Ап. керӧммез 19 - Бур Юӧр 2019

¹ Аполлосыс вӧлі Коринфын. Сы коста Павелыс муніс керӧса муэзӧт да локтіс Ефесӧ. Сэтчин адззис кынымкӧ велӧтчисьӧс.

² Сія нылісь юаліс: «Козьналіс я Еныс тіянлӧ Вежа Ловсӧ, кӧр пондіт веритны?» Нія висьталісӧ: «Мийӧ Вежа Лолыс йылісь эгӧ и кывлӧ».

³ Павелыс нылісь юаліс: «Кытшӧм пыртчӧмӧн нӧ тійӧ пыртчит?» Мӧддэс висьталісӧ: «Иоаныс пыртӧмӧн».

⁴ Павелыс шуис: «Иоаныс пыртіс нійӧ, кӧдна бергӧтчисӧ умӧль керӧммезныс дынісь. Отирсӧ сія тшӧктіс веритны сы бӧрын Локтісьлӧ. А сы бӧрын Локтісьыс ─ Кристос Исус».

⁵ Сійӧ кылӧм бӧрын нія пыртчисӧ Дӧсвидзись Исус нимӧн.

⁶ Павелыс пуктіс ны вылӧ киэсӧ. Сэк Вежа Лолыс лэдзчисис пыртӧммес вылӧ. Нія пондісӧ баитны мӧдік кыввез вылын да Енсянь юӧртны.

⁷ Быдӧссӧ нія вӧлісӧ даскык морт гӧгӧр.

⁸ Павелыс локтіс синагогаӧ. Сія куим тӧлісь сьӧрна сёрнитіс отиркӧт: повтӧг висьтасис, велӧтіс-осьтіс Енлӧн Юралӧм йылісь.

⁹ Мукӧдыс чорзьӧтісӧ сьӧлӧммезнысӧ да эзӧ веритӧ. Быдӧнныс одзын умӧль кыввезӧн видісӧ Дӧсвидзисьлӧн Туй йылісь велӧтӧмсӧ. Сэк Павелыс велӧтчиссескӧт ны дынісь муніс. Сэксянь сія быд лун баитіс-велӧтіс Тиранлӧн велӧтанінын.

¹⁰ Сідз кыссис кык во сьӧрна. Сійӧн Дӧсвидзись Исус йылісь юӧртӧмсӧ кылісӧ Асия пасьта оліссез быдӧнныс: кыдз иудейез, сідз и мӧдік отир.

¹¹ Павел пыр Еныс аркмӧтліс вына адззывлытӧм керӧммез.

¹² Шогаліссез вылӧ пуктывлісӧ Павелыслісь новьян чышьяннэсӧ да йыэсӧ. Сэк шогӧт-висяннэз нылӧн чулавлісӧ, сэрпӧсь ловвез ны пытшкись петлывлісӧ.

¹³ Иудейес коласын вӧлісӧ ветлӧтісь тӧдіссез. Нія Дӧсвидзись Исусыс нимӧн отирись пондісӧ вашӧтлыны сэрпӧсь ловвесӧ. Шувлісӧ сідз: «Исус нимӧн, кӧдӧ Павелыс юӧртӧ, тшӧктам тіянлӧ мортсис петны».

¹⁴ Сідз керлывлісӧ Скева аркирейлӧн сизим зон.

¹⁵ Сэрпӧсь лолыс сэтчӧ шуис: «Исуссӧ ме тӧда, Павелсӧ тӧда, а тійӧ киннэз сэтшӧммес?»

¹⁶ Серпӧсь лола мортыс уськӧтчис Скева зоннэз вылӧ. Сія вӧлі ӧддьӧн вына да нійӧ вермис. Нія вартлӧмӧсь, вирӧсьӧсь да кушӧсь пышшисӧ сія керкуись.

¹⁷ Ефес карись быдӧнныс ─ и иудейес, и греккес ─ пондісӧ тӧдны лоӧмыс йылісь. Сысянь отирсӧ полӧм кутіс. Нія ошкісӧ-лэбтісӧ Дӧсвидзись Исуслісь нимсӧ.

¹⁸ Унаӧн вовлісӧ Исуслӧ виль веритіссез коласісь. Нія осьтісӧ-висьтасисӧ умӧль керӧммезнысӧ.

¹⁹ Сэтӧн унаӧн вӧлісӧ и тӧдіссез коласісь. Нія ӧктісӧ ассиныс небӧггезнысӧ да сотісӧ быдӧнныс одзын. Небӧггезнысӧ неблӧмась витдас сюрс эзысь сьӧм вылӧ.

²⁰ Сэтшӧм вынӧн паськаліс да поздісис отир сьӧлӧммезӧ Дӧсвидзисьлӧн Кылыс.

