Ап. керӧммез 10 - Бур Юӧр 2019

¹ Кесария карын оліс Корнилий нима морт, кӧда Италияись полкын вӧлі сё воинӧн веськӧтлісь.

² Сія вӧлі Енлӧ юрбитісь морт, гортіссескӧт оліс Енсис полӧмӧн. Пыр кеймис Енлӧ, уна отсаліс умӧля олісь отирлӧ.

³ Ӧтпыр куим час гӧгӧрын луннас сія адззыліс мыччалӧм. Енлӧн ангел пырис сы дынӧ да висьталіс: «Корнилий!»

⁴ Сія видзӧтыштіс ангелыс вылӧ да повзьӧмӧн шуис: «Мый, Дӧсвидзисьӧ?» Ангелыс сылӧ шуис: «Тэнат кеймӧмыт да отирлӧ отсасьӧмыт йылісь юӧрыс локтіс Еныс дынӧдз.

⁵ Ӧні ысты отиртӧ Иоппияӧ. Ась корӧны Симонӧс, мӧд нимнас кӧ шуны, Петраӧс.

⁶ Ӧні сія олӧ кучик керись Симон ордын. Сылӧн керкуыс сулалӧ саридз дорын. Сія висьталас тэныт кыввез. Нія кыввезсянь тэ гортіссеткӧт мезман».

⁷ Сідз баитӧм бӧрын ангелыс муніс. Сэк Корнилийыс корис кык кысъялісьӧс да Енлӧ юрбитісь воинӧс.

⁸ Нылӧ быдӧс висьтасьӧм бӧрын ыстіс нійӧ Иоппияӧ.

⁹ Мӧд лунас луншӧр гӧгӧрын ыстӧммес сибӧтчӧмась карыс дынӧ. Петраыс сы коста кайис керку вылӧ кеймыны.

¹⁰ Сэтӧн сылӧн пондіс кынӧмыс симавны, сія ӧддьӧн мӧдіс сёйны. Сылӧ сёянсӧ лӧсьӧтӧм коста сія адззыліс мыччалӧм.

¹¹ Сія казяліс осьта енӧжсӧ. Сэтісь сы дынӧ лэдзчисис мыйкӧ ӧн кодь. Нёльнан пельӧсӧт видзӧмӧн моз ӧн кодьыс лэдзчисис му вылас.

¹² Сэтӧн вӧлісӧ му вылісь быдпӧлӧс нёль кока вӧрпаэз, виклясиссез да енӧжись кайез.

¹³ Сылӧ вӧлі висьталӧм: «Петра, чеччы, начкыв да сёй».

¹⁴ Петраыс висьталіс: «Дӧсвидзисьӧ! Ог! Ме некӧр эг сёйлы сэрпӧсьсӧ да мый абу сӧстӧм».

¹⁵ Сэк мӧдпырись кыліс висьталӧмыс: «Мый Еныс сӧстӧмтіс, сійӧ эн шу сэрпӧсьӧн».

¹⁶ Сідз вӧлі куимись. Сэсся быдӧс бӧр лэбтісис енӧжӧ.

¹⁷ Петрасӧ диво кутіс: кыдз сылӧ вежӧртны этӧ мыччалӧмсӧ? Сы коста Корнилийсянь локтӧм йӧзыс адззӧмась Симонлісь керкусӧ да сувтчӧмась ыбӧс одзас.

¹⁸ Нія горӧтісӧ: «Эстӧн Симоныс, мӧдмоз кӧ шуны, Петраыс?»

¹⁹ Петраыс тӧдвылас видзис адззылӧмсӧ. Сы коста сія кыліс Вежа Ловлісь висьталӧм: «Куим морт кошшӧны тэнӧ.

²⁰ Чеччы, лэдзчы да мун ныкӧт. Эн пов, нійӧ Ме ысті».

²¹ Петраыс лэдзчис Корнилийсянь локтӧммез дынӧ. Сія висьталіс: «Тійӧ кошшат мортӧс. Сія мортыс ме. Кытшӧм могӧн тійӧ локтіт?»

²² Мӧддэс висьталісӧ: «Мийӧ локтім Корнилийсянь, сія сё воинӧн веськӧтлісь. Сія мортыс Ен сьӧрті веськыта олӧ да Енсис полӧ. Иудейез сійӧ бурӧ пуктӧны. Енлӧн ангел тшӧктӧм сійӧ корны тэнӧ гортас да кывзыны тэнчит висьталӧмтӧ».

²³ Петраыс рочаліс нійӧ да вердіс. Мӧд лунас муніс ныкӧт. Ныкӧт ӧтлаын мунісӧ Иоппиясис мукӧд воннэз.

²⁴ Кесария карас нія локтісӧ мӧд лунас. Корнилийыс нійӧ видзчисьӧм. Сія ӧктӧм ассис увтырсӧ да матісь ёрттэсӧ.

²⁵ Керкуас пырикӧ Петрасӧ Корнилийыс панталіс. Корнилийыс уськӧтчис Петра одзӧ да коккезас копыртчис.

²⁶ Петраыс сійӧ лэбтіс да висьталіс: «Чеччы, ме эд тэ кодь жӧ морт».

