Филипын оліссезлӧ 2 - Бур Юӧр 2019

¹ Кристосыс тіянӧс вынсьӧтӧ, а Сылӧн радейтӧмыс бурӧтӧ, Вежа Лолыс тіянӧс ӧтлаӧтӧ. Тійӧ отсасят да тӧждісят ӧтамӧдныт понда.

² Сідзкӧ, содтӧ меным гажсӧ. Юраныт авйӧмныт, вежӧртӧмныт ась лоӧ ӧткодь. Мый колӧ керны, керӧ баитчӧмӧн, ӧтамӧднытӧ радейтӧ.

³ Нем эдӧ керӧ асьнытӧ мыччалӧм-лэбтӧм могись. Рам сьӧлӧмсянь мӧдікӧс пуктӧ асся вылынжыка.

⁴ Эд тӧждісьӧ дзир ас йывсиныт, тӧждісьӧ и мӧдіккез йылісь.

Олӧ Кристос моз

⁵ Авйӧ да керӧ Кристос Исусыс моз.

⁶ Кристосыс быдӧсын вӧлі Еныс кодь, но Енкӧт ӧткодя олӧм бердӧ Сія эз видзсьы.

⁷ Сія эд быдӧс колис да морт моз чужис, Асьсӧ рабӧдз лэдзис, быдӧсын лоис морт кодь.

⁸ Асьсӧ Сія лэдзис-раммӧтіс, кывзісис нельки кувтӧдззас, крест вылын кувтӧдз.

⁹ Сійӧн и лэбтіс Сійӧ Еныс медвылӧ. Сетіс Сылӧ мӧддэс сьӧрті медбур ним,

¹⁰ Исус ним одзын медбы быдыс сувтіс пидзӧс вылас: енӧжас, му вылас да му пыдӧсас.

¹¹ Ен Айсӧ ошкӧм могись ась быд морт висьталӧ: «Кристос Исусыс ─ Дӧсвидзись!»

Кывзісьӧм йылісь

¹² Менам донаэзӧ, тійӧ эд пыр кывзісит. Тійӧ менӧ кывзіситӧ, кӧр ме вӧлі тіянкӧт, а ӧні, кӧр ме абу тіянкӧт, буржыка кывзісят. Сідзкӧ, Енсис полӧмӧн тӧждісьӧ асланыт мезмӧм понда.

¹³ Ачыс Еныс эд уджалӧ тіян пытшкын, ӧзйӧтӧ тіянӧс Ас сьӧртӧттяс керны бурсӧ.

¹⁴ Быдӧс керӧ норасьтӧг, етшасьтӧг.

¹⁵ Сэк тіян сайын оз ло ӧтік умӧль керӧм, и отирыслӧ сэк нем лоас висьтавны тіян йылісь умӧльсӧ. Тійӧ Енлӧн сӧстӧм челядь. Енӧжын югдӧтан кӧдзуввез моз югьялат эстӧн ылалӧм, лэдзчисьӧм отир коласын.

¹⁶ Тійӧ видзсят олан сетан Кыв бердӧ. Сійӧн ме понда ошшасьны Кристослӧн локтан лунӧ: ме ассим олан туйӧс эг мун весись, эг весись мырсьы.

¹⁷ Ме уджала тіян веритӧм понда. И ковсяс кӧ меным тіян понда нельки кисьтны ассим вирӧс да вайны ачымӧс езъялан козин туйӧ, ме и сэк гажма. Понда гажӧтчыны тіянкӧт ӧтлаын.

¹⁸ Этасянь и тійӧ гажмӧ, гажмӧ мекӧт ӧтлаын.

Тимофей да Епафродит йылісь

¹⁹ Дӧсвидзись Исус отсӧтӧн ме лӧсьӧтча чожа ыстыны тіян дынӧ Тимофейсӧ. Сія меным висьтасяс тіян олӧм йылісь, и менам сьӧлӧмӧ бурмас.

²⁰ Тимофейыс моз тіян понда сідз тӧждісиссес менам сэсся абуӧсь.

²¹ Быдӧнныс эд кошшӧны ас пондасиныс, озӧ кошшӧ сійӧ, мый Кристос Исуслӧ колӧ.

²² Тимофейыслісь уджалӧмсӧ тійӧ эд тӧдат. Бур Юӧрсӧ висьтасьӧмӧ коста сія меным отсасис зон моз.

²³ Ме лӧсьӧтча сійӧ ыстыны тіян дынӧ сэк жӧ, кӧр понда тӧдны, мый лоас мекӧт.

²⁴ Ме тӧда: Еныс отсӧтӧн чожа и ачым локта тіян дынӧ.

²⁵ Меным отсасьны тійӧ ыстыліт Епафродит воннымӧс. Ме адзза, ӧні сійӧ колӧ бӧр ыстыны тіян дынӧ. Сія мекӧт ӧтлаын керис уджсӧ, бура отсасис.

²⁶ Сія ӧддьӧн мӧдіс тіянӧс быдӧннытӧ адззывны. Тіянлӧ пӧ кывсьӧм сы шогалӧм йылісь, сійӧн сія тӧждісис.

²⁷ Сія сьӧкыта шогаліс, вӧлі кулан дорын ни. Еныс сылӧ отсаліс, веськӧтіс сійӧ. Сійӧ веськӧтӧм пыр отсаліс и меным, медбы менам эз сод тӧждісьӧмӧ.

²⁸ Сійӧн и эг понды Епафродитсӧ видзны дынам, ысті тіян дынӧ. Сійӧ казялӧмсянь тійӧ гажмат, и ме етшажык понда тӧждісьны.

²⁹ Сійӧ, Дӧсвидзисьсянь воннытӧ, гажӧн панталӧ. Сэтшӧммес понда тӧждісьӧ, нійӧ бурӧ пуктӧ.

³⁰ Кристослӧн удж понда эд сія вӧлі кулан дорас. Сылӧн и оланыс вермис орны. Сія меным бура отсасис, тійӧ эдӧ вермӧ да.