Ап. керӧммез 25 - Бур Юӧр 2019

¹ Юралісьӧ пуксьӧмсянь куим лун бӧрті Фестыс Кесарияись иньдӧтчис Ерусалимӧ.

² Сэк аркирейыс да иудейезлӧн веськӧтліссес локтісӧ сы дынӧ. Нія баитісӧ Фестыскӧт, норасисӧ Павелыс вылӧ.

³ Тшӧктісӧ керны ны сьӧрті. Корисӧ вайӧтны Павелсӧ Ерусалимӧ. Асьныс лӧсьӧтчӧмась туй вылас сійӧ вийны.

⁴ Фестыс висьталіс: «Павелыс сьӧрын Кесария карас видзӧтӧны воиннэз. Чожа ме ачым иньдӧтча сэтчин.

⁵ Сідзкӧ, тіян веськӧтліссезныт ась мунӧны мекӧт. Керис кӧ Павелыс мыйкӧ умӧльӧ, сэк суд вылас висьталатӧ».

⁶ Ерусалимас кыкьямыс я, дас я лун олӧм бӧрын Фестыс бертіс Кесарияӧ. Мӧд лунас пуксис судитанінас да тшӧктіс вайӧтны Павелсӧ.

⁷ Кӧр Павелыс локтіс, сы гӧгӧрӧ сувтісӧ Ерусалимсис локтӧм иудейес. Уна лёк керӧмсӧ висьталісӧ Павелыс вылӧ. А кытӧн, кыдз да мый вӧлі, бытшӧмик нем эзӧ вермӧ висьтавны.

⁸ Асьсӧ дорйӧм могись Павелыс висьталіс: «Иудейезлӧн Туйдӧтлӧ, Вежа Керкулӧ, Рим ӧксулӧ ме умӧльсӧ эг кер».

⁹ Фестыс иудейезлӧ бурсӧ керӧм могись Павелыслісь юаліс: «Тэ мунан Ерусалимас? Ме сэтчин верма чулӧтны судсӧ».

¹⁰ Павелыс висьталіс: «Ме сулала Римсянь сувтӧтӧм юралісь одзын. Мекӧт эстӧн и колӧ бӧрйисьны. Тэ бура тӧдан: иудейеслӧ ме умӧльсӧ эг кер.

¹¹ Ме кӧ мӧдмоза баита, кери кӧ мыйкӧ умӧльӧ, кӧда понда колӧ кувны, кулӧмись ог пышшы. Нылӧн висьталӧмись ме ӧтікӧ эг кер. Сійӧн некин оз вермы менӧ сетны ны киэзӧ. Ачым кора, ыстӧ менӧ Римӧ, ӧксулӧн суд вылӧ».

¹² Сэк Фестыс баитчис аслас мывкыда отсасиссезкӧт. Сэсся Павелыслӧ висьталіс: «Тэ корин судсӧ Римись ӧксулісь. Ӧксуыс дынӧ и иньдӧтчан».

Фест висьталӧ Агриппалӧ Павел йылісь

¹³ Кынымкӧ лун бӧрті Агриппа ӧксу да Вереника локтісӧ Кесария карӧ адззисьлыны Фесткӧт.

¹⁴ Нія сэтӧн вӧлӧмась уна лун сьӧрна. Сэк Фестыс висьтасис Павелыс йылісь: «Эстӧн пукалӧ морт. Сійӧ пукавны колис Феликсыс.

¹⁵ Ерусалимӧ вовлӧмӧ коста сы вылӧ меным норасисӧ аркирейес да иудейезлӧн пӧриссес. Нія тшӧктісӧ сійӧ судитны.

¹⁶ Ме нылӧ висьталі: Рим отир бӧрйисьтӧг мортсӧ вийны озӧ сетӧ. Морт вылӧ баитіссеслӧ колӧ баитны мортыс одзын. А мортыс суд вылас асьсӧ вермас дорйыны.

¹⁷ Нія локтісӧ татчӧ. Ме падмӧтчытӧг мӧд лунас пукси бӧрйисьны, тшӧкті вайӧтны сійӧ мортсӧ.

¹⁸ Мортыс вылӧ норасиссес сувтісӧ сы гӧгӧрӧ. Ме видзчиси кывны кытшӧмкӧ умӧль керӧм. Но гӧгӧр сулаліссес мортыс йылісь эзӧ висьталӧ ӧтікӧ, мый ме чайті кывны нысянь.

¹⁹ Нія сыкӧт етшасисӧ Енныслӧ копрасьӧм кузя да кытшӧмкӧ кулӧм Исус кузя. Павелыс Исусыс йылісь висьталӧ, Сія пӧ ловья.

²⁰ Ме эстӧн ог тӧд, кыдз-мый керны. Сійӧн сылісь юалі: мунас я сія Ерусалимӧ, бӧрйисьны сыкӧт вермасӧ сэтчин.

²¹ Но Павелыс корис ыстыны сійӧ Римӧ, ӧксулӧн суд вылӧ. Римӧ иньдытӧдз ме тшӧкті воиннэслӧ сы сьӧрын видзӧтны».

²² Агриппаыс Фестыслӧ висьталіс: «И ме бы кывза сійӧ мортсӧ». Мӧдыс висьталіс: «Ашын кывзан сійӧ».

²³ Мӧд лунас Агриппаыс да Вереникаыс ӧддьӧн баситчӧмӧсь, дона паськӧмаӧсь пырисӧ судитанінас. Сэтчӧ ӧксисӧ сюрс воинӧн веськӧтліссез да карсис вылына пукалісь йӧз. Фестыс тшӧктӧм сьӧрті Павелсӧ вайӧтісӧ.

²⁴ Фестыс висьталіс: «Агриппа ӧксу да ӧксьӧм йӧз! Тійӧ адззат этӧ мортсӧ. Ме вӧлі Ерусалимын. Сэк иудейес унаӧн вовлісӧ меным норасьны эта морт вылӧ. Нельки эстӧн нія горӧтлісӧ, тшӧктісӧ сійӧ вийны.

²⁵ Ме сы сайын эг адззы умӧльсӧ. Нем понда сійӧ вийны. Ачыс сія корсьӧ Римӧ ӧксу одзӧ. Мортсӧ мӧда ыстыны сы дынӧ.

²⁶ Ме ог тӧд, мый гижны ӧксуыслӧ сы йылісь. Сійӧн мортсӧ вайӧті тіян одзӧ. Дзир тэ одзӧ Агриппа ӧксу. Видзӧтӧм бӧрын медбы вӧлі мый гижны.

²⁷ Ме сьӧрті дак: оз туй ыстыны мортсӧ сы йылісь гижтӧг, мый понда сія вӧлі пуксьӧтӧм».