1 Тимофейлӧ 6 - Бур Юӧр 2019

¹ Раббес, йӧз кипод увтын уджаліссес, ассиныс кӧзяиннэзнысӧ ась бурӧ пуктӧны, медбы отирыс эзӧ вермӧ умӧля баитны Еныс йылісь да миян велӧтӧм йылісь.

² Кинлӧн кӧзяиныс веритісь морт, сійӧ оз ков абутӧм туйӧ пуктыны, сія эд вон. Веритісь кӧзяиныслӧ колӧ ӧддьӧн бура уджавны, сія эд дона да надейнӧй морт да и ачыс сія бурсӧ керӧ. Этаӧ велӧт, сідз туйдӧт.

Ылӧтана велӧтӧм йылісь

³ Кин оз велӧт миян Дӧсвидзись Кристос Исуслӧн веськыта висьталӧм кыввезӧ да Енлӧ юрбитӧмӧ, сылӧн велӧтӧмыс нуӧтӧ мӧдӧрӧ.

⁴ Сія асьсӧ вылына лэбтӧ, нем оз вежӧрт. Сія кутчисьӧ етшасьны да кывнас вермасьны. А сысянь петӧ завидуйтӧм, видчӧм, умӧльтӧм, морт йылісь умӧльӧ юрӧ пыртӧм

⁵ да тшыксьӧм вежӧра отир коласын дугдывтӧг пинясьӧм. Нія эд вунӧтісӧ быльсӧ. Енлӧ юрбитӧмыссянь нія мӧдӧны богатсявны. Сэтшӧм отир дынісь ылынжыка видзсьы.

⁶ Мортыс юрбитӧ кӧ Енлӧ да долыта олӧ сійӧн, мый эм, ─ эта сылӧ дона тор.

⁷ Му вылас эд мийӧ нем эгӧ вайӧ и сьӧраным босьтны нем огӧ вермӧ.

⁸ Эм кӧ миян сёян да паськӧм, сійӧн пондам долыта овны.

⁹ Кӧдна мӧдӧны богатсявны, нія шедӧны быдкодь ылалӧмас, мывкыдтӧм да ковтӧм умӧль ӧзйӧтчӧмас, кыдз налькӧ. Нія мортсӧ тшыкӧтӧны да вайӧтӧны кулӧмӧдз.

¹⁰ Быд умӧльыслӧн вуджыс ─ сьӧм радейтӧм. Мукӧдыс сьӧм ӧктӧмас ловнысӧ пуктӧм кузя веритӧмсис ылалісӧ мӧдӧрӧ. Нія асьнысӧ воштісӧ быдкодь мырсьӧм-тӧждісьӧмӧдз.

Павеллӧн Тимофейӧс туйдӧтӧм

¹¹ Тэ Енлӧн морт, этаись пышшы. Тэ вынсяв Ен сьӧрті веськыта олӧмат, Енлӧ юрбитӧмат, веритӧмат, радейтӧмат, ыджыт мылаӧн да рама видзсьӧмат.

¹² Кутчы пессьыны Кристослӧ веритӧм понда, видзсьы пырся оланыс бердӧ, кытчӧ тэнӧ Еныс корис. Уна отир одзын тэ эд бура висьтасин веритӧмыт йылісь.

¹³ Мийӧ сулалам быдӧслӧ олан сетісь Ен одзын да Кристос Исус одзын, Кӧда Ачыс висьтасис быльсӧ Понтий Пилатлӧ. Ны одзын ме и кора, и тшӧкта тэнӧ:

¹⁴ Дӧсвидзись Кристос Исусным локтытӧдз быдӧс кер менам велӧтӧм сьӧрті сӧстӧма да бура.

¹⁵ Кристослӧн локтӧмыс аскадӧ лоас. Сійӧ аркмӧтас дзир ӧтік ошкӧм Еныс, Сія ӧксуэзлӧн Ӧксу, юраліссезлӧн Юралісь.

¹⁶ Сія эд ӧтнас Пырсяыс. Сылӧн югыт оланін дынӧ оз позь сибӧтчыны. Сійӧ отирыс коласісь некин эз адззыв, да и адззывны оз вермы. Сылӧ вылына лэбтӧмыс, Сылӧн юралӧмыс пырся-пыр. Аминь.

¹⁷ Ӧння кадӧ бура оліссесӧ велӧт, ась нія асьнысӧ вылына озӧ лэбтӧ. Ась надейтчӧны Еныс вылӧ, озӧ сьӧмныс вылӧ. Сія эд быдӧс сетӧ тырмӧмви, медбы миянлӧ долыта овны.

¹⁸ Велӧт нійӧ бурсӧ керны. Нія ась богатсялӧны бура отсасьӧмнаныс, озӧ лоӧ надзӧсь, а отсасьӧны отирлӧ.

¹⁹ Сідз нія ӧктасӧ донася-донасӧ. Сія лоас одзланься кад кежас пуктӧм ён увтыс, медбы сюрны пырся оланас.

²⁰ Тимофей! Видз тэныт сетӧмсӧ. Эн кутчы ковтӧмсӧ баитны да етшасьны уна тӧдіссезкӧт, кӧдналӧн тӧдӧмныс абутӧм туйӧ.

²¹ Мукӧдыс сэтшӧм ылӧтан тӧдӧмныс кузя дугдісӧ веритны. Енлӧн бурсетӧмыс тэкӧт! Аминь.