Ап. керӧммез 5 - Бур Юӧр 2019

¹ Ананий нима морт Сапфира иньыскӧт вузалӧм муэз.

² Сы понда босьтӧм сьӧмсис Ананийыс мымдакӧ сайӧвтӧм. Эта йылісь тӧдӧм иньыс. Кольччӧм сьӧмсӧ Ананийыс вайис да пуктіс апостоллэз одзӧ.

³ Петраыс сэк висьталіс: «Ананий! Мыля лэдзин сотанасӧ юрат пыртны сэтшӧмсӧ: бӧбӧтны Вежа Ловсӧ, сайӧвтны муыс понда босьтӧмсис?

⁴ Вузалӧмыс эз я вӧв тэнат? Вузалӧмыс понда босьтӧмыс эз разь вӧв тэнат киын? Мыля тэ сідз керин? Тэ эн бӧбӧт мортӧс, Енсӧ бӧбӧтін».

⁵ Сійӧ кылӧм бӧрын Ананийыс усис. Сылӧн лолыс петіс. Быдӧс сійӧ адззылӧмсянь отирыс ӧддьӧн повзисӧ.

⁶ Том зоннэз сибӧтчисӧ, каттисӧ шойсӧ. Ананийсӧ петкӧтісӧ да дзебисӧ.

⁷ Куим час гӧгӧр чулалӧм бӧрті сэтчӧ локтіс сылӧн иньыс. Сія эз тӧд лоӧмыс йылісь.

⁸ Петраыс юаліс сылісь: «Висьтав меным: сымда я тійӧ босьтіт мусӧ вузалӧм понда?» Мӧдыс висьталіс: «Сымда».

⁹ Сэк Петраыс сылӧ висьталіс: «Мыля тійӧ баитчит ылӧтлыны Дӧсвидзисьлісь Ловсӧ? Ыбӧсас пырӧны жӧниктӧ дзебиссес. Нія и тэнӧ петкӧтасӧ».

¹⁰ Сэтӧн сія усис Петра коккез дынӧ. Сылӧн лолыс петіс. Том зоннэз пырисӧ да казялісӧ: сія кулӧм. Инькасӧ петкӧтісӧ да ордчӧн Ананийыскӧт дзебисӧ.

¹¹ Веритіссес да кинлӧ кывсис, быдӧнныс ӧддьӧн повзисӧ.

Ен вынӧн керӧммез

¹² Апостоллэз пыр отир коласын керсисӧ уна мыччалан пассэз да адззывлытӧммез. Веритіссес быдӧнныс баитчӧмӧн ӧксьывлісӧ Вежа Керкуас «Соломонлӧн вевттьӧминын».

¹³ Тӧдтӧм йӧзыс ныкӧт ӧтлаасьны полісӧ, но отирыс нійӧ ошкисӧ.

¹⁴ Веритіссес пыр содісӧ. Уна инь да ай отир пондісӧ веритны Дӧсвидзисьлӧ.

¹⁵ Шогаліссесӧ ольпассез да куйланнэз вылын петкӧтлывлісӧ ӧтӧрас, медбы мунікас Петраыслӧн кӧть вуджӧрыс усис ны вылӧ.

¹⁶ Ерусалимас унаӧн ӧксьывлісӧ сы гӧгӧр оланіннэзісь. Сьӧраныс вайӧтлывлісӧ шогалісь отирсӧ да сэрпӧсь ловсянь мырсиссесӧ. И нія быдӧнныс веськавлісӧ.

Апостоллэзӧс кутӧм

¹⁷ Аркирейсӧ да сы дор сулалісь садукейесӧ завидныс кутіс.

¹⁸ Нія кутісӧ апостоллэсӧ да пуксьӧтісӧ.

¹⁹ Но Енлӧн ангелыс ойнас осьтіс чижовкасис ыбӧссэсӧ. Нійӧ петкӧтіс да висьталіс:

²⁰ «Мунӧ, сувтӧ Вежа Керкуас, эта виль олан йылісь быдӧс висьтасьӧ отирыслӧ».

²¹ Апостоллэс сідз и керисӧ, одз асывнас пырисӧ Вежа Керкуӧ да велӧтісӧ. Сы коста аркирейыс аслас отиркӧт ӧктӧм иудейеслісь Судитан чукӧрсӧ да Израиль отирлісь бӧрйӧм пӧриссесӧ. Ӧксьӧммес ыстӧмась вайӧтны пуксьӧтӧм апостоллэсӧ.

²² Ыстӧммес локтӧмась чижовкаас. Сэтчинісь нійӧ абу адззӧмась. Нія бертӧмась да сы йылісь юӧртӧмась ӧксьӧммеслӧ.

²³ Нія висьталӧмась: «Мийӧ асьным адззылім, чижовкаыс вӧлі пӧдналӧм бура. Ыбӧс одзас сулалісӧ чижовкаыс сьӧрын видзӧтіссез. Но кӧр осьтім ыбӧссӧ, сэтчин некин эз вӧв».

