Ап. керӧммез 3 - Бур Юӧр 2019

¹ Петра да Иоан оськалісӧ Вежа Керкуӧ. Сэтчин куимӧт часӧ вӧлі кейман кад.

² Вежа Керкуас пырны вӧлісӧ «Басӧк» нима ыбӧссэз. Быд лун ны дынӧ вайӧтлывлісӧ мортӧс, кӧда шогмӧмсянь эз вермы ветлӧтны. Сія пукаліс да корис Вежа Керкуӧ пыриссезлісь.

³ Корисьыс казяліс Петрасӧ Иоаныскӧт, кӧр нія лӧсьӧтчисӧ пырны Вежа Керкуӧ. Мортыс пондіс корны нылісь отсӧт.

⁴ Петраыс Иоаныскӧт видзӧтӧв-керисӧ сы вылӧ. Петраыс сылӧ висьталіс: «Видзӧт миян вылӧ».

⁵ Корисьыс видзӧтіс ны вылӧ, видзчисис мыйкӧ босьтны.

⁶ Петраыс сылӧ шуис: «Зарни да эзысь менам абу. Сета тэныт, мый эм. Назаретісь Кристос Исус нимӧн чеччы, ветлӧт!»

⁷ Петраыс кутіс мортсӧ веськыт киӧттяс да лэбтіс. Сэк корисьыслӧн коккес вынсялісӧ.

⁸ Сія чепӧссис-чеччис, пондіс ветлӧтны. Ныкӧт ӧтлаын пырис Вежа Керкуӧ. Сія ветлӧтіс, чеччаліс, ошкис Енсӧ.

⁹ Быдӧс отирыс син одзын сія аслас кок вылын ошкис Енсӧ.

¹⁰ Отирыс тӧдісӧ: сія эд Вежа Керкуас «Басӧк ыбӧссэз» дынын пукалӧмӧн корись мортыс. Сыкӧт лоӧмсянь быдӧннысӧ диво кутіс, нія ӧддьӧн повзисӧ.

Петралӧн Вежа Керкуын баитӧм

¹¹ Шогӧтсис веськалӧм мортыс Петра да Иоан дынісь кальк эз кер. Дивуйтчӧмныссянь отирыс ӧксисӧ ны дынӧ «Соломонлӧн вевттьӧминӧ».

¹² Сэтшӧмсӧ адззикӧ Петраыс висьталіс отирыслӧ: «Израиль отир! Мыля тіянӧс диво кутӧ лоӧмыссянь? Мый видзӧтат миян вылӧ, жыв мийӧ асланым вынӧн веськӧтін сійӧ? Мийӧ Енлӧ юрбитіссез, поди, сійӧн сія сувтіс кок вылас?

¹³ Авраамлӧн, Исаклӧн да Яковлӧн Ен, миян айезлӧн Ен, сетіс Аслас Исус Зонлӧ югьялан вынсӧ. А тійӧ Сійӧ вузаліт, нем туйӧ пуктіт, кӧть Пилатыс мӧдіс Исуссӧ и лэдзны.

¹⁴ Тійӧ нем туйӧ пуктіт Вежасӧ, Ен сьӧрті веськыта Олісьсӧ. Корит лэдзны морт вийисьӧс.

¹⁵ Олан Сетісьсӧ тійӧ вийит, но Еныс Сійӧ ловзьӧтіс. Мийӧ лоӧмсӧ асьным адззылім, ӧні сы йылісь и висьтасям.

¹⁶ Шогалісьыс веритіс Исуслӧн нимӧ. Эта нимыс вынсьӧтіс мортсӧ. Тійӧ сійӧ мортсӧ адззат и тӧдат. Исуссянь локтӧм веритӧмыс тіян син одзын козьналіс сылӧ этӧ веськалӧмсӧ.

¹⁷ Воннэзӧ! Ме эд тӧда: тійӧ веськӧтліссезныткӧт керитӧ сідз тӧдтӧг.

¹⁸ Еныс керис сійӧ, мый кӧркӧ висьтавлӧм Аслас юӧртіссез пыр, Кристос-Мездӧтісьлӧ пӧ ковсяс пессьыны-мырсьыны.

¹⁹ Сідзкӧ, бергӧтчӧ умӧль керӧммезныт дынісь Енлань, медбы Сія лэдзис тіянлісь умӧль керӧммезнытӧ!

²⁰ Сэк Дӧсвидзисьсянь локтас ловнытӧ вильмӧтан кад. Сэк Сія ыстас тіянлӧ кӧркӧсянь сувтӧтӧм Кристос-Мездӧтісьсӧ ─ Исуссӧ.

²¹ Еныс Сійӧ босьтіс енӧжас. Исусыс лоас сэтӧн, кытчӧдз быдӧс оз ло лӧсьӧтӧм одззамоз. Эта йылісь Еныс одззасянь ни юӧртлӧм Аслас вежа юӧртіссез пыр.

²² Моисейыс висьталӧм вӧлі айезнымлӧ: "Дӧсвидзись Енныт менӧ моз тіянлӧ сувтӧтас воннэзныт коласісь Юӧртісьӧс. Сійӧ кывзісьӧ быдӧсын, мый пондас баитны.

²³ Сідз лоас: мортыс оз кӧ кывзы Сійӧ Енсянь Юӧртісьсӧ, Ен отир дынісь сійӧ вашӧтасӧ, олансӧ орӧтасӧ".

²⁴ Самуил кадсянь Енсянь юӧртіссес быдӧнныс юӧртісӧ эна луннэз йылісь.

²⁵ Тійӧ ─ Енсянь юӧртіссезлӧн да йитӧтлӧн зоннэз. Сійӧ йитӧтсӧ Еныс керӧм вӧлі миян айезкӧт. Авраамыслӧ баитӧм: "Тэнат увтырись шогмӧмсянь Менам бласлӧвитӧмӧ вуджас быд отирпӧлӧслӧ".

²⁶ Ассис Исус Зонсӧ Еныс ловзьӧтіс. Сійӧ ыстіс медодз бласлӧвитны тіянӧс, быдӧннытӧ бергӧтны лёк керӧммезныт дынісь».