Ефесын зык лэбтӧм

²¹ Сэтӧн быдӧс керӧм бӧрын Павелыс юрас пыртіс мунны Ерусалимӧ. Сэтчин сія лӧсьӧтчис мунны Македония да Акаия муэзӧт. Сія висьталіс сідз: «Ерусалимас вовлӧм бӧрын меным колӧ мунны и Римӧ».

²² Македония муас ыстіс ассис кык отсасисьӧс: Тимофейӧс да Ерастӧс. Ачыс мымдакӧ кежӧ кольччис Асияас.

²³ Сія кадӧ Дӧсвидзисьлӧн Туй велӧтӧмыс кузя ыджыт зык лэбтісис Ефес карын.

²⁴ Сэтӧн вӧлі Димитрий нима эзысьӧн уджалісь. Сія эзысьсис керліс учӧтик керкуоккез Артемидалӧ юрбитанін сьӧрті. Аслас уджаліссезлӧ сія отсавліс шедтыны уна сьӧм.

²⁵ Сія ӧктіс нійӧ да ны кодь мӧдік уджаліссесӧ. Нылӧ висьталіс: «Ёрттэзӧ! Тійӧ тӧдатӧ, эта уджӧн мийӧ уна шедтам.

²⁶ Тійӧ эд асьныт адззат и кылат, мый керсьӧ Ефесас да быдсӧн Асияас. Павелыс аслас велӧтӧмӧн уна йӧзӧс ылӧтіс. Сія баитӧ: киӧн керӧммес пӧ абу еннэз.

²⁷ Сысянь миян уджным отирыслӧ оз понды ковны. Нельки ыджыт Артемида еннымлӧн юрбитаніныс абутӧм туйӧ лоас, да и Артемидасӧ ыджытас озӧ пондӧ пуктыны. Сылӧ эд быдсӧн Асияын да мӧдік муэзын оліссез копрасьӧны».

²⁸ Сійӧ кывзӧм бӧрын ӧксьӧммес лёксялісӧ. Пондісӧ горӧтлыны: «Ефесісь Артемида ─ медыджыт!»

²⁹ Нія горӧтлӧмнаныс лэбтісӧ быдсӧн карсӧ. Отирыс кутісӧ Гайӧс да Аристаркӧс, кӧдна Павелыскӧт локтӧмась Македония муись. Быдӧнныс ӧтлаын иньдӧтчисӧ карас театрӧ.

³⁰ Павелыс мӧдіс пырны отирыс коласӧ. Велӧтчиссес сійӧ эзӧ лэдзӧ.

³¹ Сэтӧн юраліссез коласісь мукӧдыс вӧлісӧ Павеллӧн ёрттэз. Нія тшӧктісӧ висьтавны Павелыслӧ, медбы сія эз мыччась театрас.

³² Сы коста ӧксьӧммес коласісь ӧтіккез горӧтісӧ ӧтікӧ, мӧдіккез ─ мӧдікӧ. Мукӧдыс ны коласісь эзӧ и тӧдӧ, мыйлӧ ӧксис отирыс, ӧксьӧмныс вӧлі арттӧм да.

³³ Иудейез корӧм сьӧрті отирыс коласісь корисӧ Александр нима мортӧс. Сія мыччаліс кинас, мӧдіс баитны отирыслӧ.

³⁴ Сія вӧлі иудей. Эта йылісь тӧдӧм бӧрын быдӧнныс ӧтік ӧмись горӧтісӧ. Отирыс кык час мымда ӧтмоз горӧтліс: «Ефесісь Артемида ─ медыджыт!»

³⁵ Карын веськӧтлісьыс ӧліс отирсӧ, сэсся висьталіс: «Ефесын оліссез! Кытшӧм морт оз тӧд: Ефес карын оліссез копрасьӧны енӧжсянь лэдзчисьӧм ыджыт Артемида енлӧ?

³⁶ Некин тіянкӧт оз етшась эта понда. Тіянлӧ колӧ лӧньсьыны. Видзӧттӧг оз ков нем керны.

³⁷ Тійӧ вайӧтіт этнӧ кык мортсӧ. Нія Артемидалӧ юрбитанінісь нем эзӧ гусялӧ. Енныт йылісь умӧля эзӧ баитӧ.

³⁸ Димитрийлӧн да сыкӧт уджаліссезлӧн эм кӧ мый ны вылӧ норасьны, ась мунӧны бӧрйисьны судӧ да Римись юраліссез дынӧ. Сэтчин ась норасьӧны ӧтамӧдныс вылӧ.

³⁹ Кошшат кӧ тійӧ мӧдікӧ, сэк ӧктасӧ отирсӧ да видзӧтасӧ миян туйдӧт сьӧрті.

⁴⁰ Талуння лунӧ лоӧм понда миянӧс вермасӧ судитны кыдз зык лэбтіссезӧс. Мыйӧн сэк мийӧ пондам дорйыны асьнымӧс эта ӧксьӧмись?» Сідз висьталӧм бӧрын сія быдӧннысӧ тшӧктіс рознитчыны.