²⁷ Сыкӧт баитікӧ пырисӧ керкуас. Сэтчин Петраыс казяліс уна ӧксьӧм отирӧс.

²⁸ Сія висьталіс нылӧ: «Тійӧ тӧдат: иудейезлӧ оз туй пантасьлыны да баитны мӧдік отиркӧт. Но меным Еныс осьтіс, медбы ме ӧтік мортӧс эг шу нятьӧсьӧн да сэрпӧсьӧн.

²⁹ Сійӧн шы сеттӧг локті, кӧр менӧ корисӧ. Ме бы тӧда: кытшӧм могӧн тійӧ менӧ коритӧ?»

³⁰ Корнилийыс висьталіс: «Ме кӧслуналі. Сэксянь чулаліс куим лун. Куимӧт часӧ луннас ме гортын кейми. Сэтӧн ме одзӧ сувтіс югьялан паськӧма морт.

³¹ Сія висьталіс: "Корнилий! Еныс кыліс тэнчит кеймӧмтӧ. Отирлӧ отсасьӧмтӧ Еныс видзӧ тӧдвылас.

³² Ысты отирӧс Иоппияӧ да кор Симонӧс, мӧдмоз кӧ шуны, Петраӧс. Сія кучик керись Симон ордын. Сылӧн керкуыс саридз дорас. Сія локтас да тэныт быдӧс висьталас".

³³ Ме чожажык ысті тэ дынӧ. Тэ бурӧ керин, локтін ме ордӧ. Ӧні мийӧ быдӧнным сулалам Ен одзын. Мийӧ ӧксим кывны тэсянь Енлісь тшӧктӧмсӧ».

³⁴ Петраыс пондіс баитны. Сія висьталіс: «Ӧні ме былись вежӧрта, Еныслӧ эд быдӧс отирыс ӧткодьӧсь.

³⁵ Быд отир коласын эмӧсь морттэз, кӧдна Еныслӧ сьӧлӧмви, олӧны кӧ нія Ен сьӧрті веськыта да Сыись полӧны.

³⁶ Сія ыстіс Израиль отирлӧ Ассис Кывсӧ, лӧнь олан йылісь Бур Юӧрсӧ, кӧдӧ вайис Кристос Исус. А Сія ─ Дӧсвидзисьыс быдӧнныс вылын.

³⁷ Иудея муын лоӧм йылісь тійӧ тӧдат. Сія пондӧтчис Галилеясянь, Иоанлӧн отирсӧ велӧтӧм да пыртӧм бӧрын.

³⁸ Еныс Вежа Лолӧн да вынӧн мавтӧмӧн сувтӧтіс Назаретісь Исуссӧ. Ветлӧтікас Сія отирыслӧ керис уна бурсӧ: веськӧтліс да мездӧтліс кульыс кипод увтісь быдӧннысӧ, кӧдна сысянь пессисӧ-мырсисӧ. Сыкӧт эд вӧлі Еныс.

³⁹ Мийӧ асьным адззылім Исусыслісь быдӧс керӧмсӧ Ерусалимын да Иудея муын. Медбӧрын Сійӧ вийисӧ пу бердӧ дорӧмӧн.

⁴⁰ Еныс Сійӧ куимӧт лунас ловзьӧтіс да лэдзис мыччасьны отирлӧ.

⁴¹ Но Сія эз мыччась быдӧнныслӧ, а дзир бӧрйӧммеслӧ. Еныс тай бӧрйӧм вӧлі миянӧс. Мийӧ Сійӧ адззылім асланым синнэзӧн. Исуслӧн ловзьӧм бӧрын мийӧ Сыкӧт сёйим да юим.

⁴² Сія миянлӧ тшӧктіс отирыслӧ висьтасьны адззылӧм-тӧдӧмнымӧс да юӧртны: Еныс Сійӧ сувтӧтӧм ловьяэсӧ кулӧммескӧт Судитісьӧн.

⁴³ Енсянь юӧртіссес быдӧнныс висьтавлӧмась Исусыс йылісь: "Быдӧнныслӧн, кӧдна веритӧны Исуслӧ, умӧль керӧммезныс Исусыс нимӧн лоасӧ проститӧмӧсь"».

⁴⁴ Петралӧн баитӧм коста Вежа Лолыс лэдзчисис быд кывзісь вылӧ.

⁴⁵ Петракӧт локтӧм веритісь иудейесӧ лоӧмыссянь диво кутіс: «Вежа Лолыс вӧлі козьналӧм и мӧдік отирлӧ!»

⁴⁶ Нія кылісӧ йӧзлісь мӧдік кыввез вылын баитӧмнысӧ да Енсӧ ошкӧмнысӧ. Сэк Петраыс висьталіс:

⁴⁷ «Кинкӧ разь вермас нійӧ падмӧтны ваӧн пыртчыны? Нылӧ миян моз сетӧм Вежа Лолыс».

⁴⁸ Петраыс тшӧктіс нылӧ пыртчыны Кристос Исус нимӧн. Сыбӧрын нія корисӧ сійӧ мымдакӧ олыштны ны дынын.