1 Тимофейлӧ 5 - Бур Юӧр 2019

¹ Пӧрисьсӧ эн ӧмав, айкӧт моз баит, туйдӧт сійӧ. Томжыккесӧ велӧт воннэзӧс моз.

² Пӧрись инькаэсӧ туйдӧт мамӧс моз. Нывкаэсӧ велӧт сӧстӧм сьӧлӧмсянь сойезӧс моз.

Дӧваэз йылісь

³ Отсав дӧваэслӧ, кӧдна ӧтнаныс олӧны.

⁴ Дӧвалӧн эмӧсь кӧ челядь али внучоккез, нія ась велӧтчӧны тӧждісьны гортіссес понда, отсавны ай-мамныслӧ. Сідз керӧмыс Еныслӧ сьӧлӧмви.

⁵ Чунь ӧтнас кольччӧм дӧваыс отсӧтсӧ видзчисьӧ Енсянь. Сія лун и ой кеймӧ да кеймисьӧ Еныслӧ.

⁶ Гажӧтчан да кокнит олансӧ дӧваыс кошшӧ кӧ, сэк сія и ловьяыс эд кулӧм ни.

⁷ Тшӧкты нійӧ овны сідз, медбы нылӧн эз вӧв ӧтік умӧль керӧм.

⁸ Кин оз тӧждісь аслас увтырись отир понда, ӧддьӧнжык гортіссес понда, сэтшӧмыс дугдіс ни веритны. Сія умӧльжык вериттӧммезся.

⁹ Дӧваэз лыдӧ бӧрйы нійӧ, кӧдналӧ кватьдасся абу етшажык да кӧдна вӧлісӧ дзир ӧтік сайын.

¹⁰ Отирыс нійӧ тӧдӧны бурсӧ керӧмныс сьӧрті: нія бытшӧма быдтісӧ-велӧтісӧ челядьсӧ, гортаныс рочавлісӧ мунісь-локтіссесӧ, миссьӧтлісӧ вежа отирлісь коккезнысӧ, отсасисӧ пессись-мырсиссеслӧ, отирлӧ керлісӧ быдпӧлӧс бурсӧ.

¹¹ Том дӧваэсӧ эн сюрӧт. Ӧзйӧтчӧмныс кузя нія ылӧжык вешшӧны Кристосыс дынісь да тэрмасьӧны петны жӧник сайӧ.

¹² Нія озӧ видзӧ Енлӧ сетӧм кывнысӧ, сійӧн пӧртчӧны умӧль кериссезӧ.

¹³ Керкуись керкуӧ ветлӧттӧн нія велалӧны весь овны, ковтӧмсӧ баитны да быдлаӧ юрнысӧ сюйлыны.

¹⁴ Ме велӧта сідз: том дӧваэзлӧ колӧ петны жӧник сайӧ, ваясьны, кианыс видзны гортнысӧ. Сэк лёк керисьыслӧ нем лоас висьтавны умӧльсӧ мортыс йылісь.

¹⁵ Мукӧдыс эд ылалісӧ ни, мунӧны сотанаыс сьӧрӧ.

¹⁶ Веритісьлӧн эм кӧ увтырас дӧва, ась сія быдӧсын отсалӧ сылӧ. Оз ков сійӧ отсӧтсӧ пуктыны вичкуыс вылӧ. Сэк вичкуыс унажык вермас отсавны чунь ӧтнаныс кольччӧм дӧваэслӧ.

Вичкуын веськӧтліссез йылісь

¹⁷ Вичкуын веськӧтліссесӧ, кӧдна бура уджалӧны, бурӧ пуктӧ да вештӧ уджныс понда, ӧддьӧнжык Ен Кыв висьтасиссезлӧ да велӧтіссезлӧ.

¹⁸ Вежа Гижӧтыс эд висьталӧ: «Вартісь порозыслісь ӧмсӧ эн тупкав». Висьталӧм и сідз: «Уджалісьлӧ уджыс понда колӧ вештыны».

¹⁹ Вичкуын веськӧтлісь йылісь умӧль висьталӧмсӧ кывзы дзир сэк, висьталасӧ кӧ кык, куим я морт.

²⁰ Кин керӧ кӧ умӧльсӧ, ӧмав сійӧ быдӧнныс одзын, медбы и мӧдіккезлӧн полӧм вӧлі.

²¹ Ен одзын, Дӧсвидзись Кристос Исус одзын да бӧрйӧм ангеллэс одзын ме и кора, и тшӧкта тэнӧ: быдӧс кер велӧтӧмӧ сьӧрті. Ассянят нем эн кер, морт вылӧ эн видзӧт.

²² Тэрмасьӧмӧн киэтӧ некин вылӧ эн пуктывлы, медбы эн ло ӧтдор умӧльсӧ кериссескӧт. Видз асьтӧ сӧстӧмӧн.

²³ Ӧнісянь эн ю дзир ӧтік васӧ. Унаись шогалӧмытсянь да гыркыт висьӧмсянь невнаӧн ю вина.

²⁴ Мукӧдыслӧн умӧль керӧммезныс тыдалӧны ӧні ни, Судыс пондӧтчытӧдз. Мукӧдыслӧн оссясӧ бӧрынжык.

²⁵ Сідз и бурсӧ керӧммез: мукӧдыс ӧні тыдалӧны, а кӧдна озӧ тыдалӧ, бӧрынжык оссясӧ.