⁴² Шоччисян лун локтӧм кузя Исуслісь шойсӧ пуктісӧ сэтчӧ, сія вӧлі матын да.