Ап. керӧммез 12 - Бур Юӧр 2019

¹ Сія кадӧ Ирод ӧксу пондіс дзескӧтлыны вичкусис мукӧд отирсӧ.

² Сы тшӧктӧм сьӧрті шыпуртӧн вийисӧ Иоанлісь Яков вонсӧ.

³ Иродыс адззис: лёк керӧмыс иудейеслӧ вӧлі сьӧлӧмви. Сэк сія тшӧктіс кутны Петрасӧ. Сія кадӧ вӧлісӧ Шӧмтӧм нянь сёян луннэз.

⁴ Петрасӧ кутісӧ да пуксьӧтісӧ. Нёль воинӧс сувтӧтісӧ видзӧтны сы сьӧрын. Нія вежсьывлісӧ нёлись. Ыджыт лун бӧрын Иродыс мӧдӧм сійӧ петкӧтны отир одзӧ.

⁵ Чижовкаас Петраыс сьӧрын бура видзӧтісӧ. Сы коста вичкуас отирыс Петраыс понда орӧттӧг кеймисӧ Енлӧ.

Петралӧ Енлӧн отсӧт

⁶ Локтан лунас Иродыс Петрасӧ мӧдӧм петкӧтны. Сія вӧлі дорӧм кык воин коласын. Ойнас сія узис. Мӧдік воиннэз сулалісӧ ыбӧссэз дорын.

⁷ Видзчисьтӧг мыччисис Енлӧн ангел. Чижовкаас лоис югыт. Ангелыс тойыштыштіс Петрасӧ, саймӧтіс сійӧ да висьталіс: «Чеччы чожажык». Петралӧн дорӧм киэс мезмисӧ.

⁸ Ангел сылӧ висьталіс: «Йыась да кӧмась». Петраыс сідз и керис. Сыбӧрын шуис Петраыслӧ: «Пасьтав вевдӧрись паськӧмтӧ, лок ме сьӧрӧ».

⁹ Петраыс петіс да муніс сы сьӧрӧ. Сія эз вежӧрт былись керсьӧмсӧ, а юрас пыртіс: адзза пӧ Енсянь мыччалӧм.

¹⁰ Нія мунісӧ ӧтік да мӧдік видзӧтліссез дынӧт. Сибӧтчисӧ кӧртісь керӧм ыбӧссэз дынӧ. Нія вӧлісӧ карӧ петан ыбӧссэз. Ны одзын ыбӧссэс асьныс оссисӧ. Нія петісӧ да мунісӧ ӧтік улича. Сэтӧн ангелыс Петра син одзись ӧшис.

¹¹ Сэк Петраыс кыдз онісь саймис. Сія висьталіс: «Ме аслам синнэзӧн адззылі, кыдз Еныс ыстыліс Ассис ангелсӧ. Сія мездіс менӧ Иродыс киись да быдӧсісь, мый мӧдісӧ меным керны иудейес».

¹² Лоӧмсӧ вежӧртӧм бӧрын Петраыс локтіс Иоанлӧн Мария мам ордӧ. Иоанлӧн мӧд нимыс вӧлі Марк. Марияыс керкуын унаӧн ӧксисӧ кеймыны.

¹³ Петраыс ёркӧтіс ыбӧсас. Ыбӧсыс дынӧ петіс Рода нима кысъялісь ныв.

¹⁴ Сія Петрасӧ тӧдіс баитӧмыс сьӧрті. Гажувьяс эз осьт ыбӧссӧ. Родаыс котӧрӧн пырис да висьталіс, Петра пӧ ыбӧс саяс сулалӧ.

¹⁵ Мӧддэс сылӧ висьталісӧ: «Эн я ӧшты мывкыдтӧ?» Но Родаыс орӧттӧг сідз баитіс. Мӧддэс сэк висьталісӧ: «Натьтӧ, сія Петралӧн ангел».

¹⁶ Сы коста Петраыс дугдывтӧг ёркӧтіс. Нія осьтісӧ. Петрасӧ казялӧмсянь нійӧ диво кутіс.

¹⁷ Сія кинас ӧвтыштӧмӧн тшӧктіс нылӧ чӧвны. Петраыс висьтасис чижовкасис Дӧсвидзись отсӧтӧн петӧм йылісь. Лоӧмыс йылісь тшӧктіс юӧртны Яковлӧ да мӧдік воннэзлӧ. Сэсся сія петіс да муніс мӧдіклаӧ.

¹⁸ Асывнас воиннэс ӧддьӧн повзьӧмась. Нія абу тӧдӧмась, мый лоис Петраыскӧт.

¹⁹ Иродыс тшӧктӧм кошшыны Петрасӧ. Сійӧ абу адззӧмась. Сэк Иродыс юасьӧм лоӧмыс йылісь. Юасьӧм бӧрын Петраыс сьӧрын видзӧтіссесӧ тшӧктӧм вийны. Сэсся Иродыс Иудеясис иньдӧтчӧм Кесария карӧ да сувтчӧм сэтчин.

Иродлӧн кулӧм

²⁰ Иродыс лӧгасьӧм Тирын да Сидонын оліссез вылӧ. Нія каррезісь отирыс баитчӧмась ӧтамӧд коласын да локтӧмась Иродыс дынӧ. Ӧксу керкуын веськӧтлісь Властсӧ кыскӧмась асланяныс. Корӧмась отсавны бурасьны ӧксукӧт. Ны муэзын оліссез эд вердчӧмась ӧксуыс мусянь.

²¹ Висьталӧм лунӧ Иродыс пасьтасис ӧксу паськӧмӧ. Сія пуксис юралан пукӧс вылӧ да баитіс отирыс одзын.

²² Отирыс горӧтлісӧ: «Эта Ен баитӧ, оз морт!»

²³ Но Иродыс эз ошкы Енсӧ. Сійӧн Енлӧн ангел уськӧтіс Иродсӧ. Сійӧ сёйисӧ гаггез, да сія куліс.

²⁴ А Енлӧн кылыс вынсяліс да паськаліс.

²⁵ Варнава да Савл Ерусалимӧ сьӧмсӧ вайӧм бӧрын бертісӧ Антиокия карӧ. Нія босьтісӧ сьӧраныс Иоанӧс, шуны мӧд нимнас кӧ, Маркӧс.