Иоан 12 - Бур Юӧр 2019

¹ Ыджыт лунӧдз кольччис квать лун. Сэк Исусыс локтіс Вифания посадӧ. Сэтчин оліс кувлӧм Лазарыс, кӧдӧ Исусыс ловзьӧтіс.

² Ны ордын Исусыслӧ лӧсьӧтісӧ рытся сёян. Марфаыс ваяліс сёянсӧ, а Лазарыс, Исусыс да мӧдіккес ӧтлаын сёйисӧ.

³ Марияыс босьтіс фунт мымда чӧскыт руа нард ви, кӧда вӧлі ӧддьӧн дона. Винас мавтіс Исусыслісь коккесӧ да чышкис юрсинас. Керкуас висяняс кӧвьясис чӧскыт ру.

⁴ Исусыслӧн вӧлі Иуда нима велӧтчись, Симон-Искариотлӧн зон, кӧда сэсся Сійӧ вузаліс. Иудаыс шуис:

⁵ «Натьтӧ, туйис вузавны нард висӧ куимсё динарий вылӧ да сетавны кориссезлӧ?»

⁶ Сія эз тӧждісь кориссес понда, а сідз шуис, вӧлі гусясись да. Иудаыс новйӧтіс дозсӧ, кытчӧ Исуслӧ да велӧтчиссеслӧ тэчлісӧ сьӧм. Сійӧ сьӧмсӧ Иудаыс аслыс босьтлывлӧм.

⁷ Исусыс висьталіс: «Эд вӧрӧтӧ Мариясӧ, сія висӧ видзис Менӧ дзебан лун кежӧ.

⁸ Кориссес пыр тіянкӧт, а Ме тіянкӧт ог пыр ло».

⁹ Уна иудей отирлӧ кывсьӧм Исуслӧн сэтчӧ локтӧмыс. Нія локтісӧ Сы дынӧ. Отирыс сэтчӧ локтісӧ адззывны Исуссӧ да и Лазарсӧ, кӧдӧ ловзьӧтіс Исусыс.

¹⁰ Аркирейес лӧсьӧтчисӧ вийны и Лазарсӧ,

¹¹ мыля сы кузя иудейес унаӧн вовлывлісӧ Исусыс дынӧ да пондісӧ веритны Сылӧ.

Исуслӧн Ерусалимӧ пырӧм

¹² Уна отир локтісӧ Ыджыт лун вылас. Мӧд лунас нылӧ кывсис Исуслӧн Ерусалим дынӧ сибӧтчӧм йылісь.

¹³ Отирыс босьтісӧ пальмапу уввез, петісӧ паныт Сылӧ горӧтлӧмӧн: «Осанна! Бласлӧвитӧм Дӧсвидзись нимӧн Локтісьыс, Израильлӧн Ӧксуыс!»

¹⁴ Исусыс адззис том осёлӧс да пуксис сы вылӧ. Сідз эд вӧлі висьталӧм Вежа Гижӧтас:

¹⁵ ─ Эн пов, Сион ныв! Видзӧт, тэнат Ӧксуыт локтӧ том осёл вылын пукалӧмӧн.

¹⁶ Сылӧн велӧтчиссес сэк эзӧ вежӧртӧ лоӧмсӧ. Но Исуслӧн югьялӧмыс оссьӧм бӧрын нылӧ тӧдвыланыс усис: Сы йылісь вӧлі сідз гижӧм, сідз Сійӧ и панталісӧ.

¹⁷ Сэтӧн вӧлісӧ отир, кӧдна адззылісӧ, кыдз Сія корис Лазарсӧ петны дзебсянінсис, ловзьӧтіс сійӧ. Нія висьтасисӧ лоӧмыс йылісь.

¹⁸ Адззывлытӧм керӧм йылісь кылӧм кузя отирыс и панталісӧ Исуссӧ.

¹⁹ Фарисейес баитісӧ ӧтамӧдныслӧ: «Адззат, мийӧ нем огӧ вермӧ керны. Быдӧс отирыс мунӧ Сы сьӧрӧ!»

Исус висьталӧ Аслас кулӧм йылісь

²⁰ Ыджыт лун коста Енлӧ копыртчыны локтіссез коласын вӧлісӧ и кынымкӧ грек.

²¹ Нія сибӧтчисӧ Филип дынӧ, кӧда вӧлі Галилея муын Вифсаидаись. Нія шуисӧ: «Бур мортіньӧй, мийӧ адззылам бы Исуссӧ».

²² Филипыс муніс да висьталіс Ӧндрейлӧ. Сэсся нія ӧтлаын висьталісӧ Исусыслӧ.

²³ Исусыс висьталіс нылӧ: «Локтіс кад мыччавны Морт Зонлісь югьялӧмсӧ.

²⁴ Тіянлӧ быльсӧ веськыта висьтала: оз кӧ кув муӧ кӧдзӧм шогді тусьыс, то кольччас ӧтнас, кулас кӧ, сэк сетас уна тусь.

²⁵ Ассис олансӧ радейтісьыс ӧштас сійӧ. Кин оз радейт ассис олансӧ эта му вылын, видзас сійӧ пырся олан понда.