²⁴ Нійӧ кыввесӧ кылӧм бӧрын аркирейесӧ да воиннэзлӧн веськӧтлісьсӧ диво кутӧм. Нія баитӧмась, мый нӧ пӧ сэтшӧмыс лоис.

²⁵ Сэтчӧ локтӧм морт да висьталӧм: «Тіян пуксьӧтӧммезныт Вежа Керкуын велӧтӧны отирӧс».

²⁶ Сэк воиннэзлӧн веськӧтлісьыс да сылӧн отирыс ветлісӧ Вежа Керкуӧ да вайӧтісӧ апостоллэсӧ судитанінӧ. Нійӧ эзӧ вӧрӧтӧ, полісӧ отирсис. Отирыс эд вермисӧ нійӧ асьнысӧ шупкавны иззэзӧн.

Апостоллэз судитанінын

²⁷ Апостоллэсӧ вайӧтісӧ да сувтӧтісӧ Судитан чукӧр одзӧ. Аркирейыс юасьӧмӧн пондіс баитны:

²⁸ «Эгӧ разь мийӧ ӧлӧ тіянӧс? Эгӧ разь тшӧктӧ дугдыны велӧтны Сія ним йылісь? Тійӧ тай быдсӧн Ерусалимас паськӧтіт ассиныт велӧтӧмнытӧ. Эшӧ и сійӧ Морт вийӧмсӧ Тійӧ мӧдат кышавны миян вылӧ».

²⁹ Петраыс да мӧд апостоллэс сэтчӧ висьталісӧ: «Енсӧ колӧ кывзыны мортӧсся буржыка.

³⁰ Тійӧ Исуссӧ вийит пу бердӧ дорӧмӧн. Айезнымлӧн Еныс Сійӧ ловзьӧтіс.

³¹ Еныс Сійӧ пуксьӧтіс веськыт ладорас Юралісьӧн да Мездӧтісьӧн, медбы Израильыс бергӧтчис умӧль керӧммес дынісь да вӧлі проститӧм.

³² Лоӧмыс йылісь висьтасиссес ─ мийӧ да Вежа Лов. Этӧ Ловсӧ Еныс сетіс Сійӧ кывзісиссезлӧ».

³³ Сэтшӧмсӧ кылікӧ Судитан чукӧрись отирыс лӧгувьяныс кучиканыс эзӧ пондӧ тӧрны. Лӧсьӧтчисӧ нійӧ вийны.

³⁴ Сэк Гамалиил нима Туйдӧтӧ велӧтісь сувтіс Судитан чукӧр одзӧ. Сія вӧлі фарисей. Отир коласын сійӧ вылына пуктісӧ. Гамалиилыс тшӧктіс апостоллэсӧ сэтісь петкӧтлыны.

³⁵ Ӧксьӧммеслӧ сія висьталіс: «Израиль отир! Ныкӧт мыйкӧ кертӧдз бура видзӧтӧ.

³⁶ Неважын эстӧн лэбтісьліс Февда нима морт, кӧда асьсӧ пуктыліс кинӧкӧ ыджытӧ. Сы дынӧ ӧксьыліс нёльсё морт гӧгӧр. Сійӧ вийисӧ. Февдасӧ кывзісиссес янсалісӧ, ӧшисӧ.

³⁷ Сы бӧрсянь отирсӧ лыддьӧм коста вовліс Галилеяись Иуда. Сія ӧктыліс дынас уна отирӧс. Иудасӧ вийисӧ. Сэк сійӧ кывзісиссес рознитчисӧ.

³⁸ Тіянлӧ ӧні баита: кольӧ этнӧ отирсӧ, эд вӧтлісьӧ ны сьӧрын. Нылӧн уджыс отирсянь кӧ, сэк сія разьсяс.

³⁹ Енсянь кӧ, сэк тійӧ одӧ вермӧ сійӧ разьны. Видзӧтӧ, медбы эд сувтӧ Енлӧ паныт».

⁴⁰ Судитан чукӧрыс Гамалиилсӧ кывзісисӧ. Корисӧ апостоллэсӧ, тшӧктісӧ нійӧ виззьыны-шулявны. Эзӧ лэдзӧ нійӧ баитны Исусыс ним йылісь. Сэсся лэдзисӧ.

⁴¹ Судитанінсис мунтӧн апостоллэс гажмисӧ. Нійӧ эд вартлісӧ-умӧльтісӧ Дӧсвидзись Исус ним понда. Сідзкӧ, нія Еныслӧ туяна отир.

⁴² Быд лун Вежа Керкуын да горттэзын апостоллэс дугдывтӧг велӧтісӧ, висьтасисӧ Бур Юӧрсӧ да осьтісӧ: Исусыс и эм Кристос-Мездӧтісьыс.