²⁶ Меным кысъялісьыс ась локтӧ Ме сьӧрӧ. Кытӧн Ме лоа, сэтӧн лоас и кысъялісьӧ. И Меным кысъялісьсӧ Айӧ бурӧ пуктас.

²⁷ Ӧні Менам сьӧлӧмӧ дзугыльтчис. Мый Меным шуны? Айӧ, мезды Менӧ сія кадісь! Но Ме эд сія кад кежӧ и локті.

²⁸ Айӧ, осьт Ассит югьялан нимтӧ!» Сэк енӧжсянь локтіс шы: «Осьті ни да эшӧ осьта».

²⁹ Сэтӧн сулалісь отирыс кылісӧ висьталӧм шысӧ. Нія шуисӧ: «Гымалӧ». Мӧдіккез шуисӧ: «Ангел баитӧ Сыкӧт».

³⁰ Исусыс сэтчӧ горӧтчис: «Эта висьталӧмыс эз вӧв Меным, а тіянлӧ.

³¹ Ӧні локтіс суд эта му вылісь отир вылӧ. Ӧні эта му вылын ыждалісьсӧ вашӧтасӧ.

³² Му вывсис лэбтісьӧм бӧрам Ме быдӧннысӧ дынам кыска».

³³ Сідз Сія баитіс Ас йывсис: сэтшӧма Сылӧ ковсяс кувны.

³⁴ Отирыс сэтчӧ шуисӧ Сылӧ: «Туйдӧтсис мийӧ тӧдам, Кристос-Мездӧтісьыс пӧ пыр олӧ. Мыля нӧ Тэ баитан, Морт Зон пӧ лоас лэбтӧм? Кин сія Морт Зоныс?»

³⁵ Сэк Исусыс висьталіс нылӧ: «Тіянкӧт югытыс дыр оз ло. Ветлӧтӧ югытыс кусӧмӧдз, ась пемытыс тіянӧс оз пӧдты. Пемытын ветлӧтісьыс эд оз тӧд, кытчӧ мунӧ.

³⁶ Кытчӧдз югытыс тіянкӧт, веритӧ югытыслӧ. Сэки лоатӧ югытыслӧн челядьӧн». Сідз висьталӧм бӧрын Исусыс вешшыштіс ны дынісь да сайӧвтчис.

Отир озӧ веритӧ Исуслӧ

³⁷ Сымда адззывлытӧмсӧ керис Исусыс отирыс одзын, но нія Сылӧ эзӧ веритӧ.

³⁸ Аркмис Енсянь юӧртісь Исайлӧн висьтавлӧм сьӧрті: ─ Дӧсвидзись! Кин веритіс миянсянь кылӧмас? Кинлӧ оссис Дӧсвидзисьлӧн выныс?

³⁹ Нія эзӧ вермӧ веритны. Ны йылісь эд вӧлі висьталӧм Исайыс:

⁴⁰ ─ Эта отирлӧн синнэзныс гусялӧмӧсь, сьӧлӧмныс чорзьӧм. Озӧ адззӧ синнэзнаныс, озӧ вежӧртӧ сьӧлӧмнаныс. Нія озӧ бергӧтчӧ Меланьӧ, медбы Ме нійӧ веськӧті.

⁴¹ Исайыс адззылӧм Исусыслісь югьялӧмсӧ, сійӧн сідз и висьтавлӧм, Сы йылісь и баитӧм.

⁴² Нельки веськӧтліссез коласісь унаӧн пондісӧ веритны Исусыслӧ. Фарисейес кузя нія эзӧ лысьтӧ висьтасьны веритӧмныс йылісь, медбы нійӧ эзӧ вашӧтӧ синагогасис.

⁴³ Нылӧ отирлӧн ошкӧмыс вӧлі донажык Енлӧн ошкӧмся.

⁴⁴ Сэк Исусыс горӧн висьталіс: «Меным веритісьыс оз верит дзир Меным. Сія веритӧ и Менӧ Ыстісьлӧ.

⁴⁵ Ме вылӧ видзӧтісьыс адззӧ Менӧ Ыстісьсӧ.

⁴⁶ Ме югытыс, локті му вылас, медбы Меным веритісьыс эз кольччы пемытас.

⁴⁷ Менчим кыввезӧс мортыс кыліс кӧ да оз верит, Ме сійӧ ог судит. Ме локті му вылісь отирсӧ мездыны, эг лок судитны.

⁴⁸ Менӧ мортыс пуктӧ абутӧм туйӧ кӧ да оз пырт сьӧлӧмас Менчим кыввезӧс, сылӧн эм судитісьыс. Медбӧрья лунас сійӧ пондас судитны Менам висьталӧм кылӧ.

⁴⁹ Ме эг баит Ассяням. Менӧ ыстісь Айӧ тшӧктіс, мый да кыдз висьтавны.

⁵⁰ Ме тӧда: Сылӧн тшӧктӧмыс сетӧ пырся олан. Сідзкӧ, Ме баита Айӧ висьталӧм сьӧрті».